المناسبات هل هي قابلة للتغير..!!

[أوطان]

بوفيه .. مفاطيح ..تميس وقلابه مو مشكله ماعلى كريم تشرط ,,
اهم شي مانقعد على الارض << متعقده

[فيمتــو]

اقتباس:  المشاركة الأصلية كتبت بواسطة شموع تحت المطر     ودي أشوف الرجال

اقتباس:  المشاركة الأصلية كتبت بواسطة شموع تحت المطر     قاعدين على طاولات وكاشخين وصحووون وياكلون بيدينهم وينفضون على قولة فيمتووو وعععع .. مايصلح الواحد يلبس ثوووب مافصل لــه..

هلا بالست المصون شموووع..

لا أبشرك مو لازم الواحد يفصل الحين طلع ثوب الدفة وما شابهها
ياخذون مقاسك بالملي ---> فاهم السالفة غلط
وأنا ودي بعد أشوف الحريم تاركاتن الحش والسب والنقد الغيرهادف
ياختي الحريم نفسيات ما جوا ياكلون جايين يشوفون
ذي وش لبست وذي وش ما لبست ..
فهن اذا رجعن من العرس بيتقابلن وكل وحده تبدا بالانتقادات
فلو حطيت مفاطيح .. فإن سهره ذيك الليله لن تطول..
وبيروحن لمراقدهن على طول بحكم ان مافيه الا جملتين فقط
( والله ان مفاطيحهم اليوم ماش , لا تروحين بعيد حتى رزهم مافيه زود )
وهذا مايرضيهن البته
على صعيد اخر شف البوفيه ومايحمل في طياته من ثغرات ..
افترض ان البوفيه 20 صنف
وكل صنف قل لو انهن حبيبات ما طلعن فيه الا ثلاث عذاريب ..
هذا يعني ان فيه 60 جمله في ذيك الليله قابله للنقاش ..
بالعربي سهرتهن صباحي . وهذا طعم العرس عندهم
اضعف الايمان تبي تحط مفاطيح وتبي الحريم يستانسون بالحش ..
لبس الذبايح فساتين وبس
شموووع تحياتي لمرورك

[فيمتــو]

اقتباس:  المشاركة الأصلية كتبت بواسطة بنت الهولندية     طيب محطوووووو تانج

لا يقولون مايصلح مع المقبلات وبعدين ينقز مر
لذلك أفضل مشروب مع البوفيه (حليب النياق)

[ما عُدتُ أنا]

[align=center]

من مؤيدي عدم التكلف والتكلفة..

البذخ يفرق كثيراً عن الكرم..

وهو السبب في الرسميات ..وقلة العلاقات الاجتماعية..[/align]

[أبو الريش]

[align=center]تتكلمون عن البوفيه,,

تطورت رقيه وحصه وفاطمه!!

البوفيه للناس البروفشينل واللي متعودين عليه وكيفية وضع الأصناف المعروفه

مامثل السماط أو السفره على قولتهم, صحن رز وطاسة ماء وحبتين تفاح وبس ! أعتقد هالسفره تجمع كل شيئ, قل تكليف وفوائد غذائيه وجلسه صحيه على الأرض مهب تقل جحش ناكل وحنا واقفين ونطقق بهالملاعق وياليت نصيد شي من هالأكل أخرته ننزل الملعقه وناخذ بأيدينا,,,

أذكر أنعزمت عند ناس توهم متطورين حاطين على البوفيه !! ماودي أقوله

شكراً فيمـــتو[/align]

[فيمتــو]

اقتباس:  المشاركة الأصلية كتبت بواسطة بسومة بريده     ياربيه حامت تسبدي وانا ماشفته.... بس بصراحه لكل واحد سلبياته ... يعني اشوف البوفيه مناسب للضيوف القليلين عشان ماتصير الدعوى دردبيس وحيسي ديسي وكل وحده يغط شعره ولاكمه بصحن الي جنبه.... واذا الدعوى مفاطيح فأنا ذهينه اختار لي سفره اجتمع عليها انا وخواتي ومرة اخوي...<<موسوسين بس مااحس ان البوفيه يناسب الرجال ...لانه للدلع والتميلح... لاحناذهانين كل وحده تاخذ صحن ونتوزع نمشي ونضفضف من كل نعمه ..<<مشافيح

والله ياسالفتها سالفة البوفيهات وخصوصا عند الحريم

تجيك الوحده تمشي مليون اذا قالت الطقاقه تفضلو على العشاء
وانواع الزحمة والطقاق قسم مايذكرني الا بالمقصف ايام المدرسة
بس باقي يمدون ريالات عشان تصير مدرسة

وبعدين تملأ لك الصحن قسم يغدي كانه برج من كثر الاكل
وفي الاخير ماتاكل منه الا شوووي ويبقى ذا البرج ينكب في الزبالة
قسم قرف هالعالم مدري متى بيتطورون انا قررت اني
اذا حطيت بوفيه مفتوح ماعزم احد<= تسمع بالكرم

انا اقترررح انه لازم يكون عند كل كم طبق يكون فيه سفرجحي
يغرف الاكل عشان يحط شوي لكل شخص مو يخلي العالم
تغرف لنفسها وهذا النظام متبع في الفنادق الفخمة
بسووومة بريدة شرفتينا ونورتينا وهلا بك

[فيمتــو]

اقتباس:  المشاركة الأصلية كتبت بواسطة ميليتو     ثقافة البطون نظام البوفية المفتوح لدينا لم يجد رواجا وقبولا من الكثير والسبب أن المفاطيح هي الأوجه ومادام (الزفر ) ما ملأ أرجاء الصالة لم تقم بالضيافة المطلوبة وإكرام الرجاجيل منذ أن خرجنا على وجه الأرض ونحن لا نرى إلا من يريد أن يرفع علم الكرم وياتي ما أتى به حاتم الطائي أن يسحب معه كبشا أو حاشيا إلى ساحة الصلب ويسفك دمه لأن حديثهم قبل وبعد العشاء سيكون عن هذا المسفوك كم عمره وهل هو ثني وإلا رباع وغيره أما طريقة البوفيه المفتوح ستقضي على كل هذه ولن يجد الضيوف ما يتحدثون عنه البوفيه المفتوح لا بارك الله فيمن أدخله إلى ثقافة البطون لأن ترى مالا تأكل وتدخل الحسايف لو أن أخذت كذا وتركن كذا كثيرا من الأصناف ستتخطاها من باب الحرج والأتكيت . موضوع شيق يا فيمتو أسطا

تذكرت واحد حجازي من أصدقائي مايقول مفطّح
يقول ( مفلتح ) << التاء نصها تاء ونصها طاء
مرة معزوم على بوفيه واذكر اني غرفت شي ..
اقرب ماله انه سيريلاك احسبه جريش

حوسه ياخي تخيل مشاوي+رز+حلقات بصل+محشي+مرقوق
بصحن واحد انا قلت وشلون بيشتهيه ذا؟مير ما امدان الا وهو
عافط ام الصحن اخينا بالله المشكله مافيه ببسي ولا شي يحط فواصل بين الطبقات
يارجال البوفيه المفتوح للحريم والمفاطيح لنا خلكم سته سبعه شباب على صحن واحد وبس كلن يعرفك وتعرفه دق بالدسم لين تدوخ والسلام ختام

[شموع تحت المطر]

اقتباس:  المشاركة الأصلية كتبت بواسطة *فيمتو*     هلا بالست المصون شموووع..

ياخي حرام عليك ماصرت ست الى الحين ست بعين العدووو

اقتباس:  المشاركة الأصلية كتبت بواسطة *فيمتو*     لا أبشرك مو لازم الواحد يفصل الحين طلع ثوب الدفة وما شابهها ياخذون مقاسك بالملي ---> فاهم السالفة غلط وأنا ودي بعد أشوف الحريم تاركاتن الحش والسب والنقد الغيرهادف ياختي الحريم نفسيات ما جوا ياكلون جايين يشوفون ذي وش لبست وذي وش ما لبست .. فهن اذا رجعن من العرس بيتقابلن وكل وحده تبدا بالانتقادات فلو حطيت مفاطيح .. فإن سهره ذيك الليله لن تطول.. وبيروحن لمراقدهن على طول بحكم ان مافيه الا جملتين فقط ( والله ان مفاطيحهم اليوم ماش , لا تروحين بعيد حتى رزهم مافيه زود ) وهذا مايرضيهن البته على صعيد اخر شف البوفيه ومايحمل في طياته من ثغرات .. افترض ان البوفيه 20 صنف وكل صنف قل لو انهن حبيبات ما طلعن فيه الا ثلاث عذاريب .. هذا يعني ان فيه 60 جمله في ذيك الليله قابله للنقاش .. بالعربي سهرتهن صباحي . وهذا طعم العرس عندهم اضعف الايمان تبي تحط مفاطيح وتبي الحريم يستانسون بالحش .. لبس الذبايح فساتين وبس شموووع تحياتي لمرورك

وشوله رايحات للعرس لاصارن مهب منتقداااااااات ومتناقشات واصلا اهل العرس وشوله حاطين عرس الا بيورون الناس حطهم
اوماااا لبس الذبايح فساتين هذي خطيييييييييرة..

تشكرآآآآآآآآت فيمتوووو..

[فيمتــو]

اقتباس:  المشاركة الأصلية كتبت بواسطة فديكا بريده     بس انا من مؤيدين البوفيه بس ياليت لاجاء يااخذ الواحد مايملأ الصحن اربع خمس طبقات تقل له ولجيرانه والمشكله تقوم من السفره مااكلته بس حق الشفااااحه...

صدق مايقهرك إلا اللي يملون صحونهم وكانها رايحه
تعشي قبيله وراها وليتهم يخلصونه كان قلنا بالعافيه
الا يخلون البزران يلعبون فيه ويبقى الأكل وراهم
لاهم اللي أكلوا ولا خلوا الباقين ياكلون

والا سوالف الحريم وقت مايختارون الاكل
وشو ذا الاصفر؟
مالت عليهم ماعندهم ملح.؟
والله بوفيه آل فلان اطلق من بوفيههم
ماهم حاطين سمك؟.
وين العيش ماعندهم عيش؟

واكثر واكثر

والنهايه المؤلمه وهم طالعين
حالتهم حاله
رافعين شعورهم
والروج مابقى منه شي
وذيل الفستان راح فيها كل انواع الاكل عليه
شي يعقد

[نرسيان]

والله ياأخ فيمتو كل شيء قابل للتغيير وربما يكون فجأة أو بالتدريج عندنا العزاء صار بوفيهات
الرقي والتطور والتحضر مو في طريقة العشاء بوفيه ولا مفطح
على طاولات وكراسي أوعلى الأرض
بل في طريقة الأكل والجلوس وبقية اداب الأكل
وما اقصد بطريقة الأكل ملاعق وشوك وسكاكين او باليد...بكلا الطريقتين يقدر يكون الشخص راقي ومتحضر
<< دايم تتذكر المسلسلات جالس على الطاولة ويمسك الفرخة بايده وهات ياتقطيع واكل بالفم
نقدر نكون متحضرين وراقيين بتطبيق عاداتنا وتقاليدنا بطريقة جيدة
اتذكر مرة كنا في كوريا من عشرين سنة تقريبا ودخلنا مطعم كان عبارة عن جزءين جزء مودرن الجلوس على طاولات وكراسي والأكل عالمي وجزء كوري تقليدي بحت اخترنا الثاني
الجلوس على الأرض في جو كوري قديم والأكل على طاولة منخفضة والجلوس على الأرض على مخدات صغيرة وشرحوا لنا تعليماتهم وتقاليدهم وطريقة اكلهم مع عرض لكل شيء حتى النادلات بلباس تقليدي وكيفية نداءهم وعدم الحديث اثناء الاكل يعيشوك في جو كوري بحت
صحيح حسنا بالعصي واضطروا يجيبوا لنا ملاعق لكن كان ممتعا جدااااااا
ولا تقول عشان مطعم مهتمين ..هذي كانت طقوسهم وعاداتهم كانت راقية رغم صرامتها
بالنسبة لسؤالك انا مايفرق عندي الاثنين كنوعية اكل ..لكن في مجتمعاتنا أؤيد البوفيه عشان ابعد واروح اكل لحالي
زمان نحب البوفيهات لأنه كثير من الأصناف نادرا مانسويه وغير متوفر كثير من الاصناف والحلويات في المطاعم ... وفي السنوات الأخيرة تغير كل شيء واصبحت البيوت والمطاعم مليئة من كل الأصناف ...صار عن جد الواحد يشتهي مفطح لأنه اصبح نادر
يمكن الموضوع للبعض غير مهم ويعتبر انه ماعندك سالفة
لكن بالنسبة لي مهم جداً لأني من النوع اللي يدقق في طريقة الأكل وهذا متعبني مرررة
شكراً فيمتو وعذراً على الاطالة
احترامي وتقديري

[فديكا التميمي]

اقتباس:  المشاركة الأصلية كتبت بواسطة *فيمتو*     صدق مايقهرك إلا اللي يملون صحونهم وكانها رايحه تعشي قبيله وراها وليتهم يخلصونه كان قلنا بالعافيه الا يخلون البزران يلعبون فيه ويبقى الأكل وراهم لاهم اللي أكلوا ولا خلوا الباقين ياكلون والا سوالف الحريم وقت مايختارون الاكل وشو ذا الاصفر؟ مالت عليهم ماعندهم ملح.؟ والله بوفيه آل فلان اطلق من بوفيههم ماهم حاطين سمك؟. وين العيش ماعندهم عيش؟ واكثر واكثر والنهايه المؤلمه وهم طالعين حالتهم حاله رافعين شعورهم والروج مابقى منه شي وذيل الفستان راح فيها كل انواع الاكل عليه شي يعقد

هين الناس مايعجبهم العجب مهما حطيت لهم تطنزو ا الله لايعوق فاانصح الناااس مايتخسروون على هالاشكااال حطولهم
رز بعد ابو بنت ارخص نوووع ودجاااج واللي تقدرونه جيبوله لحم.....
والا اقول لحد يعزم وشوله العزايم الواحد يتقهوى ويسلم ويطلع
خلك خفيف تنحب

[الرأي الحر]

المشكلة إن العزايم والمناسبات صارت فيها خساير أكبر
يعني تلقا البوفيه طويل عريض وحاطين مفطح عشان الشيبان ما سلمنا لا هيك ولا هيك
أنا دايم اجلس مع الشيبان لأنه مفطح
وحتى الشيبان يجابلهم الحلا والفاكهة من البوفيه
والبعض يحط سيرفس او خدمة خاصة للشيبان
على فكره بعض الشيبان ما ياكل يخاف يطخونه عين
ويالله تكون ولا أحلا جامعه الجديد والقديم
مفتوفيه <-- اسم جديد وش رايك