تحليل الشخصيه اذا تبي نحلل شخصيتك تفضل ,خصم لاول 1000 مشترك

[محب الصحابه]

بالنسبه لتفسير الحلم اللي شفتوه سجل عندك :

الغابه فيها أشجار متشابكه من الأسفل بس يدخل فيها نور للشمس ..وأشجارها خضراء مره ...وعملاقه ( الله يخلف ما هنا لغه ) ....والوقت نهار يعني تقدر تقول الضحى ...
أسمع أصوات قرود...يصايحون وينطّطون من شجره لشجره ( ما عليهم شرهه ...قرود ) ...وعصافير تصارخ ....عفواً ...تغرد ...


وفجاه أشوف زول ( مهب سوداني ) يعني ضلال ...والحقوه ..وهو ينحاش ..والحقوه ..وهو ينحاش ...والحقوه ...( إخلص علينا ) وأمسكوه والقاه أرنب .....حلو يصلح عليه كبسه
:2: .و اتغدى عليه وأكمل طريزي..( طريقي) و أنا ماشي ...و يطلع لي نمر (لونه وردي زي اللي يطلع من أول بالتلفزيون ويبدى يخزّن بعيونوه ...وانا اخّزوه ...وشوي يبدى يمشي لمّي وبصراحه خفت انا ..مهب من النمر... لااااااا ...بس غترتي مكويّه وما كان ودّي إني امزح معه علشان ما تتعرّفط >>> يالنصااااااااااااااب



يوم شفتوه ودّوه...يهجم عليّ طلعت كلينكس.... قصدي ...مسدس وأحّط رجلي وأنحاااااااش ...>>> ما أحب الإجرام والعنف وسفك الدماء...


وبالنسبه لي أتسلق الجدار لأني متعوّد أتسلق شجربيتنا ...والزجاجه أخذها معي وأفتحها علشان اشوف وش بداخلها >>> ملقوف
معليش تراي ما احب البحر... بس إذا حدّتنا الظروف وش نسوي ...ياطويل العمر أقعد على الساحل واناظر وأتامل الامواج وانا مدودل رجولي بالماء ...ويمكن تجوز لي أقول هجيّنيّه ...بعدها لا غابت الشمس أروح للخيمه >>> يحسب نفسه كاشت...




أقول يا دختور فاتورة العلاج أرسله على هالصفحه....هنا ...يا انا هنا

[FaBio13]

الله يعطيك العافيه أخوي (انا هنا) ... الصراحة انك مانت سهل .... 80% من اللي قلت صحيييييييييييح .

بالنسبة للتشائم .... بالعكس جدا أنا من المتفائلين دائما ... حتى لو واجهتني مشكلة أتقبلها بصدر رحب وأسلعى لحلها سريعا .

كلامك صحيح لدي حب الاستطلاع ... ولكن ليس من الدرجة الاولى ====>(( شرووووووووووف درجه اولى ))) الله يهديك حاطه بين قوسين بعد !!!!

.........................
بالنسبة لكلامك ===>((انت محاط بناس لطفاء تحبهم (( ممكن يكونون اطفال وممكن يكونون كبار ))) مع وجود بعض الاشخاص المزعجين نوعا ما ولكن هولاء المزعجين لايسببون لك اي اذى )) صحيح 100% والحمد لله فيه أطفال وكذلك أشخاص كبار أحبهم ويحبوني .

الف شكر لك أخي العزيز ... وتقبل تحياتي .

[خـــــــــــــــالـــــــــد]

اخي فابيو
اشكر لك سعة صدرك وتواصلك تقبل تحياتي
================

اخوي محب الصحابه

ممكن اقول شي ؟؟

ياكثر هرجك دوختن وصكن راسي وصار انا اللي ابي دكتور

بس من جد ترى مالي دخل اذا تحليل شخصيتك طلع مو مضبوط لانك بصراحه ,, معليش بس عشان مصداقيه المهنه <<<<<<<< مصدق اني طيبيب

لانك شكلك بديت تخربط وتالف من عندك


=============

استلم يا اخوي تحليلك ...

حياتك واضحة تماما وبعيده عن الغموض ولكن يشوبها الكثير من المشاكل وان كنت لاتحب مواجهة المشاكل وتحاول تجنبها لانك لاتستطيع حلها بسهوله

حولك ناس ظرفاء جدا تحبهم ويحبونك
ويوجد بعض الازعاج من ناس لكن لايسببون لك اي اذى

بينما يوجد اشخاص انت تقلق بشانهم لانك تستلطفهم وتحبهم


بس اذا امنت متزوج ما نقول الا ياحول يالمعزبه ,,, للاسف انت ماتقر بالبيت واحبليك الطلعه من الجلسه في البيت


لديك طموحات ربما تكون دافعا لمزيد من حب الاستطلاع

وان كان حب الاستطلاع هذا يميل احيانا الى ((( الشرافه ))) وهذه الشرافه بدافع المساعده في حل مشاكل الاخرين


===========
اخي الكريم وسع صدرك ولا تزعل علينا

وعلمنا عن مدى مطابقه هالتحليل للواقع

[محب الصحابه]

هلا اخوي ( أنا هنا ) ....تسلم يمينك ......بس لاتنسى ترسل الفاتوره

للبكيراوي تراى مسلّفه قروش ولا ردّهن إلى اليوم .....

بالنسبه لتحليلك... يا سعادة معالي الدختور ...فيه من شخصيتي :

- من ناحية المشاكل فهي موجوده بصراحة في محيط العمل لأني من النوع اللي ما يرضى باللف والدوران ولا أحب اللي يسمونه نفاق إجتماعي

...وصراحتي مع اللي حولي تسبب لي مشاكل كثيره

- محبة الناس نعمه اللهم لك الحمد ..وعسى الله يكتب لنا القبول في السماء والأرض...

- أمّا هالنقطه ( بينما يوجد اشخاص انت تقلق بشانهم لانك تستلطفهم وتحبهم ) ......
والله إنك صاز فيها بالحيييييييييييييييل كثييييييييير ....

هذا بلى أبوك ياعقاب .....>>> مشكلتي إني حبوب وطيوب

وطمووووووووووووووح والدليل إن الجامعه مغربليني ..حسبي الله

على العدو ....

شكرا لك من قلبي .....بس لا تنسى فيه إختراع يقولون له ( بندول) تراه

زين للصداع.....خخخخخخخخخخخخخخخ



تحياتي
:1:

[خـــــــــــــــالـــــــــد]

وين الناس


الظاهر خافوا

لانعرف شي عنهم

بس ترى التحليل ما يخوف وانا ما اعض

يومين ما احد تقدم للتحليل


آآآآآآآآآآآخ منكم ,, طيبيبن ,,, وراعين فزعات اينعم ,,, بس تظلون مترددييييين (( عذرا في هالكلمه ))) اذا قرب احد حول احوالكم ونفسياتكم مع اني قلت مو شرط ترى اذا ضبط لغيرك يضبط لك



بصراحة انا اتحداكم ,,,,,,,,

[عبير]

اهلين اخي

احجز لي مكان عندك

بس اصبر حتى القى وقت اصير فيه مروقه عشان اتخيل زين

لك تحياتي على موضوعك الخياااالي

[البكيراوي]

الدكتور انا هنا ,,

سجل عندك البكيراوي ,,

[عبير]

اهلين مره تانيه

دكتوووور طبقت تعليماتك بالحرف الواحد وظهر الاتي:<<< لغه عربيه


الغابه اللي امشي فيها شجرها كثيره ومتشابكه من اعلى فقط اما من الارض فهي واسعه وكان الوقت بعد العصر ما بعد غربت الشمس واسمع اصوات عصافير وفحيح افعى .......

شف التخيل بس

عاد يوم شفت الاسد طالع لي ما استخدمت ولا سلاح من الي انت ذكرتهن كلهن حلتهن و هجيت :3: :3:

كملت طريقي حتى وصلت الجدار وحاولت اتسلقه اما القاروره بس ناظرتها وكملت طريقي وخليتها

ويوم وصلت للبحر فسخت نعالي ومشيت لمين وصل الماء نصف الساق وما توهقت اكمل اخاف تجي موجه وتشيلن بعدين اغرق

عاد من وين لكم وحده اسمها عبير

يالله ننتظر تحليلك ايها الدكتور في نفس الصفحه

[~ ر و ز ~]

كالعادة رائعة من روائع اخونا الفاضل انا هنا ..

وان شاء الله انا معكم ..

<== يومها عن سنه

تحياتي..

~ ر و ز ~

[خـــــــــــــــالـــــــــد]

مرحبا اختي عبير
واسمعي التحليل,,,


حياتك واضحه وبعيده عن الغموض مع انه يوجد لديك القليل من المشاكل المترابطه مع بعضها

ومع ذلك فانت لاتحبي مواجهة المشاكل وغير قادره على حلها

لذلك انتبهي من وجود عدو او شخص ممكن ان يكون ذو اذى فكوني حذره منه

ويوجد حولك اشخاص لطفاء وظرفاء تحبينهم ويحبونك

انت لست من اصحاب الطوح قنوعة بما وصلتي اليه وذلك فنجد لديكي عدم الرغبه بالاستطلاع لما يدور حولكي يعني منتب ((( شرووووووووووفه ))

لستي من النوع البيتوتي تماما بل احيانا كثيره تفضلين الخروج عن جلسة البيت


اختي الكريمه ممكن تخبرينا عن مدى علاقه ومطابقة التحليل للواقع

[~ ر و ز ~]

أنا جيت
هذا اللي طلع معي
كانت الغابة مليانه اشجار <== لاوالله اجل وشو له اسمها غابه .. المهم الاشجار فيها متشابكه من تحت <== تبي تغير عن الناس ..
وانا امشي مسرعة طبعا امشي واطيح من هالاشجار كان الوقت تقدر تقول مسيان كنت اسمع اصوت بومات <== ماادري صح الجمع والخفافيش على أفا من يشيل . ماغير خر.. مر .. وصوت العصافير مالي المكان .. وانا امشي واتلفت يمين ويسار فجأة قدامي غوريلا كبييييير .. يمشي ويخبط بايدينة ( على فكرة من اصلي جدعت الحصاة والعصا وش يسون ذولي !! )
المهم يوم شفت الوحش مسكت المسدس وانا ادور معه طعطعطعطعطع <== حركات يخسى رامبو عندها الين ماصرت بمكانه وهو بمكاني ومسكت عباتي وورررررر هجيت! بعدما طلعت من الغابه شفت الجدار لكن تصيعبتها ورحت مع الطريق الوعر وصرت اركض اخاف يذن المغرب قصدي يحل الظلام والقارورة ان كان شكلها غريب او ماشفت قبلها قوارير فأكيد ابخذها اما اذا كانت من عرضك ياعريض فانا ماشفتها .. وصلت البحر وقلت مالي الا ازين لي مكان للنوم واشب النار الين يرزقني ربي باحد يمر ويوديني لاهلي ..
<== انواع النصب اصلاً لو هي بهالموقف كان مغمي عليها وميته من الصياح من اول ماشافت الغابة

يالله ورينا همتك يادكتور .. والله شكلي حاله مستعصية بس الله الله بالخصم ..

تحياتي..
[shdw]~ ر و ز ~ [/shdw]

[خـــــــــــــــالـــــــــد]

روز وش يقرب لك محب الصحابه؟؟!!!!!!!!!1


كلكم ادوختوا راسي بفلسفتكم
وماعلي منك اذا ما ضبط التحليل ترا انت السبب

المهم استلمي ,,,,,,


حياتكي فيها نوع من الغموض يخص المستقبل , ولديك الكثير من المشاكل ولكن لديكي القدره على التعامل معها وحلها

انتي محاطه باشخاص ظرفاء ولطفاء تحبنهم وبحبونك

مع وجود بعض الاشخاص الذين يسببون ازعاجا لكي ولكنه ازعاج محدود بدون اذى

انتي طموحه

ولاتحبين الروتين لذلك لاتحبين جلسة البيت بل التغيير والخروج


=========
مث ما قلت لكي,,,
اذا فيه شي خاطي السبب لخبطتكي اللي صكت راسي

بس هاااااه علمينا عن مطابقه التحليل للواقع

==========

[~ ر و ز ~]

من الأول قايلة اني حالة مستعصية

ماش وانا اقول خلاص ياروز الدختور هذا ماعقبة حسافة

اكيد نبي نتفلسف هذي تحاليل مهب لعبه وانت قلت وضحوا كل شيء وانا قلت كل اللي بقلبي

بالنسبة للمستقبل ان شاء الله لاغموض ولاشيء طبعاً كلنا مستقبلنا غامض لكن انت تقصد انه فيه خوف وعدم ضمان

ولاعندي مشاكل ولاشيء الحمد لله يمكن علشاني تعاملت معها ماصارت فيه :5:


والا الباقي صحيح .. اما اني مااحب الروتين الا اكرهه كره


والتسديد بعدين واذا اي شخص يبي يتبرع بالتسديد تراي اسمح له
الا ودي اسأل بخصوص اللقافة والشرافة هل امتلك تلك الصفتان

الف شكر دكتورنا..

تحياتي..

[shdw]~ ر و ز ~ [/shdw]

[خـــــــــــــــالـــــــــد]

روز ,, المشكلة انك بديت في بعض الاحيان تزودين مما جعل الصوره غامضة او مغلوطه
ومنها بشان (( اللقافه و الشرافه )) كثرتي اللف والدوران لذلك لم استطع الخروج بنتيجه عن هاتين الصفتين وعلاقتكي بهما
بس كنت اعتقد انكي تميلين للشرافه وحب الاستطلاع ولكن كنت غير متاكده من ذلك لكن الان استطيع ان اقول لديك حب استطلاع وشرافه لكنكي تودين التخلص من هذه الصفه مع انها ليس لديكي بصوره قويه

اي اوامر تانيييييه؟

[عبير]

ايها الدكتور الفاضل تحليلك طلع تقريبا 30 % صح

الي صح عليك اني ما نب شروفه

اما الباقي فأنا اكره اطلع من بيتنا حتى يوم الخميس ما اطلع

اما المشاكل ما عندي والحمدلله بس اذا جتني قدرت اواجه

بالعكس طموحه ومن شدة طموحي ودي اصير مديره بشركة مايكروسوفت

وشف الاجتهاد بعد