سوالف أعضاء القسم الرياضي

[رائد نت]

اقتباس: خلاص .. راح نتقاط أنا و اليوكن و نشتري لك كيبورد .. بس بشرط ..؟!

كيبورد بس ؟ شف اليوكن وش يقول ...كريم ماشاءالله

اقتباس: أتحداك تدخل بأي وقت باليوم ان بغيت ( الظهر ) وإلا العصر أو حتى الفجر تلقاه مرتز هههههه لعنبوا شيطانه شف مشاركاته كم وتدري بس الرجال شاف مراتبنا زينة قال خل نلمح لهم أغديهم ( يكزون ) لنا لاب توب جديد . عاد تدري ياشاطئ إذا جزمت نشري له لاب توب تراني بشيل نصف القيمة ( وعد )

اليوكن اذا صرت اون لاين ... هذا لايعنى وجودي امام الشاشه ... ياخى لاتدقق

مشاركاتى شفها بالنسبه كل يوم مشاركه من ست سنوات

المهم عليكم انكم تشرون الكمبيوتر وتحطون شفره عند الشامل اروح اخذه

[شاطئ الراحة]

رائد نت ..

اليوكن كريم بس الي يحوسه وضع التعاون الحين ..
أدع أن مستوى التعاون يزين و أبشر بعزك هه

لأن اليوكن يعتبر أحد المشجعين التعاونيين
المخلصين لناديهم .. ولو انه يحوّم تسبدي أحياناً ..


إلا على طاري المكحل وش عنده داش على هالصبح للرياضي ..
كيفك يا المكحل تمام ..؟

[المكحل]

اقتباس:  المشاركة الأصلية كتبت بواسطة شاطئ الراحة     رائد نت .. اليوكن كريم بس الي يحوسه وضع التعاون الحين .. أدع أن مستوى التعاون يزين و أبشر بعزك هه لأن اليوكن يعتبر أحد المشجعين التعاونيين المخلصين لناديهم .. ولو انه يحوّم تسبدي أحياناً .. إلا على طاري المكحل وش عنده داش على هالصبح للرياضي .. كيفك يا المكحل تمام ..؟

هلا أخوي شاطئ
شف أنا الصبح مسنتر الليل مسنتر العصر يعني نص نص

[رائد نت]

شاطي وين اليوكن اشوفه هج عن الهديه

[شاطئ الراحة]

هلا فيك أخوي المكحل ..

أيه خلك على الوزنه هذي ..
ترى السنتر أحسن من المرتدات هه
وين رفيقك قمراي الحار هه
قله يقول شاطئ ترى سامي اسطورة بس لا يزعل علينا و خلّه يجي ..

,

رائد نت ..

لا تخاف اليوكن ما هج ..
بس تعرف توّه آخذ الراتب لابد من غيبه
ما تشوفني انا غايب عن المنتدى هه
كلّه من الراتب هه

شف يا حبيبي ..
مادام أن اليوكن ما أرضاه التعاون أنس يجيك شيء
راجعنا يوم الخميس الساعة عشر باليل و نرفع معاملتك لليوكن ثانية هه

تهقااا يوافق

[خوي البـــM.A.Hـــدر]

سوالف جميله ورائعه فعلاً كنا بحاجه لمثل هذا الموضوع أو لنقل

إستراحه أعتقد أن مثل هذه السوالف تجعلنا نتعرف على بعضنا البعض

اتمنى أن تقبولني بينكم

إنتهى .

[رائد نت]

اقتباس: رائد نت .. لا تخاف اليوكن ما هج .. بس تعرف توّه آخذ الراتب لابد من غيبه ما تشوفني انا غايب عن المنتدى هه كلّه من الراتب هه شف يا حبيبي .. مادام أن اليوكن ما أرضاه التعاون أنس يجيك شيء راجعنا يوم الخميس الساعة عشر باليل و نرفع معاملتك لليوكن ثانية هه تهقااا يوافق

يعنى الرواتب تخليكم ماتدخلون نت خخخخخخخخخ


يعنى اليوكن مايوافق حتى يفوز التعاون

على كذا مناب شايف شي هههههه

اليوكن مادحل نت من يوم الكوبري ... تهقى وش راح يشري ؟؟؟

اذا ماعلمنا وين هو رايح ... انا ابعلمك وين لقيته !!

[شاطئ الراحة]

أهلاً بالرائد المناضل ..
و الهلالي الذي أتمنى نصراويته ..
خوي البـــــــــــدر ..

غصباً على أبو أبوه ..

نقبلك بيننا ..
الي خلانا نقبل اليوكن نقبلك ..
اليوكن على خف دمّه - ما الظاهر - قبلناه ..

اسدح علومك عندما ..

بعدين ما فيه إنتهى الي كاتبها ..

[رائد نت]

اقتباس: اتمنى أن تقبولني بينكم

هلا بك خوي البدر ... حياك اقلط

[شاطئ الراحة]

رائد نت ..


لا منتب شايف شيء هه ..
و شكلي راح أشري لك انا ..
همانا نفوز كل شوي

وين يروح اليوكن يا حسره هه
من التمرين و جاااي ..
و الصباح بالعمل و أنواع الفراغ فيه ..
قال اليوكن قال هه

[غريب الدار]

اقتباس: ‏ســلــيــمــانــ , ‏شاطئ الراحة , ‏رائد نت

مساء الخير للاخوه الموجودين هنا

[رائد نت]

اقتباس: مساء الخير للاخوه الموجودين هنا

ياهلا بسليمان ... حياك ربي

[خوي البـــM.A.Hـــدر]

اقتباس: أهلاً بالرائد المناضل .. و الهلالي الذي أتمنى نصراويته .. خوي البـــــــــــدر .. غصباً على أبو أبوه .. نقبلك بيننا .. الي خلانا نقبل اليوكن نقبلك .. اليوكن على خف دمّه - ما الظاهر - قبلناه .. اسدح علومك عندما .. بعدين ما فيه إنتهى الي كاتبها ..

شكراً لك أخي شاطىء الراحة


أنا رائدي قبل أن أكون هلالي فكم أتمنى أن تقول

الرائدي خوي البـــM.A.Hــــدر هذه من جهه

و مسألة أن أكون نصراوي فهذه صعبةٌ جداً حتى

عندما أفكر مجرد تفكير يقشعر جلدي ربما يعود

السبب بالون الأصفر فهذا اللون أكرهه بل يجلب

لي الإشمئزاز ربما لأنه يُمثل التعاون أولاً ثم

النصر ثانياً هذه من جهةٍ أخرى



أسمح لي يا عزيزي بأن اقول


انتهى

[اليوكن]

شاطئ

شكل ( رايد نت ) ما صدق خبررررررررررر

أشوفه مسنتر عندك بهالغرفة من سالفة الاب توب


تصدق رحمته !!!!!

وش رايك .. مدام الراتب شبه ( فل ) تبي نسويها ونشتري له لاب توب جديد .

لا وبعد نبي نتصل على بندر الحمر ونخليه يجي يرزز صورنا بالمنتدى وحنا ( نمد ) الاب توب لرايد نت .

ويكتبون تحت الصورة :

( الشيخ شاطئ الراحة والشيخ اليوكن يسلمون الطالب رايد نت هدية نجاحه )

المشكلة ما عندي بشت للصورة

[المكحل]

اقتباس:  المشاركة الأصلية كتبت بواسطة خوي البـــM.A.Hـــدر     شكراً لك أخي شاطىء الراحة أنا رائدي قبل أن أكون هلالي فكم أتمنى أن تقول الرائدي خوي البـــM.A.Hــــدر هذه من جهه و مسألة أن أكون نصراوي فهذه صعبةٌ جداً حتى عندما أفكر مجرد تفكير يقشعر جلدي ربما يعود السبب بالون الأصفر فهذا اللون أكرهه بل يجلب لي الإشمئزاز ربما لأنه يُمثل التعاون أولاً ثم النصر ثانياً هذه من جهةٍ أخرى أسمح لي يا عزيزي بأن اقول انتهى

تصدق نفس الشعور أكرة اللون ألآصفر مررررررررررررررة
أكرة شي عندي اللون ألآصفر والسبت وجيب الخبز