لو تقدم لك شخص تربيته أمريكيه .. توافقين ؟ " محتاره " وضايق صدري

[عذابي غ ــير]

اليوم كلمت امه وفهمنا من كلامها انو جاي يجدد الفيزا خمس سنوات قدام
وتقول ماادري كانو بيجلس بعد الخمس شيء والا لا .. !
لأن امي قالت البنت متردده من ناحية السكن
فقالت على بلاطه ماراح يرجع اقل من خمس سنوات

يارب استخير لي
عجزت اجزم اوافق او ارفض

[ماهي من البشر]

^^^^^^^^^^^^

طيب انتي وش اللي جازلك فيه وبتوافقين علشانه
و وش اللي ماجازلك وبترفضين علشانه

هنا بقي عليك تدونين الأشياء بورقه وتتناقشين بين الأشياء انتي وياه وقلبك
هنا الفاصل بين الموافقه والرفض

[منبع الحكمة]

أختي سأنظر لموضوعك من عدة جهات وعذرا أنا مستعجل وسأرجع الليلة

- أختيار الزوج حسب أوامر الرسول ( دينه ، خلقه )
- في حال أن الزوج أصبح صالح فهل تستطيعين أن تعيشي في غربة دون أن يؤثر على نفسيتك وعلاقتك معه

- بصراحة ، هل أنت متعلمة وربة بيت فاهمة لأمور الحياة والتعامل ...!!!!
فلو حدث ما حدث من تجاوزات فهل تعرفين كيف تتعاملين معها ...

- تأكدي أن الحيرة لن تدلك على شيء .. فأدرسي الموضوع بتمهّل ولا تستعجلي ،، ثم أختاري أحد الطريقين ،، وبعدها أستخيري الله

- هل سبق ومريتي بخبرة خطوبة ورفضت ..؟؟
- هل أنت مثقفة ثقافة زوجية ,,...؟؟؟ أو أنك ترين نفسك لا تستغنين عن أمك لأنك غير مؤهلة

أعتذر عن كثرة أسئلتي وصراحتي ولكن هذه حياة ...؟؟

بانتظارك إذا ودّك ...!!!

[عازفة ألحان الليل]

وشلون متفتحة قوووة وخايفة من الغربة
اخبر الي متفتحين مايهمهم لاديرة بعيدة ولاشي
لأنه منفتح على العالم الخارجي وعارف كل شي وراح يسيطر على كل مخاوفه

على كل حال بالنسبة لتربيته الأمريكية اهم شي
انه يكون متمسك بدينه ولايتأثر ببعض افكارهم بأسم الحرية وهي بعيدة كل البعد عن الحرية
ويكون اخلاق وبالنسبة لبعدك عن اهلك ماشوف فيها اي شي عادي .

[خالد العامر]

يا أختي ضعي في بالك ما يلي:

1- الرجل لا يريد شقراوات، بدليل أنه يريد الزواج من موطنه.

2- لابد أن يكشف طبيا ، يحلل عن الأمراض المعدية ( وهذا سواء هو أو غيره)

3- الرجل هناك حر وطليق وعايش يومه بدون مسؤولية، فلماذا يريد الزواج؟ يريده لأنه اختار وقرر ...إذن فهو يريد حياة.

4- لابد أن تأخذي أرقام أصدقاءه هناك ، على الأقل خمسة أصدقاء والسؤال عنه من خلالهم ولكن هناك شيء مهم. الذي سيسأل يجب أن تكون لديه أسئلة مهمة وخطيرة إجابتها إما بعم أو لا. مثلا : هل يصلي؟ هل يشرب الخمر؟ هل هو كريم؟.

5- يجب يجب يجب يجب أن تسألو عن الأشياء التي تخجلون منها، ( الكلمة اللي تستحي منها بدها). كما يجب أن تضعي أنت الأسئلة التي تهمك.

6- إذا لم تحصلي على خمسة أصدقاء له، فاعلمي أن في الأمر شيئا مريبا.

7- اقراي هذه القصة البسيطة:
( اتصل من طرف أهل البنت رجل يسال عن شخص فقال : وشلونه؟ حليل؟ يقعد معكم؟ ونيس؟. فأجابه الطرف الثاني ( الذي هو صديق الخاطب) على قدر الأسئلة. فتم الزواج وبعدها اكتشفو ان المعرس يشرب خمر، وعندما أعادو الاتصال على صديقه قال لهم : هل سألتموني إذا كان يشرب أم لا؟ فقالوا لا، قال هذا خطأكم.)


8- السؤال الذهبي ويكون بالعادة خاتمة الأسئلة ( هل ترضاه زوجا لأختك؟ أو بنتك؟ )




9- الاستخارة.



بالتوفيق

[عذابي غ ــير]

اقتباس:  المشاركة الأصلية كتبت بواسطة مستشار أسري     أختي سأنظر لموضوعك من عدة جهات وعذرا أنا مستعجل وسأرجع الليلة - أختيار الزوج حسب أوامر الرسول ( دينه ، خلقه ) - في حال أن الزوج أصبح صالح فهل تستطيعين أن تعيشي في غربة دون أن يؤثر على نفسيتك وعلاقتك معه - بصراحة ، هل أنت متعلمة وربة بيت فاهمة لأمور الحياة والتعامل ...!!!! فلو حدث ما حدث من تجاوزات فهل تعرفين كيف تتعاملين معها ... - تأكدي أن الحيرة لن تدلك على شيء .. فأدرسي الموضوع بتمهّل ولا تستعجلي ،، ثم أختاري أحد الطريقين ،، وبعدها أستخيري الله - هل سبق ومريتي بخبرة خطوبة ورفضت ..؟؟ - هل أنت مثقفة ثقافة زوجية ,,...؟؟؟ أو أنك ترين نفسك لا تستغنين عن أمك لأنك غير مؤهلة أعتذر عن كثرة أسئلتي وصراحتي ولكن هذه حياة ...؟؟ بانتظارك إذا ودّك ...!!!

جابك الله يا مستشار , خليك قريب مني هاليومين احس اني تايهه
يمكن استطيع ان اعيش بغربه اذا كان هو كويس بنظري وخش مزاجي وحبيته , إذا حبيته والله لو اعيش معاه بالشارع ماعندي مانع
بس انا خايفه من اطباعه اعتقاداته , والخوف هذا طبيعي يجين كل موضوع خطبه اتوتر وتجيني نفسيه

نعم مريت بموضوع خطبه صار طووويل ولكن اخر شيء تفركش من طرفي , بسبب كذبه وخدعنا
بعد هذا الشخص تقريباً كرهت الزواج وموضوع الخطبه , صرت ما أءمن الرجال وخاصه إذا كانوا مانعرفهم ,
أما هذا الشخص تحمست معاه لأنه فيه ريحتنا , نعرفه نعرف أمه
لأن بعد موضوع الخطبه اللي تفرككش كرهت الأغراب وكنت اول ضد زواج الأقارب , لكن الحين الوضع تغير , زياده عليه قبل اسبوع مانقبلت بالماستر وكان حلمي فيها .. ففكرت أحقق حلمي معاه , اضرب عصفورين بحجر

امممم ماادرري وش تقصد بثقافة زوجيه ؟ هي هي بأمور البيت
أو علاقتي مع الزوج ؟
أانا اذا ارتحت مع الشخص على طول اتأقلم معاه , واكون صادقه
وأحافظ عليه , وأطور العلاقه للأفضل
طبعا ً هذي بأمور الحياة فما ادري العلاقة الزوجيه زيها وإلا غير !


إذا فيه أسئله ثانيه أنا حاضره .. وعادي اسأل باللي تبي
وشكرا ً لرجوعك الليله , وأنا بإنتظارك ..

[عذابي غ ــير]

اقتباس:  المشاركة الأصلية كتبت بواسطة بريداويهـ     ياسن ذيك الايام <-- ايام تقرير المصير اذا تبين نصيحتي قولي اول شي العجله مافيه عجله ردي بيكون بعد اسبوع واذا ماراح تسمحون بهالاسبوع من اوله لا وبهالاسبوع اقعدي مع اهلك خليهم ينفظونه ومايكتفون بمدح قريبه واهم من كل شي وانا اختك استخيري كل هالاسبوع خليه استخاره مع صلاة الفجر اضيفي سنة استخاره بعد الضهر وقبل العصر وبعد المغرب وبعد العشاء ولامانع بمنتصف الليل خلي كل وقتك استخاره واستغفار بنية ان ربي يفتح على قلبك ويدلك الطريق الصحيح بعد هالاسبوع قرري سواء باليجاب او الرفض ورايي اذا الولد على خلق ودين فالغربه على شدة وقعه على النفس لكن لها مزايا اولها التقريب بين الزوجين واعرف بنات كثير لو تطلع امهن ساعه انهبلن وماعرفن يمشن جياتهن بدون الام تزوجن وتغربن ولهن فوق خمس سنوات بالغربه وبكلامهن يقولن تعودنا وكونا صداقات طبعاً اهم شي الولد بيرجع لديرته وماراح يخلي غربته وطن وبالنهايه زي ماقالوا اهلك هذي حياتك وقرار مصيرك بيدك انتي الي لازم تقررين عن سابق اقتناع او بتكون حياتك نكد لمجرد انك ما اقتنعتي او انغصبتي (لان تفكيرك بينحصر بين هالكلمتين) تمنياتي لك ولجميع المسلمين بالتوفيق تحياتي

الله لا يجيب النكد لي وللمسلمين يارب

ياحبيلك كأنك حسيتي بالمعاناة
تحديد المصير شيء يخوف
أحس يبيله قلب قوي
وأانا قلبي رهيف

وبالنسبه للعجله أنا قلت ماراح اقرر الا بعد اسبوع اسبوعين
واذا ماراح تصبرون دوروا غيري << بدينا بالتغلي

وبعد ما أجلت القرارا احس نفسي اركدت وافكّر أعمق

والله يكتب اللي مافيه خير لي وله ..

مشكوره حبوبه على مرورك

[عذابي غ ــير]

اقتباس:  المشاركة الأصلية كتبت بواسطة هجير أمنيه     الله يكون بعونك وبعوني الغربه صعبه00سواء داخل المملكه ولا خارجها0 وتقرير المصير واتخاذ القرار شيء صعب وحتى لو كان عندك اخوات رح يجزمونك شوي لكن بينك وبين نفسك بتقولي انا اللي رح اعيش معاه وانا اللي رح انحط في القفص الذهبي على قولتهم واعيش لحظة الفرح والحزن واتحمل وحدي المسؤليه0 بصراحه ما فيا اوجهك برأيي..!!!! لانوا مارح تاخذي الرأي من شخص واقع في نفس الحيره!!!! يكتبلك ربي الخير وين ماكان ويوجهك لصالح امرك

قولي رايك يابعدي
أنا ماطرحت الموضوع رغم حساسيته إلا ابغا اعرف رأي الأخوات
وخاصه المجربات , يقولون أسأل مجرب ولا تسأل طبيب

بآخذ من رايك قولي بس انتي فضفضي
يعني انتي تورطتي خلاص ؟ وإلا زيي ماقررتي ؟؟

وإذا انتي واقعه بنفس الموضوع
ايش اللي ماعجبك بالغربه !
هل الزوج ماساعدك ؟ أو الحنين للأهل يهدّك ؟
أو التوافق بينكم معدوم ؟

احكي احكي وأنا كلي آذان اسمعك
تكفين ارجعي
وقولي تجربتك

مشكوره على المرور والله يسعدك ويوفقك وين ماكنتي

[عذابي غ ــير]

اقتباس:  المشاركة الأصلية كتبت بواسطة شوكولاته بنات     والله مادري وش اقوولك انا بحط نفسي مكانك شوووفي اذا كاان بيتأخر بامريكاا او يعيش طوول عمره هنااك اكييييد برفض امااا باقي الاموور احس عاادي انشالله تربيته عاليه وياما شباب برا اخلاقهم اعلى من الي هنااا انتي استخيري وتوكيلي على الله

ياحبيلك انتي وقرارك الجميل
والله انك صادقه بالأخلاق , مافيه إلا من هداه الله سواء هِنا أو الخارج ..
وبالنسبه لإنضباطه بالقوانين كويس , أنا شاهده على ذلك , اذكر يوم خالي بالمستشفى وجاء يزوره , ضاع مايدري وين غرفة خالي , ويدقون عليه مقفل جواله
بعد جهد وجهيد حصلوه تايهه بالمستشفى
اسألوه ليه مقفل جوالك تعبنا واحنا ندق عليك
قال بكل براءه اول مادخلت المستشفى لقيت لوحه اغلق الجوال واغلقته
اذكر فيه رجال كثير ضحكوا عليه , وقالوا شوفوا تربيه امريكيه

الله يجزاك خير على كم السطر اللي كتبتيه لي
موفقه حبوبه

[عذابي غ ــير]

اقتباس:  المشاركة الأصلية كتبت بواسطة تميميه وافتخر     الكلام بالموضوع طويـــــــــــــــــــــــــــــــــــــــــــــــ ـــــل لانك تبين نتكلم عن ولد ماتعرفين عنه الا امه وعايلته وعن غربه وعن عيشته بغربه وعن حبك لهلك وعن وعن . تراي مقدره لخبطتك لاني زيك جربت الغربه وعشت برا ثلاث سنوات بس بجاوبك باالي اقدر عليه . اولا لاتستعجلين لو قالو بسرعه لاتستعجلين اولا الاستخاره ثم الاستخاره ثانيا اسالو عنه بامريكا تبين تدرين وشلون؟ انا اعلمك.. شوفو هو باي ولايه بعدين روحي لملتقى الطلاب السعوديين باامريكا او عالم حواء للمغتريبات بعدين سجلي واسالي عن رقم مدير النادي السعودي الي بولايته وخلي ابوك يدق عليه ويسال عنه ويقول له لااحد يدري ان الي سالين انتم <<ادري انك بتقولين السالفه طويله بس اسلم لك بعدين تراه ماطلب الزواج الا انه يبي يستر نفسه ويحفظه من الحرام ان شاء الله ثالثا اذا انتي ماتحبين تبعدين عن اهلك لاتوافقين انا ماارتحت الا يوم رجعت والا طول الوقت احس بغصه ومالي نفس بشي تخيلي اتمشى واروح واجي وطول الوقت اتخيل اهلي وخوذي من الصياح واحس انه كل شي ماله طعم تخيلي مااستانس بالديره الا اذا حجزت لسعوديه اقول لزوجي يالله قوه نتمشى احس انه تروح الغصه اذا انتي مثلي متعلقه بهلك لاتوافقين تراك ماراح تستانسين واذا حلمك بالدراسه ادرسي والدراسه مرحه هناك وحلوه بس علته الاختلاط الا اذا انتي عادي عندك وترى الغربه حلوه للي يحب التغيير يعني تعرفين على شي غريب وتعرفين على ناس وتقربين لزوجك اكثر والا التسوق مووووووووووووت يجنن اذا انتي تحبين الاسواق والمعيشه حلوه بالغربه شوفي انا ابختصر لك اذا سالتو عنه وطلع كويس واخلاقه حلوه وترى اكثر المغتربين مايصلون بالمسجد يعني لايضيق صدرك بسبب قلة المساجد واختلاف الاوقات والاجواء المتقلبه واذا انتي عادي تبعدين عن اهلك وحطي ببالك ترى اكثر المغتربين ماعندهم الا رحله وحده بالسنه الا اذا هو منغنغ يجيبك على احسابه كل هوليدي هههه واذا انتي منتي غيوره مره يعني عادي مع زوجك بنات بالكلاس وطقت حنك (اقولك وافقي) يعني ماعندك غيره مره ولا تعلق بهلك واخلاقه حلوه وانتي تبين تدرسين وافقي والله يكتب لك الي فيه الخير وييسر امرك ويوفقك ويهون عليك امورك

امممم عندي غِيره للي أحبهم إلا اذا بيزكني من لحم الخنزير هناك
متعلقه بأهلي
أبغا ادرس , ان شاء الله دارسه دارسه الله لا يعوق بشر هِنا ووإلا هناك من غير شر ..

كأني الحين موافقه مبدأي
حلو ردك
حمستيني للسوق حقهم

وبالنسبه للرحلات فكرت حتى لو هو مارجع انا أخت عند أهلي لحالي
لأن وحده نعرفها تجي وتروح لوحدها مو لازم زوجها معاها , مايجي زوجها الا بالسنه مره

يابعدي المشكله بالغصّه اللي راح تعذبني , وبصير ماده بوزي عليه
ويقول لاعادت ليتنا راجعين لوحدنا وماتزوجنا

السالفه الطويله اللي قلتي عنها , قلت لأهلي قالو صعبه
بس قالوا راح نآخذ ارقام خوياه اللي كانوا معاه يدرسون ونسألهم
لأنهم كلهم رجعوا

موفقه حبوبه
واذا لك رجعه هناك وتم الزواج خلينا نشوفك
<< بتكوّن صداقات من الحين

[طقاقة بدون مايك]

والله مدري :|$


هي صعبة الفتية في هاذه المواضيع :|$




مدري اقول وآفقي أو لآ:|$



فـ آحس الايجابيات و السلبيات متساوية :|$



لذآ أقولتس سوي غربلة غربلة غربلة وتمحيص ...حاولي تحسبينه صح ..جيبها من هنآ ومن هنآك...وبعدين شوفي قلبتس وش يقولتس ..ترا احياننن القلب عنده دبرة و نظرة و فراسة ..و قلب المؤمن دليلهـ:|$



لا تستهنين ب إمر الاستخارة ,,,والسؤال عنه ..احرصي ع الموضوع خلي اهلتس يسالون عنه ..وكلي احد ثقة في هاذا الموضوع:|$


اسألو عنه ...حنا الخاطب عندنا حتى عآمل النظآفة حق حاراتهم نسال عنه وعن أخلاقه و كيفية تعامله ...صحيح أمور كثيرة م تبين إلا بعد العشرة بس يقولون الكتاب يبين من عنوآنه:|$



و ب النهاية لا تخافين كلن راح يآخذ نصيبهـ:|$

[يكفيني حنانك]

شوفي اختي بعد الاستخاره اهم حاجه بالموضوع شيئين:

الرجل ...

والغربه...

الرجل..اذاتأكدتي من صلاته و دينه واخلاقه وافعاله انها غاية المطلوب..

الغربه..بالنسبه لك ولاهلك عادي عندكم تبتعدون عن بعض
فترات طويله..

اذا كانت كلها ايجابيه فتوكلي على الله,,


نصيحه لك اختي الغاليه:

في لحظة اتخاذك للقرار لا تفكرين في اسواق هناك ولابشهادة الماسترو ولا بمتعة السفر وتكوين علاقات..
فكري فقط بالرجل اللذي سوف ترتبطين به وما هي مشاعرك تجاهه وما مدى رضاك به وعنه,,وما هو مصيرك المنتظر معه..واذا تأكدتي من قبولك وارتياحك له وقبلت به زوجا..احلمي بعدها بما تشائين من الامنيات

تقبلي نصيحتي وتمنياتي لك بالسعاده والتوفيق
وان يكتب الله لك الخير اين ما كان

[منبع الحكمة]

اقتباس:  المشاركة الأصلية كتبت بواسطة عذابي غ ــير     جابك الله يا مستشار , خليك قريب مني هاليومين احس اني تايهه حياك الله أوخيتي ... أنت بين أمرين ،،، القبول أو الرفض ... يجب عليك أن تدرسي أمر القبول بعناية ، لأن الرفض يوقفك عن متاعب نفسية وتفكير أنت في غنى عنه .. الحيرة لن تقدم أو تأخر ... س : هل سألتم عن دينه ..؟؟ وهل سألتم عن خلقه ،، أي علاقته بالناس وسمعته وحسن خلقه ...؟؟ هذه أهم شيء وقبل كل شيء ... إذا كان الجواب نعم فأبدأي بالنظر لنفسك هل ستتقبلين الغربة ( مع أنها صعبة ) وهل أنت جاهزة لأي تغيير في حياتك سواء كان إيجابي أو سلبي وأنت بعيدة .... خذي بالأعتبار أن هناك مجتمع منفتح جدا جدا جدا ... وبعدها فكري هل ستقبلين أم لا ...!!! يمكن استطيع ان اعيش بغربه اذا كان هو كويس بنظري وخش مزاجي وحبيته , إذا حبيته والله لو اعيش معاه بالشارع ماعندي مانع الغربة اوخيتي صعبة جدا وخاصة مع رجل لا تعرفين سوى أسمه ومواقف قد لا ينبني عليها معرفة أو وضوح لخلق أو دين ... جميل أن تعيشي مع زوجك على الزينه والشينة ( بالأمور المادية ) ،،، وحتى تفهمي أكثر لا بد أن تفهمي أن الحب يبنى وليس يشترى أو يباع ،،، مما قد يحدد القبول أو الرفض هو الرؤية الشرعية فهي مهمة جدا جدا ... بس انا خايفه من اطباعه اعتقاداته , والخوف هذا طبيعي يجين كل موضوع خطبه اتوتر وتجيني نفسيه أختي أنت حين تتوكلين على الله وتسألين عن الولد زيييييييييييين وتتقبلينه ومن بعدها تختارين ما تريدين ، يعني يجب أن لا يكون هناك إجبار من أي أحد .. وبعدها أستخيري الله فالأستخارة بعد الأختيار وليس قبل ( إذا همّ أحدكم ...)،، وبعدها أقدمي وأنت واثقة من نفسك - هذه مهمة جدا - وأقلمي نفسك أنك مستعدة لتقبّل أي نتيجة تحدث ... فمسؤولية الأختيار لك وأنت المسؤولة الوحيدة عنه نعم مريت بموضوع خطبه صار طووويل ولكن اخر شيء تفركش من طرفي , بسبب كذبه وخدعنا الحمد لله أن كفاكم الله شرّه ،، ومقصدي من السؤال ،، هل مريتي باللخبطة هاذي من قبل أو لا ،، لأننا أحيانا نخاف مما لا يُخاف منه .... بعد هذا الشخص تقريباً كرهت الزواج وموضوع الخطبه , صرت ما أءمن الرجال وخاصه إذا كانوا مانعرفهم , الله يعينك ، المشاعر الملخبطة تحتاج لهوء النفس أكثر وبعدها نحكم ،، أما الحكم مع ثورة المشاعر فهو حكم جائر على النفس ... وتأكدي أن الله سيختار لك الأفضل دام أنك مؤمنة بالقضاء وراضية فيه ... أما هذا الشخص تحمست معاه لأنه فيه ريحتنا , نعرفه نعرف أمه لأن بعد موضوع الخطبه اللي تفرككش كرهت الأغراب وكنت اول ضد زواج الأقارب , لكن الحين الوضع تغير , زياده عليه قبل اسبوع مانقبلت بالماستر وكان حلمي فيها .. ففكرت أحقق حلمي معاه , اضرب عصفورين بحجر أوخيتي ... لعلك تؤجلين الإهتمام بموضوع الدراسة إشوي .. إن جاء مع الزواج فالحمد لله ، وإن ما جاء فالحمد لله ،، المهم لا تحوسين بالأولويات .. فحاولي بقدر ما تستطيعين أن تفكري بتعقّل أكثر الله يخليك ، مهم جدا أن تهدأي وتفكري زييييييييييين << ليس المعنى أني أخوفك ولكن قصدي ودي أنك تفكرين أكثر حتى تتقبلي أن تغيير بنفس راضية .... امممم ماادرري وش تقصد بثقافة زوجيه ؟ هي هي بأمور البيت أو علاقتي مع الزوج ؟ الذي أقصده أنني وكأني فهمت أنك - مدلعة حبة ونص - << مانب قايل حبتين هههه يعني هل أنت فاهمة كيف تديرين بيتك بحكم أنه صار لك زوج ( وفرق بين الأب والزوج ...!!! ) ، وأيضاً هل أنت تفهمين كيف تتعاملين مع الزوج بحكم أنه مختلف تماماً عنك كأنثى ( وليس الذكر كالأنثى ) طريقة تفكيره ، همومه ، عقله ، ماذا يؤثر عليه ، الجنس ، الغضب ................. ، وهل أنت تقرأين كتب عن الحياة الأسرية ..؟؟ وأيضاً لا بد تفهمي أنه لك حقوق وواجبات قبل وبعد الزواج ... أانا اذا ارتحت مع الشخص على طول اتأقلم معاه , واكون صادقه وأحافظ عليه , وأطور العلاقه للأفضل ماشااااااااء الله أهنيك بنفسك ،، بس هالطريقة مو دايم تنفع ، يجب أن يكون بينك وبين الناس ومنهم زوجك حدود لا يتجاوزونها ... طبعا ً هذي بأمور الحياة فما ادري العلاقة الزوجيه زيها وإلا غير ! إذا فيه أسئله ثانيه أنا حاضره .. وعادي اسأل باللي تبي وشكرا ً لرجوعك الليله , وأنا بإنتظارك ..

أوخيتي الحياة الزوجية تحتاج للكثير ولعلك تمرين على هذه الروابط


http://www.buraydh.com/forum/showthread.php?t=223005


http://www.buraydh.com/forum/showthread.php?t=275006

وضروووووووووري تقرأي كتاب ( شريك العمر ) أ. عبدالله المديفر

ولتحميله من هنا

http://www.saaid.net/book/open.php?cat=6&book=4631


وهذا رابط مهم للغاية

http://www.saaid.net/mktarat/alzawaj/120.htm



وأي سؤال أنا حاضر ....

[هجير أمنيه]

اقتباس:  المشاركة الأصلية كتبت بواسطة عذابي غ ــير     قولي رايك يابعدي أنا ماطرحت الموضوع رغم حساسيته إلا ابغا اعرف رأي الأخوات وخاصه المجربات , يقولون أسأل مجرب ولا تسأل طبيب بآخذ من رايك قولي بس انتي فضفضي يعني انتي تورطتي خلاص ؟ وإلا زيي ماقررتي ؟؟ وإذا انتي واقعه بنفس الموضوع ايش اللي ماعجبك بالغربه ! هل الزوج ماساعدك ؟ أو الحنين للأهل يهدّك ؟ أو التوافق بينكم معدوم ؟ احكي احكي وأنا كلي آذان اسمعك تكفين ارجعي وقولي تجربتك مشكوره على المرور والله يسعدك ويوفقك وين ماكنتي

حياتي ربي يوفقك حاسه فيكي...

انا ما جربت لساتني على بر مثلك
واقاسمك نفس الحيره من ناحية الغربه .. واذا سألتي قالوا حياتك وهنا يزيد همك 0
خذي وقتك وفكري واعطي نفسك الحريه في الرد متى ما حسيتي انك جاهزة اتخذي القرار وموضوع الدراسه انسيه ولا تربطيه بموضوع الزواج ابدآ
ربي يكتب لك ولي الخيره

ربي يوجهك للخير حياتي ويسعدك 00

[عذابي غ ــير]

اقتباس:  المشاركة الأصلية كتبت بواسطة غ ـروووب     ولا صار تربيته امريكي بالعكس وناسه اكثر ماعندهم تعقيد القصمان اذا ما تبينه جيبيه ولك اجر بعد

وناسه صادقه
عاد التعقيد ما أدانيه بعيشة الله

ياحبيلك اجيبه لك اذا صادقه تبغينه
اهم شيء نوفّق راسين بالحلال

بس انتي مخلصه جامعه ؟
وإلا تكملينها بين هالشقران خخخ

ياحبيلك تسلمين ع المرور