الشفــــاحـــة مــاركــة بــريـــداوية مســـجـــلة !!

[لمبة شارع]

[align=right]طلعت من المسجد ذات بعد صلاة العصر

هو
هلااااااا لمبةوشلونك عساك طيب وشلون الوالدة !!!!!!!!!!!!!!

وقبل ان اجيب

هو
اقول لك لمبة !!!!هذيك السيارة اللى عند بابكم منهي له؟؟؟!!!

انا
ايه !!!! هذي لخوي عنده من سنة

_اييييييييه زاد اشوفه يركبها ويسوقها وهو طالع من بيتكم ...اثرها له!!! طيب لمبة الله يخليك ابيك تسأله منين ياخذ المناديل هذيييييك اللي فوق الطبلون من اي محطة شكلها اصلية وناعمة..!!

_طيب اذا لقيته اسأله واعلمك...


_وبعدين ياخي قل له ترى ولد اللامي قاعد فوق كبوتها فوق ربع ساعة ايو الله حاسب له بالدقيقة مانزل لين امه نادته قالت له: خلودييييييييي خلوديييييييي تعال تغد حبيبي قال لها :مابي مابي... عاد هي قالت :تعااااال غدانا شاورمااااااااااا عاد ترى هي صادقة امس شايفها عند الكاشير في بندة اخذت ثلاث اطباق صدور دجاج وكتشب وهذاك الصامولي الكبير اللي حبتين بريال حتى عطت الكاشير ميه ورجع لها ثمانية وستين وكم هلله مادري كم ماعديتهم ...!! شف الخبلة عاد من صدق هي تبي الولد هذا ياكل ذيك الصامولية صدق ماعندها سالفة

وفي هذه الاثناء وصلنا الى بيتنا فقلت له..:

_هاه ياجار تفضل خل نكمل سالفتنا مع الشاهي !!

_ما اقدر يالمبة متواعد انا وواحد نبي نروح نشوف السيارة اللي امس صارعليها حادث بالشارع العام ياشيخ سواقها خبل قاعد يناظر لوحات المحلات ومخلي سيارته!!!! ياملا العمى ناظر طريقك وش العالم المشفوحة ذي!!!! بس عاد اقول لك لمبة تكفى هذاك السلك اللي طالع من بيتكم للسطح وشهو له !!!هو حق قناة المجد؟؟!!

_وين ؟؟ هذا!!!

_ لا ياشيخ هذااااااك... الثاني الاسود اللي بجنبة هذا اعرفه حق لمبات عرس اخوك ماجد ومخلينه لين عرس اختك منى بس الثاني هذا هو اللي عجزت ادري وشو له!!!!

_ايييييه....هذا الا هذا حق قناة المجد

_ طيب يامال الغنيمة ليش الهندي الملعون ماحط لكم سلك اصلي هالحرامي !!!! رح لمه وكفخه وخذ فلوسك لا تصير مغلابه مثل تركي العادي جاب حق موية الصحة يعبي لهم وراح ما ملا التانكي...


_ وانت وش يدريك انه ما ملا التانكي!!!؟؟؟


_ افا عليك يالمبة واضحة ياشيخ .... بالعادة الما يذرف من التانكي ويمشي من تحت الباب هالمرة تحت الباب مافيه شي نااااااشف واضحة ياشيخ!!!! لعب عليهم الهندي الحرامي... وبعدين قل لخوك يعبي كفر ورى يمين ترى هواه ناقص شوييييييييي لا يقعد يبنشر عليه وتلقا مامه عفريته ذاك اليوم شايفه يعطيها جارنا ابو راشد وشكله مارجعها الين هالحين....


وفي هذه الاثناء صعد جارنا الاشهب فوق المطب الصناعي اللي في الحارة فما كان مني الا ان اتحماله واشوته مع مؤخرته واقول له ..:

والله ما اعلمك منين اخوي يجيب المناديل اللي فوق الطبلون !!!خليك منلعن !!!وبعدين لاشفتني طالع من المسجد ثاني مرة اوعى توقفن وتقول هلااااااااا مادري وشو وشلون الوالدة!!! انقلع لا ابوك لا ابو الشهبان...[/align]

[راشد الصليحان]

لمبة ! حياك ربي حياك

يوم سمعتك جيت أركض من هناك ...!!

لعنبو بليسك وين أنت ؟؟

أنت مادريت ؟ فااااااااتك ؟

أبو الصنيجان...طالع من بيتهم أصلع لابس قميص

مايستحي من الحارة ...ولايدري أنه عيب !!

لا وفااااتك !! تصدق أنه مايفهم !!

البلدية وزعوا بالحارة براميل جديدة بلاستيك ...!

الخبل مصدق حطه برميل أزبالة ...!!!!

مليت وانا أنصحة أقول خله عندك بالبيت للطحين !!

أولأبوكاس ...بس ماسمع كلامي ..!! وش رأيك ؟؟

على نياته ,,,!!!!

[لمبة شارع]

[align=right]ياشيخ ابو صنيجان طباقة قايل لك من زمااااااااااااان....

غبي مايفهم!!!! ذاك اليوم عنده عزيمة ومولع انوار السور واقول له : وشوووووله!!!!!!! بس اسراف !!! هالحين الضيوف بيقعدون بالشارع!!!! رح طفها يامال الغنيمة يالدبشة لمبة الشارع تكفي(يقصدني طبعا)...

وراح ولا كأني اكلمه!!!! اجل ولده باع سيارته يبي يغيرها وهوماله الاسنتين شاريها!!!! شف انه كربه... وتقول لي سطل زبالة وطحين مدري وشو..!![/align]

[ابو هليل]

[QUOTE=راشد الصليحاني]أقتباس من رد أبو هليل



أخي العزيز يفترض أن نتعلم تقبل النقد الســاخر حتى لوكان على أنفســنا...!

لذلك أتمنى أن توسع صدرك علينا ....! وتكون معنا .(بالسويليفات ) البريداوية !

دعواتي


أخي راشد

أنا لم أنكر أن هذه العادة موجودة في بريدة .... بل هي موجودة ولكن ليس لدرجة أنها تكون الصفة التي يعرف بها أهل بريدة في كل مكان ......

عموما حبي لبريدة وأهلها يمنعني من المشاركة الإستهزائية .....


ودمتم سالمين

[راشد الصليحان]

تصدق يالمبة ...!!

بالعطلة اللي راحت ...رحنا لمكة ..!

وقعدنا عشرة أيام ...!

سكنا بالشامية...لقينا شقة يحبه قلبك

آجار اليوم...ميت ريال ...!

صليت باحرم وأناطالع لقيت ابوفلجة ...وعياله

سلمت عليه وقلتله وين سكنتوا ؟؟؟

قال بالشبيكية ...!

قلت له كم أجار شقتكم ...قالي ميتين باليوم ....!!

والله ياهو مهكاكة ...!

مايعرف يكاسر ويختار...!

المفروض يجي مع أهل الديرة ...!

يا أخي أستانس لمني شفتهم بالشامية ...وهم طالعين من الحرم

تشوفهم كلهم لابسين ....قمصان..!

آخذين راحتهم بمكة ما أحد يقولهم عيب !!

,,,,,,,,,,,,,,,,,,,,,,

لاحظ يالمبة ,,,, لبس القمصان بالحرم ...مايخالف

وبالديرة وعند الجيران عييييييب ...!!

عجبي ,,,

[راشد الصليحان]

أقتباس من رد ابوهليل

اقتباس: أخي راشد أنا لم أنكر أن هذه العادة موجودة في بريدة .... بل هي موجودة ولكن ليس لدرجة أنها تكون الصفة التي يعرف بها أهل بريدة في كل مكان ...... عموما حبي لبريدة وأهلها يمنعني من المشاركة الإستهزائية .....

أخي العزيز ...أعترافك بوجود هذه العادات ...!

هو الذي يدفعني لنقدها ...بطريقة ســاخرة

ورغم ذلك....أحب بريدة ...وأهلها حتى الثمالة

دمت بخير ,,,

[لمبة شارع]

راشد ....

يبدو ان صديقنا العلقم ينتمي للفئة اياها ولذلك اختفى فليس له اثر !!!!

يبدو ان موضوعك هذا قد اصابه في مقتل!!!!

لماذا يا راشد تحرج بعض الناس؟؟

انت ياراشد اشهب من نوع خاص الله يكفي العلقم شرك!!!

[راشد الصليحان]

يابو اللمبات....!

الشهابة...يقول عيون الصقر ...عند اهل الخبوب ...!!

اما الشفاحة....عندأهل الديرة...!!

وبين الشفاحة ....والشهابة...وياقلب لاتحزن ..!

,,,,,,,,,,,,,,,,,,,,,,,

على فكرة تعال نكمل يالمبة ...!

ماقلتلك...عن صانج الصنيجان...؟؟

ولد جيراننا...!

والله ياهو مسكين ...يحول...!

تدري وش شرأ من سيارة ؟؟؟

أخذ بيوك ماله شعبية ...ولونه عنابي ...!

لويجي يبيعه ماتجيب له شيء !!

أقول له الخبل خذ هايلوكس غمارتين...لونه أبيض

على شان تجيب قيمته عند البيع ..!

ويقول لا...ودي أشخص ..!!

ياخي وش هالعالم المهاكيك ...؟؟؟؟

[ابو هليل]

اقتباس:  المشاركة الأصلية كتبت بواسطة راشد الصليحاني     أقتباس من رد ابوهليل أخي العزيز ...أعترافك بوجود هذه العادات ...! هو الذي يدفعني لنقدها ...بطريقة ســاخرة ورغم ذلك....أحب بريدة ...وأهلها حتى الثمالة دمت بخير ,,,

أخي راشد
لا أحد يغضب من النقد وليس هناك أحد فوق النقد
ولكن ليس بطريقة ساخرة ......

عموماً أنا من أكثر المتابعين لمواضيعك التي كثيراً ما تشدني وتجبرني على قراءتها ولكن في موضوعك هذا أحسست أنك تغيرت ....... مما جعلني أعتب عليك بعض الشيء ....

والعتب من المحبة كما يقولون ............


ودمت سالماً معافا إن شاء الله

[محمد الهويدي]

اقتباس:  المشاركة الأصلية كتبت بواسطة راشد الصليحاني     تصدق يالمبة ...!! !!!!!(((صليت باحرم وأناطالع لقيت ابوفلجة ...وعياله سلمت عليه وقلتله وين سكنتوا ؟؟؟ قال بالشبيكية ...! قلت له كم أجار شقتكم ...قالي ميتين باليوم ....!! والله ياهو مهكاكة ...! مايعرف يكاسر ويختار...! المفروض يجي مع أهل الديرة ...!)))!!!!! يا أخي أستانس لمني شفتهم بالشامية ...وهم طالعين من الحرم تشوفهم كلهم لابسين ....قمصان..! آخذين راحتهم بمكة ما أحد يقولهم عيب !! ,,,,,,,,,,,,,,,,,,,,,, لاتنهى عن خلق وتأتي مثله .. عار عليك إذا فعلت عظيم هاأنت بكلامك هذا تتزعم الشفاحة وتدعو لها بفضوليتك وتسوق لها من خلا سؤالك زميلك فلجة وين , وكم , وليش ,,,

[الذاهبة]

تنويه :

قبل الدخول إلى هذا الموضوع ..

اصطحب معك مترجم فوري لفك شفرات اللهجة البريداوية الأصيلة

+

لابد من اقتناء نظارة و طاسة حامية للرأس .. منعاً للإصابات اثناء التراشق الحاصل ..

[راشد الصليحان]

ابوالهدد

مــرحبـابك ...ولأنك مافهمت الســـالفة

ومن اللي يقول هذا الكلام ....أعذرك !!!!!

,,,,, لمبــــة ....وينك تشوف ربعك !!


,,,,,,,,,,,,,,,,

الذاهبة اللهجة البريداوية ...لذيذة ومميزة

كانت بالسابق (( تفشل ))

والآن كل المناطق يقلدون القصمااااااان !!

تدرين ليش ؟؟؟

لأنهم أهل للتميز بكل شيء ...حتى بالشفاحة !!

..........

اما التراشق ....لايوجد ...تراشق إلا بقشور البردقااان

مرحباَ بك ,,,

[لمبة شارع]

اقتباس من تعليق الاخ ابو الهدهد على رأي راشد الصليحان,,,,,,,,,,,,,,,,,,,,,,

اقتباس: لاتنهى عن خلق وتأتي مثله .. عار عليك إذا فعلت عظيم هاأنت بكلامك هذا تتزعم الشفاحة وتدعو لها بفضوليتك وتسوق لها من خلا سؤالك زميلك فلجة وين , وكم , وليش ,,,

ابو الهدهد الغالي

تحية طيبة ....

راشد لم يمارس ما ينهى عنه هو فقط يتقمص الشخصية ليعرض صورة من صورها كنوع من التغيير للكلام الانشائي المثالي الممل !!!

هل تريد عشر صفحات كلام منمق وكله مثاليات كذابة !!!

هل تريد ان تنظر الامور بعقلية..: ارفع راسك انت بريداوي غيرك يمرض وانت تداوي!!!
على طريقة ارفع راسك انت سعودي غيرك ينقص وانت تزودي!!!


كل الذين مروا من هنا ولم يمتلكوا الروح الرياضية الكافية لنقد الذات يعيشون داخل سجن الخوف من العار!!!

هل تشعر بالعار؟؟؟

يا ابوالهدهد افتح النوافذ دع الهواء يمر !!!
البحيرة الراكدة يأسن مائها...
حرك فيها زوبعة تجدد فيها الحياة
عندما تمارس الصراحة تزيل القلق وتبدأ الحياة...

اخرج من عقلية القناة الاولى!!! (كل شي تمام.. كل شي اوكي.. حنا احسن ناس.. مدري ايش)

لاتهتم لاطار الصورة صدقني ليس له قيمة الاعند الذين يعلقون الصورة من اجل اطارها الجميل

هذا الكلام ليس لك وحدك يا اخي لحفيد عقيل الغالي مع التحية وابو هليل الغالي مع التحية

تخلصوا من كرب الوجه والتجهم !!!فكوا اللطم ياناس!!!
هل تريدون راشد الصليحان ينقد سكان فلوريدا!!! او كفر الشيخ!!! او بكين!!

رأيكم على العين والراس انتم تمثلون شريحة وهذا رأينا!!!

لن اخاف ان يضحك مني عسيري او مدني او سديري او حساوي ...بالمناسبة مافيه شي اسمه رياضي واللي يقول الافيه ميخالف فيه ...

عندما يضحك مني هؤلاء فلن ينتهي العالم!!! وسأعرف اين اجد عور الاعور!!!

[راشد الصليحان]

هي تلك النماذج !!

لا لوم ولاتثريب عليهم ...! يالمبــة !

لايدركون حقيقة النقد ...!

دعهم فقدعاشوا بين جريدة الرياض والرياضية والجزيرةوالقناة الأولى !

وفي مجتمع يرسم حوله سياج من التميز ...غير القابل للكسر !!

دعهم ...فقد يأتي اليوم الذي فيه يدركون !!

دعواتي للجميع ,,,,

[امرؤ القيس]

اهلا بالجميع 000

مازال الاخ راشد والاخ لمبة شارع والاخ عيون الصقر يدورون بنفس الدوار ولا يعرفوا بداية او نهاية هذا الدوار ويحاولون رمي التهم التي لبستهم والصاقها بغيرهم لعلهم يرتاحون وهذا لا يتأتى الا بشيء واحد وهو الاعتراف والاعتراف فقط بحقيقتهم هم 0

هذا الموضوع تم طرحه بصيغة اخرى ولكنه مكرر من مواضيع سابقة وكأن الاخ راشد اتى بما لم يأت به الجهابذة من مواضيع وطرحها للحوار 0

مازال بعض الاخوة ينتقص الآخرين بصورة مقززة دون خجل وكأنه ابن بطوطة او ابن ماجد قام بزيارة للعالم ولم ير تلك الصور الا عندنا او لدى اهل الخبوب على رأي بعض الاخوة ,

الاخ لمبة شارع هو الآخر مازال لديه الكثير من الافلام في جعبته واتمنى ايجاد قسم لافلامه حتى يتحفنا بها وياليت يسمى هذا القسم ( هوليود لمبة ) تناغما وتماشيا مع عبقريته التي يمتلكها 0

المشكلة ليست بنا نحن اهل بريدة او اهل الخبوب ان المشكلة فيكم انتم يامن تخليتم عن ابسط قيمكم وذهبتم لارضاء شلة سواء في الرياض او الشرقية او في الحجاز او حتى في جيزان التي يعيش فيها الاخ لمبة شارع واظنه مازال هناك وتطبع بقيمها الجميلة كوضع الورود على جنبات الشعر ولبس الوزرة واشياء اخرى جميلة بجمال افلامه التي لاتنتهي 00

ان طرح مثل هذه المواضيع لانتقاص الناس وسلبهم حقوقهم بحجة انهم مدعاة للخزي والعار وكأن كاتبها او بعض المتحاورين لديه شهادة في التنقيب عن عيوب الآخرين !! وبهذه الصورة شيء ليس ذا قيمة

لن اقول لكم مبروك على ماطلعتم به من نتيجة لانكم اي شلة الانس مازالتم تحلمون بالوصول الى ماوصل اليه هؤلاء ولكن ( فاقد الشيء لايعطيه ) وانتم فقدتم ابسط الاشياء في سبيل الوصول للقمة !!

الشيء الوحيد الذي حققتموه هو اسعاد من حولكم من فاقدي الحقيقة ولو عرفوا حقيقتكم لربما صرتم اضحوكة المجلس 0

لن استرسل بما نملكه من قيم او عادات او تقاليد لانني مبحوح من كثر ما تكلمت ولكن لم يفد لان الوقر مازال على آذانكم فما الفائدة !!؟

ومن هذا المقام اقول لكم لن يزيدنا كلامكم الا شرفا لآنني اعرف المتحدث من يكون !!!؟

وكما قال المتنبي :

اني وان لمت حاسدي 0000 فما انكر اني عقوبة لهم