من منا لا يحب أمه...؟؟
من أجمل ما كتب عن الأم ..؟
خاطرة الخواطر... رائعة الروائع ... بكل هدووووء استريحوا معي بهذي الأسطر الذهبية
يمه أنا ودي أقول للناس
عن الشيمة عن الحسرة عن الإحساس
يمه أنا ودي أقول للناس عن الشيمة عن الحسرة عن الإحساس
عن العمر اللي ملاه اليأس
أنا ودي أضحكهم ابكيهم أحكيهم
عن الدمعة وليل الخوف عن القصة حروف ، حروف
عن جروح تسافر بي وترقى ثم تحول بي مثل غيري من الأجناس
وأنا عمري يقول .. يمه
وأنا فرحي يقول .. يمه
وأنا جرحي يقول ..يمه
اذكّرهم أفكّرهم
اسولف عن جروح وليل ... احبك ياغلاتي حيل
اذكّرهم وأنا توي صغير مرقدي صدرك
لهاثي يجمعه صدرك
ضحكي مبعثه صدرك
وزادي منبعه صدرك
واداري الجرح في صدرك ...
تربينا على كلمة
تجمّّعنا على كلمة
تحابينا على كلمه
وزاد ناكله بصحاف .
وحنا مثلنا آلاف ...
تلمّي القرش فوق القرش
نبي نشري ثياب وفرش
نبي نجبر خواطرنا
ورب الكون يسترنا
تقولي للولد منا
أبيكم للزمن رجال
أبيكم فارس وخيّال
أبى لاصاح فيكم جار
يبيكم والزمن جوار
تفزوا له صغار وكبار...
أبا اشرح بعض قصتنا
وكل الناس قصتنا
ليا أذن مطوعنا
يجي صوته بمسمعنا
تصيحي تقولي يا ولد صلوا
توضينا تصابحنا وصلينا
رفعنا للسماء كلمة تصعدها بواكينا
وبعد نص الملا ما فاق
ألا يا كاتب الأرزاق
ألا يالله تهدينا ...
انا اعرف إن الجروح إكبار
واعرف إن الزمن دوار
وأنا اذكر وش تغدينا
وما به شيء بأيدينا
أنا اذكر يوم صار العود
على كيفه وتباكينا
أنا بإذني سواليفه
وممشانا على كيفه...
أنا اذكر طفية الفانوس
وأنا اذكر لدغة الناموس
وطعم الرز والمعدوس
ولآبه شرح أو قاموس
أنا
اذكر أول بجامه وثوب مشترى للعيد
وأنا اذكر أول عمامة وفرحة خالتي بالعيد
أنا اذكر يوم مابه شيء
بعدنا ما عرفنا شيء
ودمعات الفرح منك
تعبر بالفرح عنك
عيالي يا هنا قلبي
تعالوا خلكم قربي
أنا اذكر شايبي المرحوم
اشوفه مرتكي لليوم
يصيح بنا يعذبنا عيالي ولموا الدلة
أناظر وافتزع يمة أعطيني البيز يايمة
تسمي ثم تقول لي ترفق لا تطيح يمة
ولا من قعد رآسة
تمدد صابه نعاسة
زعق فيني علامك ما تغطيني
أقول ابشر أحس البرد
وازيده من بطاطيني
أ نا اذكر خالتي حمدة ومقيولة ومستورة
اسامي تمتلي صورة
أنا اذكر حمسة المحماس
وأنا اذكر دقة المهراس
وأنا اذكر مامة الدافور
وربعي وخاطري المكسور
أنا اذكر حارتي تبكي
بعضهم يشتكي جوعان
وأنا اذكر دخلة الضيفان
وخالي وعزوتي جمعان ..
أنا اذكر صيحة العسة
ووجوع الليل مندسة
تبي تدفا على الكانون
ولابة حضر أو قانون
ولا به رأفت الهجان
وان اذكر موضة القيطان
وصوت العنز واللبان
رواية في زمان كان
أنا اذكر يوم قالوا عيد
وأنا عيدي بزنوبه
وأنا احفظ صورة الإخلاص
وأرتل سورة التوبة
أنا اعرف حظي المسكين كبار القوم هجوا به
وأنا احلف لو بيارقنا على التاريخ منصوبة
يباريني نزيف الجرح ويسأل وين ودوا بة
أقول لة وش تبي يا جرح تبي تاخذ علي نوبة
تبي تحرس معاناتي وكل الأرض مقلوبة
تبي تسكن على قبري وأنا المدفون في ثوبة
وعمي مات في بيتة وخالي قد تغدوا به
وانا جرحي يسافر بي وليت الناس حسوا بة ..
انا اذكر كل ذا يمة
انا اعرف حاجتك يمه
انا اذكر جرحنا يمة
انا اذكر يوم سقيانا من الزفة
انا وعيالك ملتفة
نبي ندفا من الكانون
نبي نشرح وجاع عيون
نبي نملا جياع بطون
نبي نصرخ ونملا الكون
انا اذكر كل ذا مدفون
تبين الصدق يايمة انا بذاك الزمن مجنون ...
عرفت اشلون لاصحتي
احب رأسك
عرفت زين لاصمتي ولا فطرتي
ولا باعك بعض ناسك
انا اذكر يوم نتبارى
ولا حدن موذي جارة
ولنا قانون بالحارة
يفسر قصة الدنيا
غريبة قصة الدنيا...
الايالغالية وينك
تلميني من احزاني
تدليني لعنواني
تشوفي وين جرحي صار
وانا ويني ووش جاني ... انا يمة غريب ببيت
تدور حرقتي عن بيت
اداري الآة بكلمة ليت
واجفف دمعتي بياليت
وال منى نصيت القوم
يجيني ردهم ياليت ...
انا يمة اسير هموم
ولولآدعوتك ما قوم
جروح الناس خلتهم
وانا جرحي معي لليوم جروح الناس عافتني
وانا كن جريح اليوم
هموم القوم في صدري
وانا همي نساة القوم ...
انا يمة وكم مثلي
غريب غربتة بيتة
زماني راح من عيني
وأحسب اني تعديته
تشوفي من انا بغيرك
ومنهوا حبني غيرك
ومنهوا اعشقه غيرك
ومنهوا افقدة غيرك ....
تشوفيني أدور لك
أدور بعيد أفتش في ثياب العيد
اردد آهاتك أعيد
بغيرك وش يكون العيد
انا منهولياراحتي
وكم من جرح كم شفتي
انا يمة تمنيتك
خذيني عمري وعشتي
انا يمة بعد صدرك
أدور في زمن قاهر
أدور عن لبن طاهر
أدور عن فرح ظاهر
أسامر حزنك الساهر
على جفني وليل صار يعرفني
يعذبني ويسعفني يهاودني
يكتفني يوديني ويجرفني ...
انا يمة أعيش بجرح ليا لديت يزهمني
وإذا ما غفيت يدهمني ولابه حد يرحمني سكوتك بس يفهمني ....
العرض المتطور
