اهـلابـكم بالمقـهى الرمضـاني للحـوار المفتــوح !!

[السعلوووه]

اقتباس: لان يوم الثلاثاء من كل اسبوع انا الطباخ بالبيت واغسل ومافيها شيء ولاعندنا شيء لا شغالة ولاغيرها

هو خبرت الرجل له يوم يسبع ويطبخ ياعموري >>>>شكت انه من لبنان خخخخخخخخخخخخخخخخ

والله مشالله عليك سنع .........

[الذاهبة]

الله يا سرع الأيام ..

ليالي رمضان مسرعة مسرعة

ربي يشرفه و يبارك لنا فيه

و يعيننا على صيامه و قيامه

+

تخيلوا لو الطبخ على الحريم

و تسبيع الصحون على الرجال .. !!



والله لاتفنن يومياً بما لا يقل عن 30 صنف .. من المأكولات العربية و الغربية

و ألذ الأطباق المالحة و الدسمة و السلطات و الحلويات ..


ياشيخ يومياً أطبق كل وصفات بنت الجهيمي تطبيق ..



بنات

من ماعندها كتاب أمل الجهيمي ؟؟

خخخخخخخخ

فشلة أحس كل البيوت صارت تقدم نفس الأكلات !!

صح ؟!

[:: ابعـاد ::]

على طاري الطبخ

عندي عجينة فطاير انما ايه خلطه سريهـ

اتحدى الأرياف يسوي مثلها


إذا تبون المقادير قولوا

*****************************

من العدل والإنصاف انه يوم حنا نطبخ والرجال يسبعون

ويوم هم يطبخون وحنا نسبع


والله ماغير جيدين بالأكل وإذا خلصوا انقدوا

عاد بعضهم مو كلهم لايزعلون علينا هاالحين وش يفكنا من السنهم

[راشد الصليحان]

بالنسبة للرجال وبالتحديد أهل الإستراحاااات

والله وناستهم الأكل بالإستراحة مع الشلة

كبسة ومندي ! وقارورة بيبسي ! وعشرة للقطية !

ويمدحون الطباااخ ! عاشت أيااامك يابو فهد على هالكبسة !
وبعدين ماتدور المناقيش ! وماتسمع إلى (التغااار ) !!

وإذا راح للبيت ماعاااد يبي الأكل مع الأهل والمعزبة !!

وهذي حياتهم ,,

[لمبة شارع]

اقتباس: على طاري الطبخ عندي عجينة فطاير انما ايه خلطه سريهـ اتحدى الأرياف يسوي مثلها إذا تبون المقادير قولوا

أبعاد ...

تكفين قولي خلطة عجين الفطاير اللي احسن من حقة الارياف ..!!

والله مع ان المعزبة طباخة خمس نجوم وأكلها من اروع ما يكون بس عجزت تصيد العجينه .. بالبيتزا تطلع معاها احسن من بيتزاهت

لكن بالفطاير تطلع يابسة ولا انتفشت عطينا اللي عندك خلي اوريها هذاها عندي ...

[:: ابعـاد ::]

اقتباس:  المشاركة الأصلية كتبت بواسطة لمبة شارع     أبعاد ... لكن بالفطاير تطلع يابسة ولا انتفشت عطينا اللي عندك خلي اوريها هذاها عندي ...

اخاف تدعي علي

بس يالله الدعاء على قد الظلايم




اهم شي لاتفردها مره كثير من اللي مايتقنونها صح يكون الخطأ الوحيد عندهم هو شدة الفرد

يعني خليها نصف سم ولاتكثرين الزيت العدو اللدود للفطاير

المقادير /

فنجال حليب

بيضه واحدهـ

بيالة زيت

نصف ملعقة ملح

فنجال سكر مطحون

كأس ونصف ماء دافي

نصف فنجال خميره

ثلاث اكواب دقيق

** ملاحظهـ ** الأكواب اللي تقيسين فيهم الدقيق نفسهم قيسي فيهم المويهـ

[السعلوووه]

لمبه لزينته قصدي المعزبه زينته علمنا النتيجه ..
ابعاد متاكده زينه اخاف احوس وادوس والنتيجه عجينة يابسه..............




ايه على فكره رحت لعزيمه اليوم وذقت لقيمات بالجبن ماعمري ذقت مثل هشاشتهن .....

وخبز عراقي لونه اخضر يجنن .........

قسم اجعان بطني من الاكل مدري وش نبدي عليه

والله اسراف ,,,,,,,,,,,,مير الرز واللحمه ماله كرت الناس ماغير يهبدون بالمعجنات ...

ولا عاد نافورة الشكولاته الى طيحين به ....... من منكم شافه او سمع عنه...........

الحريم ماغير يخترعن ...



شفتو ازين من نخبة الاطباق

تشاواااااااااااااااااااات

[:: ابعـاد ::]

اقتباس:  المشاركة الأصلية كتبت بواسطة السعلوووه     لمبه لزينته قصدي المعزبه زينته علمنا النتيجه .. ابعاد متاكده زينه اخاف احوس وادوس والنتيجه عجينة يابسه..............

مو ابعــاد اللي تطلع عجينتهـ يابسهـ

امزح

بس بشرط لاتفردينه بالزيت افرديه بالدقيــق


.

[عيون الصقر]

بعض الناس قاموا يشيلون ويحطون بالمطبخ لا وبعد يميزون بين اليابس والرطب والمنتفش

[لمبة شارع]

اقتباس:  المشاركة الأصلية كتبت بواسطة عيون الصقر     بعض الناس قاموا يشيلون ويحطون بالمطبخ لا وبعد يميزون بين اليابس والرطب والمنتفش

اترك عنك بس حكي العيارة والتطنز ..

أجي من الدوام مع المغرب القاها فالتن لي سفرة تكفي عشرة فيها مالذ وطاب جعلي ما اعدمها ...

متى تبي تجيني وتفطر عندي عشان نجرب فيك خلطة ابعاد السرية تراها ملصقة على جدار المطبخ من اليوم العصر

والليلة ان شاء الله البروفة الاولى

[الذاهبة]

ولا مسلسل زي الناس

ولا برنامج يفتح النفس

واااع عليك يا مناحي ( فايز المالكي ) واااع وش هالقرف !!

موسيقى المقدمة حقت البرنامج تجيب لي الصيحة ..


مممممم

عيال المنصور فكونا من خشومهم .. هالسنة

و سعاد عبد الله مالها طاري

مممممم


طاش ما يستاهل من يتابعه

حروف و ألوف خبل داج

أبو الهش .. هشوم .. ياربيه سخيف و أسئلته بايخة

مسلسلات تاريخية تجيب الهم ... إخراج ضعيف

الكويتيات لوعوا كبودنا بـ براطمهن ..

زينب العسكري ماصاء الله هي و قصصها اللي زي البلا هالقروية ..

ممممممم



ليه كذا

ماكو شي نتابعه

[لمبة شارع]

اقتباس: الكويتيات لوعوا كبودنا بـ براطمهن ..

تخخخخخخخخخخخخخخ




هالسنة ياذاهبه نسموهن !!


العام البراطم تقل صامولي



هالسنة صامولي ... بس من دون خميرة




....................

[الذاهبة]

مير فيه وحدة مسكينة

مادري ماعندها أهل ينصحونها .. !!

تخرررررررع .. والله تخرع

ذكرتني بوجهي يوم طلعت من الحادث

الله لا يعيده




الشي إذا صار تو متش .. إنقلب ضده

+ ياشين السرج على البقر .. !

[راشد الصليحان]

بصراحة أشوف المقهى ...فاضي من الزوااار في هذه الليالي

ويبدو أن الأخواااان متجمهرين حول موضوع حساااس موضوع الحب وتبعااااته !!

[فور يو]

تعال اخوي راشد و بقية مرتادي المقهى بقولك سالفه حصلت البارح ...

كنت معزوم على الفطور عند احد الأصدقاء , قبل وقت الإفطار بدقائق ذهبنا الى المائده , كان من بين الحضور


شخص سمين (( دبا بزياده )) .. افطرنا وكان من ضمن الإفطار مقبلات كالسمبوسه واللقيمات والحلى وما شابه

اضافه الى الشوربه ...

المهم اخونا في الله السمين اخذ يأكل وبشراهه كل ما وقعت عليه عيناه ...

اانتهينا من الإفطار قام البعض , اما اخونا السمين توقعوا ماذا فعل ..؟!

استلقى على ظهره ولم يستطع الوقوف ...

قلنا له ولماذا , قال شبعت وعندما اشبع عاده في رمضان استلقى على ظهري عدة دقائق اراجع انفاسي وبعدها

استطيع الوقوف ...

انتهى ...

اخواني الدببه , اخواتي الدببات ( هاه تصلح الدببات هههههههه )

شهر رمضان فرصه لكم في تخفيف اوزانكم ,لا تفرطوا فيه ...