(
سالفتي مع الضرس ) ..!
من الأشياء اللي أكرهها . هي وجع الضرس أو مراجعة طبيب الاسنان لحشو أسناني .. أتذكر قبل
سنه . بدأ ضرسي يوجعني ..
كل ماكلت شئ ينشب بالضرس ههه .. المهم وكنت أنا متردد أقول أروح لطبيب الأسنان أو لا . علشان أخلي يسوي لضرسي حشوه . عاد ما بين أروح أو ما أروح .. أذا وصلت لمستوصف الأسنان أوقف سيارتي . عاد أذا جيت أنزل . أتراجع ثم أهون ههه .. وصار لي أسبوعين على هالسيرة .. لمين قررت أني أجزم وأروح .. عاد دخلت لمستوصف الأسنان . ورحت لقسم الأستقبال . وقلت لهم أبسوي حشوه لضرسي . وفتحوا لي ملف وعطيتهم قيمة حشوة الأسنان . ثم وأنا واقف عند الأستقبال . قررت بعد أسوي تنظيف ليزر لأسناني .. أسناني عادي ما يحتاجوا تنظيف . بس قلت أبجرب تنظيف الليزر . بعد ما يسوي لي حشوة الضرس . ويوم فتحت لي ملف الموظفة . عطتني ورقة تحويل للدكتور للي راح يهندس بضرسي .. وأنا رايح لم غرفة الدكتور .. أبتدا قلبي يرجف ويرجف ههه ..
معذور لأني أخاف من أي شئ أسمه تنظيف أو حشوة أو قلع أسنان .. ولما دخلت لغرفة الدكتور جلست بالكرسي اللي قدامه . وانا قلبي لا يزال يرجف .
وقالي الدكتور : وش تبي نوع حشوة وتركيب الأسنان ..
قلت مدري . اللي يجي زينه بس أهم شئ خلنا نخلص .. وبعد ما عرف أيش المطلوب .
قالي الدكتور يالله تفضل أنسدح على السرير . وجي أنسح على ظهري بالسرير .
عاد أشوف الدكتور جاب المعدات اللي راح يهندس فيها بأسناني ههه .. وجي يجيب أبرة التخدير . واااااو . أنا يوم شفت أبرة التخدير بقى أشوي وتجيني سكته قلبية . لأني ما أحب أبره تدخل وتبط أسناني .. المهم دخل أبر التخدير بفمي علشان يبط عروق ضرسي . ويوم بط الضرس بالابرة . حسيت أني بقى أشوي وأموت . عاد الدكتور قالي .. شو فيك خيي . قلت أخاف من الأبرة أذا بطت السن .. قالك .. شو ياخيي أهدأ . عاد بيني وبين نفسي أقول يالله بس خلصنا .. الهم بطني ذيك البطه على سني خلتني أتبعرص من الخوف ههه . والحمد لله أرتحت يوم بطني بأبرة التخدير . وبعدها جاب معداته علشان ينضف ضرسي وعلشان يقطع عروق الضرس .. وجاب شئ كأنه زراديه وبدأ يلعب بأسناني وحط الحديده اللي كأنه زرادية حطها على عروقي علشان يقطع العروق . ويوم أبتدأ وجي أصرخ صرخه . وشكل كل اللي بالمستوصف سمعوا صرختي ..
وقالي بعدها الدكتور . شو فيك خيي .
قلت وأنت خليت بها خيي ..
قالي طيب مالك شو فيك صرخت .. قلت لأني حسيت بوجع مو طبيعي يوم بديت تقطع عروق ضرسي .. قالي أها يبقى مفعول المخدر ما جاب نتيجه . وجي يجيب هالابرة حقت التخدير مره ثانيه . ويحطها بضرسي . وكالعاده أشعر بالخوف وهو يحط أبرة التخدير ..
يوووه وأقول بيني وبين نفسي أيش اللي جابني هنا . ههه .. والحمد لله حط تخدير على ضرسي للمره الثانيه .. وجي يجيب معداته اللي تقطع عروق الضرس . ويوم جاء يقطع العرق . وجي أصرخ مره ثانيه ههه .. قالي الدكتور شو فيك خيي .. قلت احس بوجع مو طبيعي وأنت تقطع عروق ضرسي ..
قالي الدكتور شو هذا .. غريبه ليه المخدر ما جاب مفعول . قلت مدري .
عاد سألني الدكتور .
قالي : أنت شارب قهوه قبل ما تجي ألي ..
قلت أيوه يادكتور .. قال أها يبقى من شان هيك المخدر ما جاب مفعول عالطول .. عاد الغريبه أن مفعول المخدر ما فاد الا بعد التخديره الرااابعه .. ههه .. يعني أي واحد منكم يبي يروح يسوي تخدير .. عليه أنه ما يشرب قهوه قبل ما يروح .... ويوم خدرني بدأ يهندس بأسناني . والخوف يزداد شيئا وشيئا .
لاني كل ما شفت المعدات اللي راح يهندس فيها . عالطول أخاف .. هذا وأنا كبير أخاف ههه .. ومن شدة الخوف جسمي بدأ يعرق ويعرق ووجهي بدأ يعرق من شدة الخوف .
قالي بعدها الدكتور . شو فيك خيي ليه خايف بزياده ..
قلت أيش أسوي هذا أنا أخاف من شئ اسمه دكتور أسنان ههه ..!
والحمد لله
خلصت الجلسه الأولى . وعطاني الدكتور موعد ثاني لجلسه ثانية . ورحت لمه بعد أسبوع ونفس الطريقه الخوف داهمني .
لكن أقل من الجلسة الأولى . وعطاني جلسه ثالثه وجلسه رابعه .. وبالجلسه الرابعه خلصت من حشوة الضرس . وأرتحت كثير . وكان بوقتها قرب عيد الفطر . وجي أقول لدكتور الأسنان بقى أسوي تنظيف ليزر لأسناني .. قالي مو مشكله .. قالي أنا راح أحولك على الدكتور الثاني . لانه راح يسافر . علشان كذا حولني للدكتور الثاني عاد قلت له . هل تنظيف الأسنان بالليزر توجع . قالي لا مو كثير . لكن راح تحس بحرارة بأسنانك
>> ياويلي أنا خايف هه .
المهم أخذت منه ورقة التحويل , ولما جيت أدخل لغرفة الدكتور الثاني . ولقيت عنده واحد يسوي أسنانه . عاد أنا يوم شفت الدكتور مشغول . قلت لنفسي أروح وأجي له بعدين أحسن . ويوم صار من بكرا كنت ناوي أروح له علشان ينظف أسناني بالليزر . لعلي أنشغلت من بكرا .. وصرت كل يوم أقول أيه بكرا أروح له ثم أذا جاء بكرا أقوله أيه بكرا .. وصرت على هالحالة كل يوم بكرا أروح له .. عاد صار لي سنه وأنا على هالحالة .. والى وقتنا الحاضر وأنا ما عتبت عليهم ههه .. مع أني دافع عربون لهم ..!
وصادق اللي يقول (
العرس ولا وجع ولا قلع الضرس ) ههه
سبحان الله أنا أخاف كثير كثير سواء من حشو اسنان أو قلع ضرس .. عاد أدعي ربي أن ضروسي ما توجعني أبد . علشان ما أروح لمستوصف الأسنان مره ثانية .. ههه ...!
وأنا ملاحظ أن السبب بتسوس الأسنان عند كثير من الناس .. هي أنه يوم كنا صغار .. وحتى صغار هالوقت . تلاقونهم يأكلوا من الأكل سواء حلاو أو شوكلاته . ثم ما يغسلون فمهم بمعجون الأسنان . علشان كذا تسوس الأسنان عند الأطفال منتشرة .. يعني من البداية عودوا أطفالكم على تنظيف أسنانهم يوميا .. علشان يتلافوا تسوس الأسنان ..!
وبس خلاص هذي كانت سالفتي مع أسناني .. ههه ...!