حصيصه وصويلح

مباشر · 06-03-06, 11:00 pm

هذه القصه تتحدث عن يوم من حياة صويلح وحصيصه...واخوياهم...المدرسي...وفي كل حلقة بكتب لكم احداث حصة من الحصص الدراسية..

طلاب الفصل....وحسب ترتيب طاولاتهم بالفصل...

طاولة المدرس

هاني - لؤي حصيصه - فطيمة

محماس - صعفق جبران - فتحية

رانيا - خالدين صويلح - فيحان

مدحت - شليويح

الــحــصــة ......... الأولى......:

دخلت المدرسة الرشيقه الطويله..ذات الخشة المستديرة..وصاحبة اللكنه القصيميه..ذات لتغه حجازية..متعدد الوظائف..الآنسة سعاد..مدرسة مادة التاريخ..

سعاد : يالله ياطلاب...قيام اشوف...وانت ياشليويح قم اشوف..ورني طولك..

قام كل الطلاب..بينما كان صويلح..قاعد يقوم فيحان من النوم : ابوفحن قم الله ياخذك لا توهقنا..

شليويح : ياربييييييييه وش تبين انتي والله ماقوم..ابلشتونا طابور الصباح..ماغير اقوم واقعد ( متأخر عن الطابور)

سعاد : ماتسمع الكلام انته ؟ يالله قوم اشوف..لا اخرجك برا الفصل..

وتمتم شليويح بعدت كلمات : .....ياخذك.....ياعنز...ياجعل تمسطين......اخرجك اجل...ياجعل يصدمك قلابي بمخرج عشرة..

سعاد : ايش ايش...ماني سامعة ايش قاعد تقول..

صويلح : يقولك اليوم مطر يا ابله..

شليويح : ياتسذبك...انت لا عمرك تلقف لا اقوم احوس شوشة حصيصه..

حصيصه : هيه انت شليويح..ترى خشمك مايل على جنب..لا تخليني اجي اعدله لك..

سعاد : بس انتي وياه...ايش المسخره هذي...شوفوا الولد المؤدب فيحان...قاعد يذاكر الدرس اللي راح ناخذه..مو كذا فحوني.؟

فيحان : ايوه ايوه ..كذا يا ابله...بس تراي ناسي الكتاب...وذا كتاب الفقه وقاعد انقل الواجب..( ابو فحن يتمتع بالصراحة المطلقه )

سعاد : آه لا خلاص مو قادرة اتحمل..ايش هالفصل..اللي يجيب الهم..كأنو قاعدين بمبارة الهلال..

خالدين : احم احم..

رانيا : اهم اهم..

شليويح..كان يناظرهم بطرف عين...ووده يذب عليهم..بس فيحان ماقصر حيث قال : خالدين مشكلتك مسوي فيها شخصية..وانت والله لا شفتك احسبك الحلاق حقنا..

صويلح : ياعمي اي حلاق...ياخي تشوف ذاك ابوخشه تنقلب ويطلع لك وجه ثاني الي بكتاب الأنجليزي...ياخي يذكرني فيه..

سعاد : عماااااااااا انتا وياه...

خالدين : ابله ايش هذا....ذا القراوى قاعدين يقولون كلام مدري ايش..

رانيا : خليك منهم ياعسل انته..

شليويح : ياشيخ اروح فلافل مع رانيا....اغدي صندوق خيار...اصير علبة هندسة لعيونك رانيا..يابعد خشمي..

سعاد : شليووووووووووووووويح .... يالله قوم وارفع يدينك فوق..

شليويح : معصي...وانا ابو شلح....مابقى الا ذي..

صويلح : ياعمي قم بس لا تستاثم فيك ذي..تراه هي اللي تسقي نخل حوشهم..يعني لو تلزخك مع جبهتك والله ان تدوخ..

حصيصه : هيه صويلح..وانت وشدراك انه تسقي حوشهم ..هاه ؟؟( صويلح ..يمارس هواية الويقان على حوش الجيران )

صويلح : كح كح...حصيصه..معي علك ابوجني..تبين اعطيك ؟ ( يلعب عليها )

فطيمة رافعه يدها...للأبله : ابله سعاد...يالله ابدي الحصة..تراي متحمسه ودي اعرف وش صار على صلاح الدين..بعد المعركه..

فيحان : صلوحه..ياخي شف ذا الدلخه..انتي هيه..صلاح الدين..يتقاطع مع خريص..وش معركته لا اقوم اكب العصير حق الفسحه..حقك..

سعاد : انت فحوني..اهجد شاطر..ايوه فطيمة..الحين راح نكمل....يالله هاني..قوم سمع لي الدرس اللي راح..

هاني : حاضر يا ابلتي العزيزة سعاد..

لما انتهى هاني..من الدرس اللي راح..

سعاد : ممتاز هاني..ياليت كل الطلاب مثلك..

صويلح : وش الي ممتاز...والله لو هو حصيصه لا قامت من النوم..

حصيصه : ابله سعاد...الحين..صلاح الدين..كم كان عمره..يوم يموت..؟

صويلح : وانتي وش عليك..ياملا منيب..قايل..

فيحان : اقول يا ابله..سعدون مدري سعاد...الحين ذا الصتيمتين اللي مرتزين بوسط الفصل..وشو ( يقصد محماس وصعفق )

محماس : انت يافيحان..علامك ماتعض لك على شحمه وتاكل لك تراب لا امسك بالطلعة والفعك..

فيحان : انشالله..تامر امر..انت ياقمر..( لا ابد مهوب يخاف )

شليويح : اقوووووووول هييه انت محماس..ترى بتجيك علبة الهندسه مع جبهتك..لا تنفخ على عيال حارتنا..

سعاد : بسسسسسسسسسسسسسس خلاص..لا اشوف احد يتكلم......وانت صويلح...وش قاعد تكتب..وريني..

صويلح : لا منيب..موريك..

سعاد : طيب.طيب....( واخذت منه الدفتر بالغصب...ووجدته قاعد يرسم حصيصه )

سعاد : صلوحه...اذا جت حصة الرسم اقعد ارسم..بعدين اذا بغيت ترسم ارسم شي حلو ويستاهل..مو ترسم..اشياء مرعبة..

سعاد : يالله اليوم انتهينا من الدرس..

هاني : ابله سعاد...ما رأيك تعطينا واجب..نختبر مذاكرتنا فيه .؟؟

حصيصه : ياجعل يختبرونك بجهنم انشالله..

صويلح : ياشينه ذا الدافور...ودك تمسكه وتعلقه ميدالية..

فطيمة : اهي اهي ..شلون ابحل الواجب...اليوم بنروح لعزيمة..

فيحان : اقول انت ياهاني..بكرا تجي حال واجبين...واحد لي وواحد لك..والا والله مايرجع لك شريط الكورة حق السوني..

شليويح : هاني..اختار...تبي ماصورة والا خشبة ؟ ( ناوي يجلده )

سعاد : شاطر ياولدي ياهاني...يالله حلو كل الأسئلة اللي بنهاية الدرس...يالله اشوفكم بكرا..

فطيمة : ابله سعاد ابله سعاد...لو سمحتي..

سعاد : ايوه ؟

فطيمة : ممكن توقيعك ؟

فيحان : والله لو هي جينيفر لوبيز الزغبي ( ملخبط بين المغنيات )

الــحــصــة الــثــانــيــة :

دخل الى الفصل الأستاذ حماده مدرس مادة الرياضيات..في تلك اللحظه كان فيحان قاعد يداعب جديلة فطيمة..ويمعط شعرها...على سبيل الدعابة..

وصويلح كان يقوم بهوايته التي اعتاد عليها وهي انه يقعد يبحلق بحصيصه وهي قاعدة تمسح السبورة...وحصيصه كانت تستهبل على هاني تقوله..هاني كتبت هذا..اذا قال لا ماكتبته تقول احسن وتمسحه بسرعه..( حصيصه تمتاز بخاصية النذاله )

دخل الأستاذ حماده...وقد كان مدرعما وبنفس الوقت مجلعدا...نظرا لأنهم متأخرين بالمنهج...ويبي يلحق على التمثلية المصرية اللي تجي الساعة 11 ..وقال : يالله يابني انتا وهوا...ماتفز ..وتؤووم تفتح الكتاب ربنا يفزز خشتك ..

شليويح : بالله يا استاز مدحت...عندي سعال يا استاز لو سمحت يالحبيب ..

حماده : اتفضل ياسي شلوحي مش عارف شيييولح...مش عارف بتقيجبو الأسامي دي منيييين..

شليويح : ياستاز..كم باقي على العطله ؟

حماده : بص ياسي شلوحي..بتستعبط معايا انتا والا ايييه ؟...بص اماال..حاتعئل والا والله ...قسما عزما..لا امردغك بخشبة ( الأستاذ حماده ساكن جنب قصمان )

صويلح : استاذ حماده...خل عنك شليويح تراه من جنبها...ترانا واصلين التكامل الثنائي يابوحمييد..

حماده : شاطر ياواد ياصلوح....بس ابو حمييد مين..ربنا ياخدك ....اووم اووؤف ( اووقف ) ووشششك للحيط..

صويلح : ياخي وش سويت...شف محماس نايم ولا قلت له شي..

حماده : حموس..ربنا يطيح على نافوخك قاموسه.....اييه الفصل المنييييل ده..

حصيصه : استاد حماده..لوسمحت...انت وش فيك معصب ؟

حماده : يابت ياحصوصه..المدام ام حمدي عماله تكفخني بالبيت...المهم..يالله افتحوا الكتب..

فيحان : استاد حمودي...ترى ابوي يسلم عليك ويقولك تراي نسيت الكتاب....وايضا تسلم عليك امي..وتقولك تبي سلف ؟

حماده : مش مشكله ياسي فحان..خشش راسك مع صلووح..

فيحان : اما اسمي فحان...ياخي شوهت الأسم..

صويلح : من زين اسمك اصلا...ياخي شلون ماتستحي تكتب اسمك على الدفتر..انت ووجهك..

فيحان : تدري انت ووجهك اني رحت ذات مرة للفيصلية...ومادريت الا ذا البنات...انواع التفحيط وراي..ولسان حالهن يقول..فيحان على كل لسان..

حماده : ياقعل يتئطع لسانك ياايها القهبز..وانتا عامل زي خبزة التميس المحترأه....ماتتنيل على خشتك..

فطيمة : يا استاد حماده لوسمحت تراك غثيتنا..ياخي اشرح..تراي صتيمة بالرياضيات واللي يرحم والديك ابي افهم..

حصيصه : وانتي الصادقة..بعد والله يانا دايم اتنح بخشتك يا استاد حماده..وتقضي الحصة..وانا مدري وش القصه..

رانيا : ايووه يا تييتشر حمودي..انا زهقت من كتر مانا مبلمه معاك ومو فاهمه شي..

شليويح : موب منك والله من شوشة محماس مأثرة عليك..

محماس : ابك انت يابو شلح..علامك ماتنثبر....حرم بالله لو ماعقلت لا اشقق كرشتك بسكينة الخضرة حقتي..

شليويح : استررر عليه راعي سوق الخضرة....اقول لا يكثر بس..لا اخليك جنط للجمس العبارتين حقي..

لؤي : ياربييه ايش هادوول عمالين يقولوا كلام يخلي الواحد يشمئز..

فيحان : ياروحي يا يشمئز...اروح فدوة الطاولة اللي انت تكتب عليها..ياحياة الشقى...معليه شباب ..بس خقيت..لؤي ذكرن بجي جي الله يذكره بالخير..

حماده : بصووو ياولاد...احنا وصلنا فييييييين ؟

صويلح : بدري..ياخي لنا ساعة بادية الحصه..وتوك تذكر....بعدين اسأل هاني وصلنا فين..لأني من اخذت الكتب هذي اول يوم احضر..

حصيصه : افا صلوحة ..ياتسذبك..دايم اشوفك تجي..

صويلح : آه..بس...اروح كرسي ياشيخ..لعيونك يابعدي انتي...ماحضرت الا عشانك..

حصيصه احمرت وجنتيها من الخجل..وبدت تضيحك....الى ان جتها علبة الهندسه تمشي مليون من فطيمة..قائلة لها : اثقلي وجع..كلمتين..وعلى طول..خقيتي..ولو ماش..يبيلك تاخذين دورة بالثقل عندي..

فيحان : فطومتي..ياحياتي..

فطيمة : هلا روحي..بعدي انت....افا وراي انهبلت..قصدي..وش تبي ولعنه..

فيحان : لابس ابقولك انه عند برطمك فيه ذباب..شكله توه قايم من النوم..

فطيمة : يا الثور..هذي حبة خال..انت ووجهك..

كل هذه المحادثات..والمناقشات ..بينما الأستاد حماده..يكتب الدرس على السبورة...ولم ينتبه ..الا بعد ماصكته الطباشيره مع صلعته..ويلتفت بسرعه..

ويقول : وقعه تووقع اللي حزف هازي الطبشورة..اللي فلأها بيا يؤووول مين هوا..احسن لا استنزل عليكم..

فيحان : يا استاذنا الفاضل حماده..تحية طيبة وبعد...اهديك سلامي وتحياتي..واشواقي..وابلغك تحيات شغالتنا نوزات..وتقولك..تترقى فيا..تبكي عليا..مش ممكن يوم....وايضا امي تسلم عليك..وتقول ترى مهوب فيحان اللي فلقك بالطباشير..وشوكرن..

حماده : امااااااال ميييييييييين....شلووووح...هوااا انتا ؟

مدحت : ايوه هوا هوا يا استاد..

شليويح : هوا اجل...ومستانس انت وذا الخشه..بس هين..وعدنا بالطلعه عقب الحصة السادسه..

ولم يكمل شليويح تهديده...الى ان انتهت الحصة الثانية...

فطيمة : استاذ حماده ..لوسمحت..استاااااذ حمااااده لوسمحت..دقيزة ..الله يعافيك..

حماده : ايوه ؟ عايزة ايه انتي كمان..

فطيمة : والله من شين النفس ... لابس كنت بسألك..الحين وش يقرب لك حماده ذاك اللي يلعب كورة بنادي الزمالك المصري ؟...كلكم حمادة اكيد تقربون لبعض..

فيحان : فطيمة....سؤال يسدح نفسه وبعنف.....شلون نجحتي من ثاني ابتدائي ؟

الــحــصــة الـثــالــثــة...:

بعد خروج مدرس الرياضيات حماده مسرعا..يبي يلحق على التمثليه المصرية..قام شليويح..وحجر لؤي بركن الفصل..وقاعد يمزح معه..ويقوله : لؤي منهو بطل الحاره ؟

لؤي : انت انت..اقوا شي .. بس فكنا تكفى..

في تلك اللحظه دخلت مدرسة مادة الأدب الآنسة رولا من بيروت..قائلة : صبحكوون الله بالخير حبايب البي..كيفكن..

فيحان : هلاهلاهلاهلاهلاهلاهلا مدرستي المفضله...ابله رولا..يور ماي بست تيتشر عندي ...شرايس بالعنقليزي..؟

رولا : ياربي عليك فحون شو بتعئد...بس ماتعملها مرة تانيه...

صويلح : ابله رولا...وش تقرب لس ..رولا عالهواء اللي تجي بالتلفزيون..

حصيصه : ياملا العله ياوجه الكورلا...وش مشوفك رولا عالهواء...

رولا : سلووهي..رولا هاي ماهي من ضيعتنا...وانتي ياحصيصه..شو بتغارين كمان من اللي بالتي في..؟....المهم يالله افتحوا الكتب..واليوم عنا ( عنا = عندنا ) تسميع لقصيدة امرؤ القيس..

فطيمة : ياحياتي يا امرؤ القيس...ياهو رهيب..تراي حافظة القصيدة يا ابله..

فيحان : ياجعل تطلع روحك...

صويلح : آمين يارب.....يوم انه تسميع وراك ماقلتي لنا انتي يا اللي خشتك تقل كيبورد منتثر عليه ميرندا..

فطيمه : انثبروا بس..وانا وش علي منكم..دامي انا وحصيصه حافظين القصيدة..

حصيصه : المشكله اني داريه انه فيه تسميع..بس اني حفظت القصيدة اللي مكتوب جنبه للقراءة والأستفادة فقط..وخليت اللي حفظ..

شليويح : هع هع...الله من الصطاله يا حصيصه..طولي عمري لا شفتك احسبك جنط الجمس اللي انسرق..من حوشنا..

رولا : شو هيدا ؟ ..شو عم تعملوا..وشو عم تؤلوا..ياربيه يا شلوح..انت هلاأ راح تطلع براسي نيخلييه (نخله )..ياربي يخلص كريم صن بلوك بتاع الشمس من بقالتكم..مشان تتوهق..

فيحان : يا ابله رولا..وش اللي صن بلوك..ولشليويح...شليويح..اذا طلع بالشارع...الشمس تروح تلبس نظارات شمسية.

شليويح : خير انت وياه وش اللي صن..والله اني يوم نلعب..فايزين والحكم سبيت...

هاني : ابله رولا..انا عاوز اسمع ..

رولا : ايوه مشان يشوفوا كيف الناس الفاهمه..

صويلح :دقيزة يا ابله رولا..انا بسمع قبله..

فيحان : اخس يا ظلال ابوصعده الدافور...وش تسمع هماك ماحفظت..

صويلح : وراه ما تعض على ركبة فطيمة وتهجد انت..ماعليك..

في هذه اللحظه كان صويلح ينغز حصيصه..ويقولها هامسا : اذا وقفت اسمع..افتحي الكتاب على القصيدة..عشان اقراه...يالله بعدي حصيصه..يابعد نخلة السكري اللي بحوشنا..

حصيصه : من عيوني وخشتي..يابعد اصبعي الصغير....طيب هه تشوف القصيدة زين ؟

صويلح : اصبري..ارفعي شوي..ايوه كذا تمام..كح كح..ايه يا كورلا..مدري رولا..

رولا : ايوه صلوح..سمع تؤبرني حبيب البي..

فيحان : والله لا احفظ الكتاب كله..دام فيها تؤبرني..

صويلح : موكرن موفرن..مقبلن..مودبرن...كاجلمود صخرن حطه ابوسعد مدري السيل من علي..

رولا : ممتاز....بس مييين هيدا بو سعد..؟

صويلح : لا ذا استعارة جمالية..لأن ابوسعد..ازين واحد بالحارة..

فيحان : عانسة رولا..عندي سعال..مهم مره....الحين ليه قال حطه السيل من علي ؟ ليه ماقال حطه السيل من فيحان مثلا.؟ ليه علي بالذات.؟والا قاط معهم باستراحه يعني..؟ يلعن ابو الواسطات..

رولا : شو السالفة..ولاك شو عمال بتخربط انتا فحون...شكلك لساتك عمال تفكر في مباراة الطابه بتاعة امس..

شليويح : خير وشي طابة ذي..

محماس : ابك يا عبله رولا ..موب طابة يعني هذيس الدويرة...اللي يلاحقونه الوراعينه فالشوارع..؟

رولا : مع اني مو عارفه شو بتقؤول يا حماس...بس باين من ملامح خشتك انووه صح كلامك..

محماس : ويييييييييييو...ياويييييييييحييييي...شغل الددسن يا صعفق..

صعفق : هاه ؟ اي ددسن..يارجال هماك صدمت به دوريات امس..ابك انت نسيت ؟

فتحية ( اول مره تتكلم ) : لا مؤاخزة يا سي صوعفأ ( صعفق)..البتاع الأصفر طالع من تحت الجلابية بتاعتك..

جبران : اقلك...انتي ايش جلابية...هاضا يسمونه ثوب..ايش هاضا..ناس ماتعرف ..

صويلح : اقول ابو فحن..الخشبه..الى هالحين معك ؟...بالله ودي الحط بها فتحية وذا الطرمبه اللي جنبها..

فيحان : لا اسمح لي..ذي الخشبه..مخليها معي عشان اذا طلعنا..بروح العب بيسبول مع سوهارتو..واخوياه ( لا ابد ذولا موب سواقين)

رولا : اخيرا...يالله انقلوا اللي كتبته بالسبورة..مشان انا عاوزة اخرج ...يالله بااااااااي اشووفكن بكرا..

وخرجت رولا...وتعلقت عيني محماس عليها وهي طالعه....وانهمك الطلاب بالنقل من السبورة..بينما كان

شليويح..قاعد يمسح السبورة عناد فيهم..

الــحــصــة الــرابــعــة......:

دخل الأستاذ عثمان مدرس مادة الكيميا...وكان وهو يمشي..يناظر اللمبات..وهو مستغرب..ويقول : ليه هم دايرين يشغلوا كول هادوول اللبمات..

في تلك اللحظة كان صويلح وفيحان ماخذين طاقية محماس..ومحماس يلاحقهم ويقول : ابك هات الطاقية ياورع..

فيحان : هيء هيء...ايييييه افلقني ان عطيتك...خذ صلوحه..

صويلح : وع يا محماس..ذي طاقية والا بيز ( البيز هو قطعة من القماش..سميكة..يمسك بها ببريق الشاهي او دلة القهوة )

عثمان : احم....شنو داير تعملوا...ماقولت لييييك انتا يا موحماس..داير اشوفك تلبس حاجات تخرع ...

محماس : ابك ياستاد هم اللي خذوا طاقيتي..

فيحان : استاذ عصمان...ياخي طاقيته هي اللي لزقت بيدي وش اسوي له..

عثمان : ياحماس..داير تغطي شوشتك هادي.اللي عامله زي شوشة خالتي فوزية...والا والله قسما بالله العزيم..لا اوقفييك برا في الشمس..لحزة ياطلاب الجوال داير يدق..

مفلح ( بالجوال) : الووووووووو..

عثمان : يامرحب..؟

مفلح : سلام علاكم.....الله يسلمك لحية غانمه ..

عثمان : غنمة لما تغنمك..المهم نهايته..عايز شنو ؟

مفلح : الله يسلمك ..ازهم لي مطلق بن قعيس..

عثمان : داير تقلب وجهك..الرغم غلط ..

( خلصت المكالمه)

شليويح : هع هع...يا استاد ابو حمزة..مدري وش اسمك...وراك معصب..

عثمان : معصوب..لما يفقع كرشك...ايش معصوب..انا آخر مره افطرييت معصوب يوم انا في التانوي..ياشلوح....قوم اييقف..قولي فين ويصلنا..

فيحان : يا ستاد..عثمان...تراك بتله تدخل علينا...تقعد تلعب بالكرسي ذا اللي يدور..وتطلع ولا ناخذ شي..

حصيصه : ايه ياستااذ عثمان...تراناا...ماتعدينا صفحة المقدمه اللي بأول الكتاب..

عثمان : المهيم..انا زاتي تعبان...وعايز استريح شوية....يالله يا صويلح..قوم اكتب لي معادلة تركيب اكسيد الأيسلين..هوا زاته اللي احنا ويصلناه...

صويلح : بلا زاته بلا خربطه...لا تقعد تخربط علينا...والله مادري وش تقول..

فيحان : صلوحه..ياخي الأستاد عثمان شكله مستانس اذا لعبوا طيش باللليل..( طيش لعبة تشبه الحبشه..)

صويلح : ليه مستانس..لعاد ان شكله دميجه مايدري وش الطبخه ولا يعرف يركض..

فيحان : ياخي شكله بالليل..اذا لعبوا طيش..يفصخ ملابسه ولا يشوفه احد..الا اذا ابتسم..

عثمان : شوفوا ياولاد..افتحوا الكتب على صفحة ماني عارف شنو..وقوم اقرا يا هناء..داير شنو اسمك ..؟

هاني : اسمي هاني..!!

شليويح : هع هع هع...هناء..ياروحي يا البان هناء اللي تجي بالدعايات..

حصيصه : ياثقل دمك ياشليويح...فشلت الولد..

فيحان : اخس ياللي خايفة على مشاعره..انا من اشوف شوشتك ذا المنتفشه صايرة كنه فوطة باكستاني..

صويلح : خير خير ابوفحن..اشوفك قمت تغلط ..ترى الصداقة شي..وحصيصه شي ثاني..اعقل لا اقوم اتوطى ببطنك..

عثمان : داير تسكت انتا ياواد ياصويلح....انا عمال انام وانت زاتك مسوي ازعاج.

شليويح : ياروحي يا زاتك..ياخي وناسة هرجه ذا الأستاد عثمان...ألا على طاري عثمان..يا استاد وش العلاقة بينك وبين نخلة السكري..

عثمان : مسل العلاقة بينك وبين جنوط الكورلا حقتي..

فطيمة : يا طلاب..لو سمحتوا...خلونا نفهم الدرس...

فيحان : ياهووووووووووووه يا نفهم.....بس اقولك يا فطيمة..احلقي شنبي ان فهمتي..من ورا ذا الزوول..

مطلق : ابك..ويش السالفة ?

فتحية : ويش السالفة ? ..هوا انته مستأعد لي انتا يا واد ياموطلأ ( مطلق)..شاغليتك تؤولي ايش هيا السالفة..

شليويح : ياروحي يا ام فتحي...اروح فدوة سروال السنة حق فتحي..

عثمان : بسم الله ياكريم يارزاق ياعليم....الحمدالله خليصنا من الدرس..

صويلح : ياعمي وش اللي خليصنا..ياجعلي اشوفك منحجر بالكورلا..بين هايلكسين محملات جح..

حصيصه : وهو صاز صويلح..يا استاذ عثمان..ترى مهوب اسلوب ذا..تجي تقعد تسدح عندنا وتمشي...ونتخرج حنا زلايب بالكيميا..ماندري وين الله حاطنا..

فيحان : والله الزلابه انتي وصويلح...انا فاهم..كيميا....حتى .حال الواجب..

عثمان : يالله ياحبايبي..ياحلوين....انا موزطر..امشي...

شليويح : هع هع...موز طر...والا بردقان طر...هع هع..

الــحــصــة الــخــامــســـة...:

بعد طلع الأستاذ عصمان ..نقز كل من صويلح وفيحان الى الكرسي الدوار عشان يلعبون فيه..

وكانوا كل مره واحد يركب..والثاني يدف..الكرسي..الى ان دخل الفصل مدرس مادة الجغرافيا الأستاد حمزة ادريس صندقجي خاشقجي..ووقف مستغرب من الموقف اللي كان عليه الفصل..حيث كان شليويح ماسك هاني ويصفق فيه حيث ان هاني غلط على شليويح ولا حل له الواجب..وحصيصه وفطيمة يلعبون اللعبة المشهورة واللي اسمها حدارجا بدارجا يا حبيبة المدري وشو..الخ..

فصرخ الأستاذ حمزة بكل قوته..: ايش هادا ؟..انته ياواد انته وهوا..خلي بالك معايا..هيا شوف والله برب البيت وربي لا اموسرك انته وياه بهادا ايش اسمه ياربي خشبه مدري ايش تسموها...هدي اللي تخرج من النخله ولها اشواك..

صويلح : عسيب النخله يا استاد..

فيحان : ايه يطلق عليه عسيب..وصديق ابوي ابوكريّم يسميه سعفه..ومره من المرات..كنت متشعبط بعسيب النخله..جا قالي لا تكسر سعفة النخله..وشوكرن..

حمزة : عسيب ايش وسعفة ايش..هوا..هادا..المهم.اقعد انته وياه..هيا..ورانا درس مهم..

شليويح : استر عليه يا المهم...حدنا ناخذ عاصمة تونس..ونبلش بعد ماندري وشي..

محماس : ابك اني ماعرف الا عاصمة اندونيسيا...مهيب هي جوكارتا ؟

حمزة : ايش ايش ؟ اندونيسيا ؟ ايش عندك فيها هاه..ماتتكلم انته ياواد ياميحماس..بالله برب البيت..انته ماتستحي ان اسمك محماس ؟..كيف تقابل زوجتك بالمسقبل..تقولها اسمك محماس ؟..بلا فشكلك على اللي خلفوك..

حصيصه : استاد حمزة...لوسمحت..وشي عاصمة بلجيكا ؟

فيحان : ياربيه يا ام الحصايص..وش ذا السؤال اللي ماله داعي..صار كنه ركنية بالوقت الضايع..

صويلح : اص بس..والله انه سؤال رهيب...اصلا اتحداك تعرف وشي عاصمة بلجيكا..

حمزة : يابنتي يا حصيصه..لما تشوفيني اتكلم مع هادول البهايم شليويح ومحماس..خلي وجهك على الكتاب ودنقي عليه ..عشان تعرفي ايش هيا عاصمة بلجيكا..

صويلح : ابوفحن...ياخي وشو دنقي..يعني ايش..لا يصير يسب ذا بس ويا خشته اللي كنها غلاف شريط برتني سبيرس...

فيحان : والله كلمة دنقي..مامرت علي من قبل..بس هين ولو يبيلنا ناخذ كورس بجده..

حصيصه : يماااه وشو يعني دنقي..يا فطيمة..

فطيمة : حقيقتن..وصراحتن..وحسب خبرتي بملاحق التكرونيات اللي يبيعن زنوبات عند الحرم..ان كلمة دنقي من دنق يدنق..يعني نزل راسك..

شليويح : ياهوووووه يا فطيمة..اسمحي لي اطلق عليك لقب العنز المنطلقه..عشانك ذكية..

رانيا : ياااي ايش هدا يا خالدين...ايش عنز منطلقه..يعني كيف..?

خالدين : ياعيوني انتي..وش عرفك بالحاجات هادي..

حمزة : وربي..لو ماعقلت يا شليويح لا امسيطاك بهدا ايش اسمه حتى تخرج عينك من ماني عارف ايش..

فيحان : ياستاد حمزة..ياخي تراك نص هرجك ماندري وشو..كل كلمة والثانية..تخطم كلمة ماني عارف ايش..

صويلح : ابوفحن..تسمح لي اهنيك..على هالنقطة..فعلا ياستاد حمزة..اتوقع انك يومك صغير يسمونك حمزة ماني عارف ايش..

حمزة : اقلك قوم قوم انتا وياه..هيا قوم اشوف..اوقف هناكا ووشك للجدر..

شليويح : هع هع..ياروحي ياحمزة ادريس..ياخي قسم بالله انك رهيب..

في تلك الأثناء كان فيحان ينقل الواجب..فلذلك بلش وسوى نفسه ماسمع الأستاد حمزة..فصرخ حمزة صرخة اقشعرت لها شوشة حصيصه..

فنقز فيحان قائلا : هاااه ياخي مادريت..مالسا دوبي عاوز اقوم..

صويلح : افا يذا العلم..وش اللي لسا ومدري وشو..ولو خربت يابوفحن..منتب على خبري..

شليويح : اقول ابوصلوح..انت وابوفحن..وراه مانقوم نغني اغنية..بهذه المناسبة الكريمه..

حمزة : ربي ياخد شكلك ايش مناسبة هادي..

فيحان : بمناسبة ان المكيف اشتغل يا استاد ابشرك..

صويلح : ايه وصار الهواء يلتفت يمين ويسار..يعني يجينا هواء..موب مثل منول كل هواء المكيف بخشة شليويح..وانا وابوفحن قاعدين تقل بقدر ضغط..

حصيصه : ايه والله وانا والله يانا احس ان شوشتي احتمست من الحر..

فيحان : فعلا ياخي..انا حتى احس سروال السنه حقي لص مع الثوب..من الحر..

شليويح : والله انا جايب معي فروة بعد سبحان الله تصير براد..والا شي..حتى لابس سروال البجامه ذاك ابوفتحات..الله ياخذهم يحطون فتحات مالها داعي..

فيحان : يا الدلخ ذا الفتحات عشان التهوية..

حمزة : الزاهر اني لوح واقف هنا....اندر هناك ندرت عينك من حوقها..( يعني يارب تطلع عينك )

وبعد هالدعوة..انطلق الأستاد حمزة متوجها الى غرفة المدير..بينما الطلاب كانوا يفككون لمبات الفصل..استعدادا للحصة القادمة..

وعملا بخطة شليويح..وهي تطفأة النور..عشان تبلش الأبله رانيا..ولا تعطيهم درس..

الــحــصــة الــســادســـة.....:

بعد ما انتهى شليويح من تفكيك لمبات الفصل...من نجفات وبويبينات...

قال بصوت اجش..يملؤه القوة والمكر..: اذا سألتكم ابله رانيا..مين اللي خرب اللبمات..وش تقولون..؟

فقالوا بصوت واحد...: هـــــاني..

فيحان : هاني..ليه تخرب اللمبات موب عيب عليك..

دخلت الآنسة رانيا..مدرسة الرسم والفنية...وانبلهت من جو الفصل..قالت : ياااااااي شوو هايدا...مين عمل هيك..

هاني : انا يا ابله..كان عندنا عمل بالحصة السابقه..

صويلح : امووت يا التصريف..

رانيا : شاطر يا هاني..

شليويح : قسم بالله انه انا الي فكيت اللمبات..

فيحان : اقول ابله رانيا...ازا ممكن يعني ازا ممكن..

رانيا : ايه فحوني...شو بدااك روحي ؟

فيحان : ياويليييه ياشيخ..اتقطع ..اصير قوطي نيدو ..مع شو بدااك...

رانيا : يوووه يافحوني..ما احلاك شو بتعئد..يالله عاد اووول شو بداك..

صويلح : يالله لك الحمد...ما اردى من فيحان..الا هالأبله...تصدقين ياحصيصه اني لاشفته تذكرني بدعاية زيوت بترومين..

فيحان : ابله رانيا..ازا ممكن..يعني..شحاطاتك..عاوزين نلعب فيهن طاء طاء طائيّة ؟

شليويح : هع هع ..يا الدلخ شحاطات يعني حذيان..

صويلح : حذيان يعني نعال....نعال يعني جزمة...جزمة يعني كندرة..كندرة يعني مخ الأخ الفاضل محماس..

رانيا : ولاك فلّ يافحوني..آل شو شحاطاتي..ياختي عليك ما احلاك..

فيحان : احم...ولو تحسون اني مطيحها..على خشتها..

فتحية : بليز ازا ممكن يعني لوصمحتوا..؟..ايه يعني موطيحها...هيا بيالة توطيح والا اييييه انا عاوزة افهم...هوا انا كومخه هينا والا شنو ( هي مصرية بس مواصفات خليجيه )..

حصيصه : اسمع صوت عنز تتحدث..؟

فطيمة : هوز سبيكينق ؟

فيحان : استر ياالأنجليزي....وين القناة الثانية عنك..

صويلح : لا ياشيخ ارحمنا تكفى...فطيمة ويالله اني متحملها هنا...عاد تنشب لنا بالقناة الثانية..لا واللي يرحم والديك..

فيحان : ياخي وانت مصدق..اللي يسمعك يقول قاعد مع مدري وشو شبكشي حق التلفزيون..

رانيا : شوبكاااان ياشبيييب وياصبايا...يالله ماتطلعوا كراسات الرسم ..

محماس : ابتس يا ابلاه روني ..ماذا راح نرصم اليوم ؟

فيحان : روني ؟ نرصم ؟....اقول ذا من وين جايبينه..شكله والدته امه بصندوق هايلكس..

صويلح : واللي يسمعه يقول نرصم...يقول ابد هذا اللي راسم المونيليزا ..

حصيصه : وجع صلوحه من هي ذي..

فطيمة : حقيقتن...وصراحتن...المونيليزا..وحسب خبرتي..انها تلك الصورة اللي رسمها لست اذكر هيز نيم ..ورسمها بدون حواجب..

رانيا : ولاك تئبريني فتوومي...شو هالمعلومات...بس شو هيدي هيس نيم..مين هوا ياللي نيم..

صعفق : احلى ابلتنا..وش عرفتس ان ولد جيرانا اسمه غنيم ؟

فيحان : يووووه وش يبي ذا الثاني..سكتوه ..هو ويا صوته الله ياخذه..كنه بالع خشبه..

صويلح : حصيصه..؟

حصيصه : عيونها...سم..

صويلح : موووووووووت يا الصوت...اسمع الأصوات انت ووجهك ياصعفق..

حصيصه..وبعد ان حمرت وجنتيها من الخجل : يووه صلوحة لا تقول كذا..

رانيا : ولاك شو هيدا..ماصارت واللهي..صارت حصة غزل مو رسم..

شليويح : طيب انتي وشوشتك اخلصي علينا خلينا نرسم..

فيحان : على طاري شوشتها...شليويح ..متى آخر مره استخدمت الأختراع اللي يسمونه مشط ..؟..

صويلح : تدري عاد انه اول ماتروش شليويح..عزمونا على الغدا بهذه المناسبه الجميلة ..

فيحان : شليويح..ياخي ارحم ذا القملات البريئات..احس انه فيه قميلة صغيره..قاعدة تزاعق..تقول واللي يرحم والديك حلق شوشتك..

صويلح : لا وقبل يتروش شليويح..كنت انا عندهم..وشفت اربع قملات بشوشته يصلون صلاة استسقاء..

ويكركر كل الفصل..بعد هذا الفاصل الأنذبابي من فيحان وصويلح على شليويح..مما اغضب شليويح كثيرا..

شليويح : ابله رانيا..انا طالب..ابي انجح..وذولا يلخبطوني..( وشليويح يأشر بيده اليسار لفيحان...فيما معناه..قسم بالله لا اتوطى ببطنك )

رانيا : انا اليوم راح اعطيكم اختبار بالرسم..

جبران : ليش ياخي..ترى اذيتونا ياخي..كل شوية اختبار ..ايش ام قلق هاضا ياخي..

فيحان : ياربيييه وش مجلسني بذا الفصل انا ..

صويلح : ياهو دلخ ذا من جد..لا اسمحوا لي يعني احس ان الكرسي اذكى منه... مدرستنا العزيزة رانيا..وتقولها ياخي..

رانيا : خلاص..انا انطيتكم وش...يالله كل واحد منكن..يرسم لي اصعب شي يتوقع انه مايقدر يرسمه..

فيحان : اصعب شي اني ارسم شجرة...صراحة اخاف اسقط..

صويلح : لا ياخي قمة الصعوبة لو قالوا لك ارسم سوداني بالظلام...يلعن ام التوهيقه..

حصيصه : انا ابرسم وردة..

فطيمة : انا برسم هندي..وهو يقطع وردة حصيصه..( انواع النذاله ).

شليويح : انا برسم هاني يوم هو قاعد يخرب اللمبات...يا قليل التهذيب..

وقبل ان يرسم احد شيء...انتهت الحصة السادسة والأخيرة...

وانطلق فيحان..راكضا..مطلق رجلينه للريح...خابر ان شليويح يبي يتمردغ فيه

وفطيمة..قامت تغني طلعة طلعة واللي نايم يصحى..

وانتهى بتلك الحصة يوم دراسي من ايام مدرسة صويلح..

مخبوز