ان شاء الله كل يوم نبي نقول لكم موقف محرج

[الانيق]

السلام عليكم

اخوي السعودي اقترح انه يكون موضوع فكاهي وان كل واحد يحط موقف من المواقف اللي مرت عليه او سمع به او صار لخوية

المهم اي موقف مضحك او محرج

وانا ابقول لكم اول موقف

الموقف الاول 1

واحد في ليلة عرسه جالس في زاويه وزوجته في زاويه , يكلمها مستحيه وتطالع الأرض .. يرمي نكته يستهبل عليها ماش البنت تطالع في الأرض ومسكته ولا كأن فيه أحد جالس جنبها ..
الرجال من كثر مايكلم نفسه وبنت الناس ساكته قال خلني بسكت وأشوف وش تاليتها معها .. يعني كلهم سكتوا ..
شوي يوم جو أخويا الزوج وقالوا بنستهبل عليه .. المهم ويقوم واحد منهم ويآخذ حصاة ويرجمها في النافذة .. عاد تخيلوا سكوووون وصوت صقعه فجأه .. البنت يوم سمعت الصوت طمرت وضمت زوجها من الخوف .. الرجال اعجبته الحركه .. ترك حرمته على جنب وطلع من النافذة وصاح لأخوياه " ثانيه شباب ثانيه...

[الانيق]

الموقف الثاني

ثنين توهم متزوجين .. أول ما رجعوا لبيتهم الا زوجها مجهز لهم عشاء .. أختنا في الله الدنيا مسودّة قدامها من الجوع .. ما ذاقت الاكل من أصبحت من زود ماهي مشتطة .. ورجلها يناديها يبيها تاكل .. البنت مستحية وما تبي تاكل قدام رجلها .. بس انها جوعاااااانة .. قالت له لا تسلم أنا شبعانة .. يقول لها يا بنت الحلال تعالي كولي لتس لقمة ولا لقمتين .. والبنت تقول أبدا الله مير ينعم به ماله محل .. ويحاول فيها من هنا من هناك وهي ميبسة دمجتها .. مع انها كانت تتعبر مع كل لقمة يبلعها وتقول في نفسها اخلص عاد يبو الشباب علينا تراك مصختها ..
خلص زوجها من العشا وقال لها يلا ننام ترانا ورانا قومة بدري بكرة ( الضيفة عند أهله ) .. قالت له خلاص انت رح نام أنا بضف الأكل أول .. الرجل ابتسم ابتسامة صفرا وقال على راحتك .. ما صدقت المرة رجلها يدخل الحجرة الا طيرااااااااان على الأكل .. لقمة في فمها ولقمة في يدها وعينها على الثالثة .. وهي في قمة الانسجام ما درت الا ذا الي يمد لها كاس الموية يقول لها سمي كاس ما لا تغصين وهي الي تنفجع هاك الفجعة

[السعودي]

هــلا والله بأخي وحبيبي ( الانيق ) وشلونك وشلون أهل الريض عساكم بخير

ــ أنا معك ولكن يجب أن تعرف أن العنوان للموضوع مهم في جذب الأعضاء إلى ما تصبوا إليه ، فأنا عندي مواقف مضحكة + مواقف محرجة سواء حصلت لي شخصياً أو حصلت لغيري ممن أعرف أو سمعت عنهم تلك المواقف

ــ نريد أنا وأنت نـتفق على شيء وإن شاء الله إنك لن تخالفني وستضل الفكرة أنت صاحبها في الأصل مع إجتناب الصور التي فيها صور نسائية ... تمام

بنود الاتفاق :
1) لن استمر معك إلا في حالة حذف الموضوع هــذا ، ويكون عوضاً عنه هذا الرابط http://forum.buraydh.com/showthread....threadid=19238
ويعلم الله طلبت منك ذلك لأني أريد الاستمرارية وذلك بإختيار الموضوع الجذاب فقط لا غير وأن لا تقتصر المشاركة عليك وعليّ فقط بل يا حبذا المشاركة من جميع الأعضاء فالمشجعون لهذه الفكرة كثير واذكر منهم ( شواطىء )

ــ وستذكر كلامي حينما تقوم الأخت الفاضلة ( مسافرة بلاد زاد ) بتثبيت هذا الموضوع لأنها بحاجة لمثل هذا الزاد الذي تتقوى به على أسفارها ..... فهي تشجع كل صاحب فكرة محترمة لا تتعدى حدود الأدب في الحوار أو الطرح

،،،،،،،،،، وتقبل تحيات أخوك ــ السعودي ،،،،،،،،،،،،،،،،
======================================

[الانيق]

السلام عليكم

اخوي السعودي

انا معك على طول الخط

اتكل على الله وخل مراقبتنا الفاضلة تلغي الموضوع وما عندي مانع

[المتلثم]

انا عندي مواقف بس تراه خياليه مسموح اكتبه هنا والا لا

[كرباج]

تكفى يالمتلثم قل موقفك شكله وناسه

هههههههههههههههه

بااااااااي

[الانيق]

السلام عليكم ورحمة الله وبركاته
عدنا بعد انقطاعنا عنكم لظروف قاهرة
وكل عام وانتم بخير وعليكم الشهر مبارك
وبهالمناسبة راح نرجع لموضوعنا السابق وهو المواقف المحرجة

وابقول لكم كم موقف حصلتهن بالطريق وانا جاي لكم ارجو ان تنال اعجابكم

الموقف الاول هو
============
من مواقف الزواج يقول صاحبنا

يوم زواجي .... ( يازينه من ذكرى) كان معي كرسيدا جي ال اكس 86 ... قال الخال ( اخو الوالدة... ذاك توه مابعد صار خال) ابعطيك سيارة مرسيدس من حقات المعرض تكشخ به كم يوم ... قلت زين، المهم اتفقنا انه يوقف الشبح عند بيت أهل المره، يوم جينا نطلع... ركبنا ... دورت اللي يفتح الحبات ... مالقيته... فتحته بيدي، يوم ركبنا ... شغلت السيارة ( اشوى... الحمدلله) ... بس بحلت أدور أزرار الأنوار... ومرة تشتغل المساحات ... ومرة حبات البيبان ( لقيتهن...) ومرة ... وبعد مشقة لقيته، المهم ... جينا للمشي ... كان قدام السيارة صندوق زبالة بلاستك كبير ... يعني مالها إلا وراء.... يالله عاد وين الريوس؟؟ ومحاولة ... وثانية وعاشرة ومافيه فايده حتى توكلت على الله وصدمت صندوق الزبالة ومشيت قدام ويسره الله. المهم إن العروس درت إن السيارة مهب لي ... بدليل عدم معرفتي كيف تعمل، وكنت محرج بلحيل خاصة اني استحي قوة بس ربك هونها علي يوم اني دريت عقب ثلاثة أيام ان فستان العرس كانت متسلفته من بنت خالته وقالت خل نرجعه، قلت الحمدلله مافي حدا أحسن من حدا

ارجو ان ينال اعجابكم

وعاد انتم لا تخلوننا من المواقف اللي تعرفونهن خلونا نفرفش شوي

الموقف الثاني هو
===============
أذكر موقف صار لأحدى المعارف ..

أيام الملكه .. أول يوم فيه .. كان الرجال جاي وكاشخ وجايب معه هدية من ذيك الزينات .. ويحتري البنية بس ..تدخل ..

ويوم دخلت البنت .. ويجيك العلم .. الرجال قلبها ضحك .. يضحك .. يضحك .. ويضحك .. تقطع من الضحك.. البنت المسكينة شكت بعمرها .. قامت تدور شي ماله داعي فيها ..

احتارت البنت وعصبت وهو بس يضحك .. آخر مالها سألته .. وش السالفه ؟؟ ؟؟

قالها بعد ماردت الروح والاستقرار لفمه .. : أنا جايبلك هدية صغيرة معي .. وهي عبارة عن بلوزة .. بس للاسف طلعت نفس اللي أنتي لابستها .. ههههههههههههههههههههههه

تذكر الموقف ورجع يضحك من جديد
والحمد لله انهم تتطابقوا بالاذواق
============================

الموقف الثالي يقوووووول :

يوم خلص الرنع والرنيع .. والطقطقه والطقيق .. وأخذ المعرس عروسته .. وراحوا لعش الزوجية .. تقول الزوجة :

إني كنت مرتبكة جدا .. ومستحية منه .. لدرجة أنه سألني وش تامرين تاكلين .. وأنا ميته من الجوع قلتله مابي شي . . " مستحية البنت " لكنه والحمد لله أنه اصر علي وقال لازم تاكلين شي .. أنتي وش أكثر شي تحبينه ..

من الدلاخة والطيبة اللي فيني .. قلتله أنا مشتهيه كت كات وميرندا .. ما سمع الرجال الكلمتين الا طمر يجيب ذا اللي قلته .. ومن يوم الزواج .. وعلى نطاق اسبوع وهو يجيب لي كت كات وميرندا .. لين ما كرهتها من قلب والله

عاد انتم لا تخلوننا

[بنت^العشرين]

فكرت الموضوع حلوه لي عوده للموضوع اذا تذكرت شي

[بنت^العشرين]

عدنا

وحده من صديقاتي بشهر العسل ومسافره مع زوجها المانيا

وتتمشى معه المهم وتناظر الاجانب ماسكين بيد بعض المهم وهى وزوجها باعد عنا متر فكرت كيف تخليه يمسك ايدها
حطت ايدها على صدرها الجهه اليمين وقالت اي قلبي يعورنى

يوم ناظره زوجها ويفطس ضحك قال يالحبيبه القلب باليسار شكل مصارينتس تعورتس
خخخخخخخخخخ

[أبو عنبر التعاوني]

سلالالالالالام



والله موضــوح حلووووووو مررررره .............


وأن شاء الله نتذكر لكــم أحــد المواقــف .......


لــــي عوده .......

تحياتي لكــــــم
أبو عنبــــر

[العبرى]

السلام عليكم جميعا

عندي لكم موقف محرج صار لي

مره وحنا بالحج وبالتحديد بمنى

رايحين اقارب مع بعض

وحاطين فرشتين وحده للرجال ووحده للحريم

واثر واحد من الرجال مهب محرم لي

منسدح وماد رجلينه وواصله فرشتنا


وانا كنت حاطه شنطتي هناك

وجيت اباخذ الشنطه

ومن شدة تحمسي بالسواليف مع اللي معي ماألتفت


ومديت ايدي ومسكت شئ


وقعدت اسحب واسحب واسحب

لما تمصعت

ولا جت الشنطه ويوم التفت















واثره رجل الولد

وهو المسكين طايره اعيونه مايدري وش السالفه

وضاع وجهي من الفشيله وخليت الشنطه


تحياتي

العبرى