تقول آني مظلومه .. والوآقع يقول .. !!

[تركـي]

السلام عليكم .....

الشعب السعودي .. بكافة آصنافه ومستوياته وتوجهاته ..

تجد المرأة عندهم لها النصيب الآكبر .. في الآهتمام ..
طبعا الآ من رحم ربي ..

تجد الطفل يعيش في بيئة منزلية غالبها إجتماعات النساء ..
ويكبر ويصبح شابا ويبدأ في التعرف على آسرار المرأة ..
فتجده يعشق تلك المخلوقه ..
والبعض يتخذ حبيبة وهمية له أو حتى حقيقية ...
وعندما تكتمل ملامح الرجولة له ..
يبدأ بالبحث عن زوجة سواء برغبته أو برغبة الآهل وطبعا بتوكيل لوالدته وآخواته للبحث عن شريكة العمر والبعض ربما ينخطب له وهو لا يعلم الآ بعد الآنتهاء من ذلك ..
وبعدها يبدأ برحلة تكوين تلك العائلة الصغيرة ..
وتجده يتغير بنسبة 180 درجة عن ماكان فيه في شبابه ومراهقته طبعا بأيعاز من تلك الخليلة في البيت اللتي تنتظر النشرة الآخبارية عن يومه وآين وماذا فعل فيه ..
تجد بعضهم .. يتغير على آصحابه ويهجرهم ويتفرغ لتلك العشيرة ..
طبعا بتكتيك مدروس منهن تناقلنه وطبقنه ونجح معهن ..
وغالبا ينجح هذا التطبيق مع غالبية الشباب ..
حتى تضمن تلك الفتاة مابعد شهر العسل بأنه خاتم في يدها ..
فتبدأ باختباره وهو جالسبين آصدقائه في الآستراحةوتسئله متى تتعشون .. وتأتي بذلك التوقيت وترن عليه بهاتفه الجوال لمعرفة
ان كان سيرد أو .. سيطنشها ..
والغالب تجده يرتبك ويخرج ويرد عليها ..
معليش انا آتعشى بدق عليكي بعد العشاء ..
وتجده يأكل بسرعه ..
ومن ثم تقول له في المكالمة حبيت آتطمن عليك فقط وانك تعشيت ..
وهذا الشاب طاير في العجة بيقول .. تماام مهتمه فيني ولا يعلم بقرارة نفسه أنها مكيدة حتى لا تزوغ بعيدا عن إنظارها ..
وبعضهن اذا رآته مرتاحا تشغله بالدق عليه ..
تعال ونا لآختي والآ لاهلي والآ هات الغرض هذا اللحين وكأن
هذا الغرض سينفذ لو ماآحضره بهذا التوقيت ..

وعندما يفسخ مرحلة الثلاثينيات ..
يبدأ رفع الآصوات ..
أي نظره لو للشغاله السيرلانكية ..
انت خاين وانت ماتبيني .. وووو .. وتجلس تحن على رأسه
وكل هذه مدروسة بعناية ..

وعندما تبدأ مرحلة الآربعينيات ..
تبدأ بالطلبات الغريبة على ذلك الزوج ..
لكي تضمن الآ تزوغ عينه والآ يأتي بفكرة آرتباط بغيرها ..
يعني آشتغليه طلبات .. حتى يفلس ..
وعندما تضمن بأن ظروف الزمن قد آعيت هذا المخلوق ولم يعد قادرا على مجابهة الحياة ومابعد الخمسين والستين .. ..
تجدها .. تهتم لابنائها وبناتها ..
وتقول لهم لا تشرهون عليه ..

حتى رجال الدين والملتزمين ومفسري الآحلام ..
تجد آغلب بحوثهم ودراساتهم تتعلق بهذه المخلوقه ..
فتجدهم .. يبحثون عن فتاويهن وتفسير آحلامهن ..

حتى الآجانب وآصحاب المحلات ..
انظرو الى آشكالهم ..
تجده واقفا عند باب المحل ينتظر تلك المخلوقه لكي يقدم لها آخر عطر من ربوع باريس ..
وتجده متهندم ولا بس ومبتسم ..
بينما لو يسئله شايب وقور عن بضاعته لم يجبه أو يحاول تصريفه ..

موظفي البنوك والمواعيد في المستشفيات وكل مافيه آختلاط آتحدى يفضلك بوجودها ..

آصحاب الموضة والازياء ..
تجدهم يلهثون لتوفير آحدث الموضات العصرية ..

لكي تتوفر لهن ..
تجد السائق يفتح لها باب السيارة وباب البيت وحتى باب الغرفة واحيانا الزوج ..
معززة مكرمة ..
ليست مطالبه في أي تكاليف سواء مهر زواج أو توفير معيشة أو بيت
ولكن آكلف ماعليها يوم كامل في المشغل في المناسبات أو تفصيل ازياء من الموضات العالمية أو توفير مناسبة من حساب ذلك المغلوب ...

كانت في وقت سابق تطبخ وتنفخ وتغزل وتخيط وتكنس ووو ..
لكن حاليا مو فاضية ..
عندها مناسبة الليلة .. ولازم تتزركش عشان هذه المناسبة ..
والخدم والشغالات والسائق يقومون بالواجب تجاه الابناء .. وتربيتهم وتغذيتهم وحتى التوقيع على شهاداتهم لدى المدرسة ..

ظهرت تيارات مابين علمانية وليبرالية واسلاميه وكل محور آهتمامهم يتمركز حول هذه المخلوقة ..

ومع ذلك .. تجدها تقول وتولول .... انا مظلومه ..
وكيدها يخبر بأن تلك الدموع اللتي تنهمر منها هي دموع مختزلة ومختلطة مابين دموع الفرح والحزن لذا تجدها دائما تنهار ..

هي في الواقع .. معززة ومكرمه عند الشعب السعودي
ولكن ..
النساء لا يعجبهم العجب ولا الصيام في رجب ..

على قولة احد الزقرت ....

اذا ارخيت لها .. قالت هذا ضعيف ومسكين ولا يملك شخصية
واذا شديت عليها .. قالت هذا ظالم ومستبد .. ولا يمكن ان يملك ذره من الرجوله ..
وحتى لو عاملتها بالوسطيه لن تسلم ..

تجدها تتقن الآدوار ..
من خلال القيام بأي شخصية ..
تجدها الغير مهتمه وتجدها القويه وتجدها تتلون حسب مايتطلبه الأمر ..
ومع ذلك تجدها تتمسكن ..


لا يجيني احد مطفي النور ويقول ..
تجدها قوية على الضعفاء فقط ..

هناك دول وملوك وحكماء وخبراء
آطاحت بهم تلك المخلوقة ..
بمجرد غمزه ..
فما بالك لو آستخدمت وتفرغت لك .. بكامل قواها العقلية ..
بالكاد ستجد نفسك من ضمن طابور مستشفى شهار ..

هل هذا الكلام وآقعي أو من هرطقات تركي ..

دمتم بخير ..

[روح لايسعهآ جسـد]

كل هالسطور اللي مكتوبه فوق يعني تبي تفهمنا ان الحرمه عندنا اخذه حقها وزياده ؟
كلامك نظري وسطحي جدا ومو واقع
طيب شوف القوانين عندنا واحكم
شف الرجل السعودي اذا تزوج اجنبيه متى تحصل على الجنسيه
والمراه السعوديه كيف زوجها الاجنبي يحصل على جنسيه
شف المراه ماتقدر تسوى شيء الا بولى امر
بينما الشاب يسوى اللي يبي ماحد يقوله شيء
اخر قرار السماح بالشيون يدخلون المولات
روح شف المولات من بعد القرار البنات اضربن وانحرمن من شوفت هالاجانب اصحاب المحلات المبتسمين الوسيمين اللي تقول عنهم
حرمتونا من الزواج بهم وتبي تحرموننا من شوفتهم
حسبى الله عليكم
لا عاداتكم ولا تقاليدكم ولا حتى قوانينكم معنا
المراه السعوديه مظلومه
وخل عنك الجوال والاتصال وطفة شهر العسل وانه يقوم من العشاء عشان يكلمها هذي اسمها طفه وتروح مع الوقت بحكم ان السعودي مشفوح ومايصدق يشوف زول مره
الحين المراه لو تبي تتطلق من زوجها لازم سبب شرعي وادله وشهود عشان تعتق نفسها من الرجل
بينما الرجل لو يبي يطلق طلق وهو مغض ولا احد يحاسبه هو حر
وفوق هذا ياخذ فلوسه ان بغى حتى لو هو كارفها كرف مع ان الرسول صلى الله عليه وسلم كانت اذا جت له الحرمه تبي تطلق من زوجها لو مافي شبب طلقها منه بشرط انها ترد له المهر هنا بالسعوديه مافي شيء اسمه انا مابيه وابي اطلق منه لاني زهقت منه ولا جازلي وبالعربي ماحبيته لا المراه السعوديه يتعاملون معها على انها جماد لاتحمل مشاعر
هذا من غير انها محرومه من القيادهـ ومضطره تروح مع هندي وتنذل مذله اذا بغت مشوار واخوانها مو فاضين لها
وفوق هذا هو مايعيبه شيء بينما هي الكل يشقى فيها
ولاتنسى بعد اذا مرضت ام زوجها مجبوره هي تقوم فيها وبناتها اللي هي امهم في بيت ازواجهم يقومون في امهات ازواجهم بالله عليك لو كل وحده قامت في امها مو احسن واكثر اجر ؟
كل هذا عشان كل وحده ترضى زوجها ..اما اذا هي ولدة تروح لبيت اهلها تقوم فيها امها
سبحان الله الزوجه اذا مرضت تروح لاهلها
اما اذا مرض اخت زوجها او امه هي تقوم فيها
بالله عليكم وش ذا النظام والعادات الفاشله تبعكم
ولو تقول لزوجها ابي اروح لامي تعبانه سمح لها يوم الا يومين ولعن جدفها بعدها وذلها مذله
والله لا عاداتكم ولا قوانينكم ولا نظرتكم ولاتعاملكم مع المراهـ

[طايرتن بوهته]

أخ تركي وإحتراماً لفكرك
لو النساء الإفتراضيه لديهن العيش الرغيد وإنها تستوفي حقها وازود ولا تواجه إلا كما تظن سواء من المجتمع او البيت او الابناء لما خصها ورفع الشرع بكثير من المواقف منزلتها وشانها وهذا لعظم مايعتريها في هذه الحياة وتظل صابره
رد شخصي

[ضمير بريدة]

الحوار في هذا المنتدى مع النساء يشعرك بالاحباط
بالله يا روح لا يسعها جسد هل هذه لغة حوار !!!!

[رفيــع الشــان]

الحمد لله المرأة اخذت حقوقها بالشريعة الاسلامية
حتى لو جاء من يتكلم ويحاول يحور الموضوع
اغلب القوانين عندنا ترجع للشريعة الاسلامية وانتقادها وتنقصها تنقص للدين
المرأة مكرة معززة
حتى لو سمعنا او شفنا مشاهد شاذة لكن نحكم على الغالب

روح بخصوص الجنسية
بأي حق ياخذ زوج السعودية جنسية السعودية
خير البلد لأهله الاصليين
والزوجة ما هي مجبرة تتزوج اجنبي هي عارفة القوانين

تركي الله يعطيك العافيه على ها الموضوع
والله يعينك على اللى جاي

[ضمير بريدة]

ما ذكرته أخي تركي في وصفك هو وصف للزوجة النكدية ، وهي موجودة بكثرة في الجيل الحالي من المتزوجات ، جيل العشرينيات ،
كم نسمع ما يؤلم من حال بعض الشباب وحياتهم مع زوجاتهم ، مشاكل لا تنتهي ، نكد ، هم ، طلبات ، تذمر ، مشاكل مع أهله .
ولا يعني هذا عدم وجود النساء الصالحات المصلحات ، التي تسر القلب والخاطر .
بالمقابل أيضا يوجد رجال ليس لهم من اسمهم نصيب ، وإن كان الغالب من الرجال من المغلوبين على أمرهم في مجتمعنا وخاصة مع فتيات العشرينات !!!!

[روح لايسعهآ جسـد]

كيف معززه ومكرمه عند الشعب السعودي اشرحها لي هذا ؟
انا واغلب اللي اعرفهم ماعندهم لا سواق ولاشغاله
وبعدين انا والكثير من النساء
مابي والله ان المفسر والا الملحن والا العلماني والا شاب سعودي يركض ورا والا يناظر متطالباتي والا يحلم فيني
والا يطلع لي مديل فستان والا يصنع لي عطر
كل هالامور( تجاريه ولها مقابل يعني هو جالس يتشغل على نفسه مو يشتغل عشاني )
انا ابي حقوقي
حقوق ملموسه
استفيد منها بالقانون السعودي اقدر من خلالها ابنى مستقبلي
مو يكون مستقبلي واقف على رجل انتظره يجي يتزوجني زواج تقليدي
ويا تصيب ياتخييييب لا وافرغ عقلي له عشان اخليه خاتم بيدي بعد
يعني مايجيني هو عارف اللي له واللي عليه
لازم اجلس نص عمري اعدل فيه وممكن اذا تعدل يصكني بحرمه ثانيه

رفيع الشان
طيب ليه السوريه اذا اخذت سعودي وجلست خمس سنوات اخذت الجنسيه وياكثر اللي تسحب على زوجها اذا اخذتها ؟
ليه هي لها حق والزوج الاجنبي ماله حق ؟
مجبورين ناخذ اجنبي عشان الاسلو ب والشكل
و انت عارف ان السعودي ماله امان
مثل ما السعودي يبحث عن اجنبيه يدور الزين
احنا بعد ندور الزين
لكن هو القانون يدعمه بينما احنا القانون ضدنا
ليه قلي ليه ؟



ضمير بريده
مانت مجبور تقرا ردودي انا كاتبتها لصاحب الموضوع
يعني لازم يصير رايي من رايك عشان تعجبك لغتي

[طايرتن بوهته]

اقتباس:  المشاركة الأصلية كتبت بواسطة ضمير بريدة     ما ذكرته أخي تركي في وصفك هو وصف للزوجة النكدية ، وهي موجودة بكثرة في الجيل الحالي من المتزوجات ، جيل العشرينيات ، كم نسمع ما يؤلم من حال بعض الشباب وحياتهم مع زوجاتهم ، مشاكل لا تنتهي ، نكد ، هم ، طلبات ، تذمر ، مشاكل مع أهله . ولا يعني هذا عدم وجود النساء الصالحات المصلحات ، التي تسر القلب والخاطر . بالمقابل أيضا يوجد رجال ليس لهم من اسمهم نصيب ، وإن كان الغالب من الرجال من المغلوبين على أمرهم في مجتمعنا وخاصة مع فتيات العشرينات !!!!

العشرينيه ابخص بما يدور في هذا الزمن وما يكون عليه الزوج العشريني لذلك تصبح زوجه ليست نكديه بل زوجه غير آمنه تحدها على النكد وعدم الإستقرار

[طايرتن بوهته]

اقتباس:  المشاركة الأصلية كتبت بواسطة رفيــع الشــان     الحمد لله المرأة اخذت حقوقها بالشريعة الاسلامية حتى لو جاء من يتكلم ويحاول يحور الموضوع اغلب القوانين عندنا ترجع للشريعة الاسلامية وانتقادها وتنقصها تنقص للدين

الشريعه كامله وواضحه ولكن اين من يطبق ؟!!

[ضمير بريدة]

فرق بين أن يكون رأيي من رأيك وبين لغة الحوار والنقاش !!! ربما لاني كنت في منتدى غالبية العضوات فيه على مستوى عالي من الثقافة والبراعة في الحوار من مجتمعات عربية مختلفة ، ربما لا استصيغ لغة الحوار عند النساء هنا

[روح لايسعهآ جسـد]

اقتباس:  المشاركة الأصلية كتبت بواسطة ضمير بريدة     فرق بين أن يكون رأيي من رأيك وبين لغة الحوار والنقاش !!! ربما لاني كنت في منتدى غالبية العضوات فيه على مستوى عالي من الثقافة والبراعة في الحوار من مجتمعات عربية مختلفة ، ربما لا استصيغ لغة الحوار عند النساء هنا

طيب رح كمل الحوار معهن اذا احنا ما اعجبناك
والا تعامل معنا بدون ماتعطيني رايك بحوارنا
لان رايك اساسا مايهمني
:d

[رفيــع الشــان]

اقتباس:  المشاركة الأصلية كتبت بواسطة روح لايسعهآ جسـد     رفيع الشان طيب ليه السوريه اذا اخذت سعودي وجلست خمس سنوات اخذت الجنسيه وياكثر اللي تسحب على زوجها اذا اخذتها ؟ ليه هي لها حق والزوج الاجنبي ماله حق ؟ مجبورين ناخذ اجنبي عشان الاسلو ب والشكل و انت عارف ان السعودي ماله امان مثل ما السعودي يبحث عن اجنبيه يدور الزين احنا بعد ندور الزين لكن هو القانون يدعمه بينما احنا القانون ضدنا ليه قلي ليه ؟

معروف ان الزوجة تتبع للزوج
حتى بالدول الاخرى
اسمها يتغير وتنسب لزوجها
الابن ينسب للاب وليس الام
في ها القانون احترام لأبناء البلد الاصليين
اذا تزوجتي بالاجنبي تقدري تاخذي نفس جنسيتة
الحمد لله السعودي له الامان وكلامك هذا فيه انتقاص لوالدك ولاخوانك
التعميم لغة خطأ
اذا كان فيه أخطأ نعتبرها فردية وخاصة بالاشخاص

[رفيــع الشــان]

اقتباس:  المشاركة الأصلية كتبت بواسطة طايرتن بوهته     الشريعه كامله وواضحه ولكن اين من يطبق ؟!!

طبيعي انه ما راح تطبق كاملة
وفيه حالات نسمعها وعشناها
ومحاسبين على التقصير
وإلا ما شرع العقاب والثواب
لكن ما نعمم الحكم بشواذ

[ضمير بريدة]

اقتباس:  المشاركة الأصلية كتبت بواسطة روح لايسعهآ جسـد     طيب رح كمل الحوار معهن اذا احنا ما اعجبناك والا تعامل معنا بدون ماتعطيني رايك بحوارنا لان رايك اساسا مايهمني :d

بإذن الله لن اشارك في حوار أنت فيه ، مع أن الشق هنا في هذا المنتدى أكبر من الرقعة ، ليست روح فقط بل غالبية العضوات هنا الحوار معهن متعب ومحبط

[روح لايسعهآ جسـد]

اقتباس:  المشاركة الأصلية كتبت بواسطة ضمير بريدة     بإذن الله لن اشارك في حوار أنت فيه ، مع أن الشق هنا في هذا المنتدى أكبر من الرقعة ، ليست روح فقط بل غالبية العضوات هنا الحوار معهن متعب ومحبط

رافقتك السلامه