البراقع عمرها ماغطت القلب وحنينه
........................ والليالي عمرها ماغطت بروق السحايب !
ياكثر ماجرّ صوت القلب بلحون الغبينه
........................ وانطرب دمعي وحوّل مع لحون القلب ذايب !
خيّل الحظ وتركني يالله انك لا تهينه
........................ للظروف القاسيه والوقت ويدين النشايب !
يا العيون الناعسه يا ام المراميش السنينه
........................ والله ان وقعك علي اشد من وقع الحدايب !
لا تصدين النظر عني وتبدين السكينه
........................ دامني اشوف في نظراتك اطراف اللهايب !
ماقدرتي يالحزينه في الهوى لاتظهرينه
........................ دمعة المشتاق ماهي مثل دمعة عين تايب !
لآحت الذكرى بعيني من لمحتك يالحزينه
........................ وابتسم من حيرتي واقول يادنيا العجايب !
كيف كنا نلتقي والسعد يرعانا بعينه
........................ وكيف صرنا نلتقي وجروحنا حمرٍ عطايب !
اختلف وجه الزمن وأشحب وعقّد حاجبينه
........................ كنت اشوفك حاظر وذا اليوم اشوفك بس غايب !
مانسيت العهد الاول لو بغيتي تنقضينه
........................ حافظه حفظ الحواجب للعيون وللهدايب !
تذكرين ايامنا والحب باقي تذكرينه
........................ والبراءة يوم نسال بعض وش معنى مصايب !
وطبعة السجاده برسمات مكه والمدينه
........................ وضحكنا وسط الركوع وهمسنا من خلف شايب !
والشغب والبرقع اللي تلبسينه قبل حينه
........................ يوم نضحك ما درينا انه لفرقانا سبايب !
لا تنسيك البراقع طاري الحب وسنينه
........................ [ غطوة للوجه ماهي غطوه لشوق الحبايب ] !
لـِ سعيد بن مانع