%% الساعه 6:30 العصر %%
" صدق الحريم ما ينعطن ويه "
هالجمله كانت تدور ف باله من عقب ما توهق من طلبات جليثم و الريم اللي ما صدقن يوم عرض عليهن ياخذن اللي يبنه ... و هن ما قصرن ما خلن شي في خاطرهن ... و عقب ساعتين من الحواطه خلصن مشترياتهن ...
سيف: ما بغيتن تخلصن ... حشى تم شي ما خذتوه؟؟
جليثم: تونا حلوين و نفرفش شو اللي جلبك جي مره وحده؟؟
سيف: اظني تعرفين السبب ... و اذا عرف السبب بطل العجب ...
جليثم: هههههه ... انته بروحك يبت هالشي لنفسك ... نحن ما طلبنا ...
سيف: توبه خلاص ماعيدها ...
جليثم+الريم: هههههههههههههه ...
سيف: هيه اضحكن شو وراكن؟؟ حريم ما تنلامن ...
الريم: احم احم ... نحن بعدنا بنوتات صغار طال عمرك ...
سيف: اقولكن ... يالله طوفن جدامي و عن الهذره الزايده ...
جليثم: هذا و انته حبوب جي ... عيل لو واحد ما ينطاق شو بيسوي ... بس ماقول غير الله يعين حرمتك عليك ...
سيف و هو يتذكر ملامح امل اللي الين الحين راسخه ف باله: هههههههههه حرمتي عاد حاله خاصه ...
الريم: انزين بنجوف ...
و جذي خلصت جولتهم التسوقيه بضحك و سوالف ... و هم نازلين من ع الدري المتحرك اللي نازل لاحظن الريم و جليثم اثنينه كانو توهم داشين و صعدو الدري اللي طالع ... و يوم دققن في ملامح هالثنينه عرفو واحد منهم تمن يطالعن بعض مستغربات ... معقوله الصدف تجمع ببينهم مره ثانيه؟؟ بس اللي يختلف هالمره انه ما جافهن و هن نازلات لانه كان مندمج بالسوالف مع اللي وياه ... ضحكن الريم و جليثم على اشكالهن و هن مبهتات ...
سيف انتبهلهن و قال بصوت واطي عن يسمعنه: الحمدلله و الشكر ...
جليثم: تراني سمعتك ... شو قلت؟؟
سيف: ابد ولا شي ...
جليثم: متأكد؟؟
سيف: هههههههههههههه ... اسميكن خبايل ...
الريم: زين مشكور يا ولد عمي ...
سيف بسخريه: يالله جدامي اجوف تراني عطيتكن ويه وايد ...
جليثم: افتحلنا السياره من الريموت و نحن بنجدمك ...
سيف: استريحو مكانكم ... هالرمسه ما تمشي عندي ...
جليثم ابتسمت: والله انته اللي قلت مب نحن ...
سيف: بنات ما تنغلبن بالرمسه ...
جليثم+الريم: ههههههههههههههه ...
وصلو الجماعه صوب السياره حطو الاغراض ف الدبه و ركبو و تحركو سايرين صوب البيت ... عكس ما توقع سيف كانو هادين ف السياره و ما سمع لهم حس ... حط ف باله انهن تعبن من الرمسه ...
معقوله الريم و جليثم ف مكان واحد و يملن من السوالف؟؟ انته غلطان يا سيف بس تلاقيهن متحرقصات يبن يرمسن ع راحتهن و مب قادرات يترين الين يوصلن البيت ^_^
*~*~*~~*~*~*
%% الساعه 7:12 فليل %%
في داخله احساس غريب يمنعه يسير البيت ... من امس و هو حاس بهالشي ... يمكن لانه الشقه اهدى من البيت على الرغم من ناتاشا اللي وجودها يذكره بالذنب اللي هو شالنه و اللي بسببه جتل انسان بريء ما جد غلط عليه ... نزل من سيارته عقب ما وقفها جدام باب الشقه و بخطوات متثاقله اتجه صوب الباب و دش ... كالعاده الهدوء كان طاغي و مافي اي اثر لناتاشا ... لكن الشي اللي استغرب منه وجود ناصر ف الصاله ...
خالد: شو يايبنك هني؟؟
ناصر وقف و جابل خالد: ياي عشانك ...
خالد باستهزاء: لا يكون ولهت عليه و انا مادري؟؟
ناصر: يعني ... تقدر تقول هالشي ... بس في سبب ثاني انا ياي عشانه ...
خالد عق بعمره ع الغنفه و هو يتنهد بعمق: قول اللي تباه بسرعه و اخلص ... انا مب فاضي لك ...
ناصر رد يلس عداله: شو فيك على ناتاشا من امس؟؟
خالد و هو توه يستوعب عدم وجودها: ليش؟؟ هي وين الحين؟؟
ناصر: جاوبني على سؤالي قبل ...
خالد تنهد بضيج: ابا اردها بلادها ... خلاص ماعاد لها لازمه ...
ناصر ضحك بخبث: هههههههه ... عقب الانجاز العظيم اللي سويته وين تبا تجوف رقعة ويهها بعد ...
خالد اعتفست ملامحه من اللي قاله ناصر: اي انجاز هذا اللي ترمس عنه؟؟
ناصر: تعرف عدل ما يحتاي اخبرك ...
خالد نش من مكانه و قال بانفعال: ما كان هذا اللي اباه ... هاي غلطه و انا ندمان عليها ... و لازم اصلح غلطتي ...
ناصر: و يوم بترد البنت بلادها يعني صلحت غلطتك؟؟ و الولد اللي دفع الثمن من حياته؟؟
خالد يود راسه و هو يحس بالدنيا تدور حواليه: بس يا ناصر بس ...
ناصر: على العموم انا مب ياي اناقشك في هالسالفه ... بس ياي اوصل لك الرمسه ... ناتاشا تقول لك من اليوم و رايح لا اتعب روحك و تدورها لانك ما بتحصلها ... "و ابتسمله بخبث" اشوفك على خير يا ولد خالتي ...
تم ناصر واقف فتره يتريا رد خالد اللي تأخر زياده عن الزوم الشي اللي خلاه يتجه صوب الباب و يظهر و يخلي خالد بروحه غارق في افكاره اللي ودته بعييييد و تأنيب الضمير اللي ملازمنه ليل نهار ...
*~*~*~~*~*~*
%% الساعه 7:30 فليل %%
تعبت من كثر ما تتصل به و هو ولا ع البال ... من امس ما سمعت له حس و هالشي اللي مخبلبها و مب مخلنها ترتاح ... طول اليوم و هي سايره راده ع الحجره تتريا منه اتصال لكن كل امالها تروح هباءً عقب ما تجيك ع التلفون اللي من امس ما سجل ولا missed call ...
"هذا شكله يبا يخبلني .... افففففففف بس لو اعرف هو وين هايت"
ظهرت من حجرتها و ملامح الغيض مبينه ع ويهها ... و اول من لاحظ هالملامح هو محمد اللي ف نفس الوقت كان ظاهر من حجرته ...
محمد بقلق: اسما شو فيج؟؟
اسما ما قدرت تصيطر على نفسها و انفجرت صياح ...
محمد قرب صوبها: اسما شو فيج ليش تصيحين؟؟
اسما: خالد من امس ما رمسته ...
محمد و القلق بدا يختفي من ملامحه: بس؟؟ هاللي يصيحج؟؟ اكيد تحصلينه ف العزا الحين؟؟
اسما باستغراب و هي تمشش دموعها: اي عزا؟؟ محمد منو متوفي ...
محمد: نسيبهم متوفي ... جيه انتي ما تدرين؟؟
اسما: لا محد قال لي ... انزين ليش ما اتصل بي عقب ما رد من العزا؟؟
محمد: والله عاد هالسؤال سإليه بنفسج لاني مادري عن شي ... يالله انا طالع تامريني بشي ...
اسما: لا برايك ...
ظهر محمد عن اسما اللي كملت طريجها الين الصاله وين ما كانت امها يالسه ...
سلامه و هي تتفحص ويه اسما: اسامي شو فيج؟؟ ليش كنتي تصيحين؟؟
اسما: ما فيه شي؟؟
سلامه: عيل ليش تصيحين؟؟
اسما: خالد ما اتصل بي من امس ...
سلامه: هههههههه ... و كل هالصايح بس عشان ما اتصل بج ... يامي ريلج عنده الحين اكيد مشغول ...
اسما: عاد مب طول اليوم هو العزا ...
سلامه: عاد تفاهمي انتي وياه عقب ...
تمت اسما صاخه فتره و ردت حجرتها على امل انها تحصل مس كول من خالد لكن كالعاده ولاشي من اللي بغته صار ... ردت اتصلت به للمره الاخيره عل و عسى يتعطف عليها و يرد ... تمت تتريا الرد فتره و ما صدقت يوم سمعت صوته ع الطرف الثاني ...
اسما بلهفه: خالد انته وين؟؟ ليش ما اتصلت بي؟؟
خالد ببرود و بصوت مبحوح: هلا اسامي ...
اسما بقلق: حبيبي شو بلاه صوتك؟؟ شي مضايجنك؟؟
خالد: ولا شي حبيبي ... شحالج انتي؟؟
اسما: حالي من دونك ما يسوى ... خوفتني عليك ...
خالد: حقج عليه غناتي بس كنت مشغول شوي ...
اسما: هيه صح ... عظم الله اجرك ...
خالد: اجري و اجرج ان شاء الله ...
اسما: بعدك في العزا؟؟
خالد بتردد: لا انا في البيت الحين بس تعبان شوي ... برد اتصل بج باجر ان شاء الله ...
اسما: خلاص فديتك تحمل على روحك ...
خالد: ان شاء الله ... و انتي بعد تحملي ع روحج ...
اسما: ان شاء الله ... مع السلامه ...
خالد: مع السلامه ...
بندت اسما عن خالد و هي مب مطمنه ابد للطريقه اللي كان يرمسها بها ... كانت حاسه انه خالد ثاني يختلف عن خالد اللي تعرفه ... حست بنغزه ف قلبها ... و الوضع هذا مب مرتاحتله ... و عشان تتخلص من هالافكار ردت الصاله تيلس تسولف ويا امها ...
*~*~*~~*~*~*
%% الساعه 8:00 فليل %%
صارلها ساعه و هي يالسه ملانه ويا نوف و عفرا اللي سوالفهم تملل بالواحد ...
امل بخاطرها: لهالدرجه تفكيرهم طفولي؟؟ و انا اللي كنت اقول مافي يهال بريئين هالزمان ... اوووه صدق ما عندج سالفه يا يزوي يوم سرتي و خليتيني ويا هاليهالوه ...
و في الطرف الثاني من البيت ... و تحديداً في الصاله ... كالعاده دشت الصاله يايه من برع و حصلت امها يالسه تترياهم على نار ...
اليازيه و هي تحاول تسرع باتجاه الحجر: السلام عليكم ...
شمسه: و عليكم السلام ... يوم بتسلمين وايهيني مب جي تسلمين من ورى ظهرج ...
اليازيه: تعبانه و ابا اسير الحجره ارتاح ... عن اذنج ...
شمسه: امل تترياج من الصبح سيريلها بتحصلينها ف حجرة نوف ... جي ما رديت عليها يوم اتصلت بج ...
اليازيه تأففت بضيج من طاري امل و قالت بخاطرها: اففف هذي شو يايبنها بعد؟؟ "و ردت على امها" كان التلفون ع السايلنت ما سمعته ...
صخت شمسه عنها و ردت تطالع التلفزيون ... و اليازيه على طول دشت حجرتها بدون لا تسير صوب قوم امل ... امل اللي كانت ف الحجره اللي عدال حجرة اليازيه سمعت صوت الباب و هو يتسكر فقامت و طلعت من حجرتها ... سارت صوب حجرة اليازيه و دقت عليها الباب ...
اليازيه: منو؟؟
امل: انا امول ... يالله فجي الباب ...
اليازيه: صبري ببدل ...
امل: اوكيك لا تأخرين ...
تمت امل تتريا اليازيه اللي طولت زياده عن اللزوم ... توها يايه بتسير عنها تبطل الباب ... و امل اول جافت اليازيه وايهتها و دشن الحجره و سكرن على عمارهن الباب ...
امل: هالكثر تبدلين؟؟
اليازيه: تعبانه شو اسوي ...
امل: سلامات ما تشوفين شر ...
اليازيه: الشر ما اييج ...
و عم الصمت فتره ...
امل بتردد: صح الكلام اللي سمعته؟؟
اليازيه تغيرت ملامح ويهها: هيه صح ...
امل: انزين ليش ما خبرتيني؟؟
اليازيه: اخوج ما خبرج؟؟
امل تلعثمت و ماعرفت شو تقول: امبلا قال لي بس ما سألته عن كل شي ...
اليازيه: و هو فيه شي ثاني تسإلين عنه؟؟
امل: لا ... بس ... ولا اقولج ولا شي ...
اليازيه بضيج: امول اذا يايه ترمسين عن هالسالفه اقولج تفضلي من غير مطرود ...
امل انصدمت من طريقة اليازيه: هاي طرده كاش ف الويه ...
اليازيه: قلتلج من غير مطرود ...
امل: انزين ما علينا ... انا مب يايه عشان هالسالفه ...
اليازيه: يكون احسن بعد ...
صخت امل عن اليازيه و هي مب عارفه شو تقول لها ... حست انه اليازيه متغيره عليها تغير جذري ... مب هي نفسها اليازيه اللي كانت تترجاها بس عشان تقول لها شي عن منصور ... شو اللي غيرها لهالدرجه و هي اللي كانت تتوقع انها بتستانس اذا خطبها منصور؟؟ هالشي اللي كان محير امل اللي اضطرت تغير السالفه هاي الى اي سالفه حتى لو عن الدراسه اللي تكرهها خير شر ...
*~*~*~~*~*~*
العرض الشجري