على طاري بغيت أنسى نسيت البارحة لأنسـاك
ذكرتك لين نسيانـي .. نسانـي فـي محطاتـك
وش انسى دامك المرسى وانا العايش على ذكراك
حرام الموت في لحظـة غيابـي عـن مناجاتـك
تعال وغطني جفنك .. وانا جفني يصير غطـاك
ابفرش لك خفوقي والضلوع العـوج مركاتـك
ابدله عن جميع الخلق واسكن داخلـك وابقـاك
اصير أقرب من حروف الكلام لـطاهر شفاتك
اتوهك واستدلك ثم اتوهك داخلـك وألقـاك
ابسكن خافقك حتى أصير بـداخلـك ذاتـك
ابشرب من عروقك لين تروى رغبتي بـدمـاك
ابسقيك الوريد ودم جوفي واكسـب رضاتـك
بهيم بغربتك ليل ومتاهـات وسفـر وأفـلاك
ابسهر فيك واسمر مع دجـى ليلـك ونجماتـك
ابيك الضحكة والفرحة .. بشوف العيد في عيناك
وابيك اكثر حزن من جور عبراتـك ودمعاتـك
بزورك في دجى ليل المسـاري غايتـي لقيـاك
بضمك ثم أتوووه الليـل كلـه عـن نهاياتـك
ابغرق في بحر سود العيـون وبشربـك وارواك
بهجك في خفوقي حلم يطـوي بـي مسافاتـك
ابي تكره غيابك يوم تذكـر مبعـدات خطـاك
ابي تشتاقني بين انتهـاض الرمـش واغضاتـك
اهيجن لك .. ابي اسمع صدى صوت الغنى جواك
تهيجن لي .. تبي تسمع صدى صوتك وكلماتك
ابيك تعيشني واْخذ الخفوق وماحـوى يفـداك
وابي قلبك لي الملفـى وبستوطـن مساحاتـك
ابي بيض النوايا هي نصيبي فـي حـدود حمـاك
وانا بفتح لك ابواب المدينـة وانـت وسواتـك
خذ بـثارك من غيابك .. وانا بآخذ بـثار بطاك
ابقتل فيك كل غياب واحيـي فيـك جياتـك
حبيبي ما بقـى فينـي بقايـا تستحـق جفـاك
بقى تالي هداد ضلوع تنعـى ضيـم طعناتـك
انا محتاج لـك ماعـاد حيلـي يالجفـا يقـواك
تعااال وظمني واتـرك حديـث التيـه لمرآتـك
وعد مني آليـا ضمـت يمينـي يالغـلا يمنـاك
نذر لنسى معك ما فات من عمري ومـا فاتـك
وإذا لازال بك رغبة تهجـك للجفـا تنخـاك
وعجز قلبي يـردك عـن نوايـا درب غاياتـك
فلا لي حـول بعـد الله ولا لـي قـوة تقـواك
بلـوّح فـي أمـان الله يـا المقفـي بمشهاتـك
وبرجع من جديد انسى وبنسى لا أذكرك وأنساك
وبظل أنسى وأعيد أنسى ألين أنسـى بداياتـك
العرض الشجري