بغيت اصير هامور وطلعت سردينة..

[خطاوينا]

[align=center]أكثر واحد ما احبووووووووش في المنتدى..
واحد اسمه (خالد) ليش لأن نكه أحمر مدري عنابي..
لكن المهم أنه لون من مشتقات اللون الأحمر..
:
بقص لكم قصتي مع اللون الأحمر.. وكيف انقلب عشقي له لكره ابدي..

يعود عشقي للون الأحمر وانا عمري 5 سنوات..
اول مرة عشقته..
كنت رايح للبقاله اللي جنب بيتنا.. علشان اشتري فصفص..
المهم لقيت بنت زوينه قدي.. خدودها حمر..
البنت كانت قدي.. وجنسيتها مصرية.. عاد مستحيل تكون سعودية..
انتو عارفين السعوديات خدودهم شهب.. من الغبار والشمس.. والعوامل المناخية الأخري..
:
من يوم شفت خدودهااا الحمر عشقت اللون الأحمر..
صرت كل ما اطلع من البيت البس فنيلة رياضة حمراءء.. والبس فوقها الثوب (الاجبع) وافتح الأزرة الاربعة علشان تبين الفنيلة..
وأطلع شبر من السروال الأحمر..
وأروح اشتري فصفص علشان اشوفها..
:
البنية الصغيرة.. خلصت تأشيرة ابوهااا وسافرووو..
عاد انا خشية في دوااامة حزن..
وجلست مع نفسي.. بعد ما نحفت من الحب..
قلت يا جيفارا لازم تنسى المصرية.. وتقنع نفسك انك كنت تحب
اللون الأحمر..
:
المهم من ذاااك اليوم صرت أموت في اللون الأحمر..
بعد ما دشيت المدرسة.. صرت أفطر بيض مسلوق وأكب لتر شطة..
واتغدى تونه بالشطة.. والعشاااااء بطاطس بالكاتشب..
ويوم يجي آخر السنة واشوف الدواوير الحمر على درجاتي.. اتشقق من الفرحة..
:
في نص الدراسة الابتدائية.. ما اذكر بالضبط بس يمكن في رابعة ابتدائي..
ومن عشقي للون الأحمر.. صرت دموي.. ما فيه بزر في الحارة الا وفلقته وتلذذت بدمه..
حتى لما يأخذ البزر بثاره ويفلقني.. وتجي أمي تحط مسمار على راسي علشان توقف الدم كنت اندس في عشة الحمام علشان أتلذذ بلون دمي..
"المسمار هو العويدي اللي يحطونه على القهوة"..
:
المهم دشيت الثانوية.. وصرت احب الشتاء..
علشان اللبس ثوبي العنابي.. وجزمتي العنابية.. (امحق كشخة.. )..
:
شارلي ابوي كراسيدا حمراء ومراتبها حمراء.. ومن زود عشق اللون الأحمر لزقت ورق شفاف أحمر على النور الداخلي.. (منتب عاقل يالرومنسي)..
:
بعد ما كبرت تعرفت على شباب.. واستاجرنا استراحة..
أغلى واااحد عندي في الاستراحة واحد اسمه ابو بندر..
تدرون ليش لان عيونه حمررررر "المسكين عنده حساسية في عيونه"..
وكل ما جاء يتعالج.. اكذب عليه.. وأقول انتبه يمكن يعطونك علاج يفقع عيونك..
انا من جد عشقت عيونه الحمرر.. ولا ودي يعالجهاااا..
:
المهم جت المرحلة الحاسمة اللي كرهت فيها اللون الأحمر..
بعد ما توظفت نذرت نفسي للعمل.. وتوظفت في ثلاث وظايف..
أطلع من البيت الساعة 6 الفجر وأرد الساعة 12 في الليل..
كل هذاااا علشان ابني بيت.. بيت يعني منزل..
:
خمس سنوات وانا اتعب واشتغل.. وديون وأقساااط..
حققت حلم حياني.. وبنيت الفلة.. في حي اشبيلياا.. في الرياض..
جاءء وقت التأثيث.. ما كان عندي مصاري..
جيت بأثث اي كلام..
المهم جاني صديقي هامووور الأسهم والمحلل الاقتصادي..
وعطاني ذااااك الشور "الزفت"..
قال والله حراااام.. تبني فله بحوالي 800 ألف وتروح تأثثها اي كلام..
قلت له: يا بعد قلبي رحمتني ونويت تسلفني..
قال مجنون انا اسلفك.. وتروح تطلع صك اعساااار وتروح فلوسي..
قلت طيب وش السواااة..
قال بع الفلة ودش بفلوسها سوق الأسهم..
بعد شهرين تدبل.. وتعمر فلة جديدة..
منها تتلافا الاخطاء في العمار.. ومنها تسدد ديونك.. وتأثث أثاث كلااااااس.. ويبقى لك مبلغ محترم تكمل فيه مسلسل التدبيلات في سوق الأسهم..
:
رحت للبيت وأعجبتني الفكرة..
قلت يا ولد خوش فكرة..
دبل في أقل من شهرين..
تعمر من جديد.. تسدد الديون.. وتلبق البي أم دبليو في البايكه..
والباقي تروح تنقط على النور في سوريا..
:
بعت الفلة بـ 800 ألف ريال ..
ويوم جاء 22 فبراير 2006.. ويفصلوني من وحده من الوظايف..
ووحده كنت تاركهاا من شهرين لأني حسيت بتعب..
ما بقى عندي الا وظيفة الحكومة.. وراتبها الخايس..

يوم فصلوني جاني الهامور.. قال ضايق صدرك من الفصل.. قلت اي والله..
قال حط فلوسك في السوق..
وسافر لكازاااا.. وووسع صدرك.. وأجلس شهر..
وترجع تلقى المحفظة غاصة بالفلوس..
ونصيحتي أذا رجعت افصل من الحكومة.. لانك بتصير هامور..
:
المهم سافرت ورجعت لقيت نفسي سردينه مو هامور .. "السردينة سمكه صغيره غلبانه كل سمك البحر يغفصونهاا"..
جيت من السفر الا اللون كله أحمر.. والمحفظة خسرانه 80 %.. والمؤشر عند الـ 14 الف نقطة..

والله وأطمر لصديقي الهامور.. قلت ووش صاااار.. قال جني أرباح بسيط..
قلت وش الحل قال عزز المحفظة..
قلت كيف: قال أدخل بسيولة جديدة.. علشان تعوض ودبل بسرعة..
قلت يالله بسرعة يدك على السلف قبل يرتد السوق..
قال انقلع ما بقى الا انت اسلفك..
:
المهم طمرت لصديق طفولتي..
قلت تكفى يا سنايدي ابي سلف..
قال عندي في البنك 113 ألف خذها كلهااا..

والله واخذها وأطمر في ذااااك السهم..
وخذ يا نسب حمررر.. يلعن شكلهم كأنه ينتظروني ادخل..

المهم من ذااااك اليوم كرهت عشقي القديم اللون الأحمر.. والسبب الأسهم منهااا لله..

وبديت أقنع نفسي ان الحياة رحلة.. لا يهم فيهااا تعيش فقير والا غني.. المهم تستعد لما بعد الموت..
توته توته.. انتهت الحتوته..
:[/align]

[بــرمــودا]

مجنون مجنون مجنون ياجيفارا وربي تقطعت من الضحك يامصاص الدماء ,,أجل عشقته علشان عيونه بهن مرض وحمر ومن اللعانه تقول له لاتعالج علشان عشقك يالدموي للون الأحمر ,
بالفعل أنت مكسب للمنتدى ويبارك بأريج الحياة وذوقها الراقي ,,بس مثل ماقلت لك فيه خطوره على قلمك من الإغتيال ,,,وبعدين أنا خابر (خالد ) بريداوي 9وش اللي حصل؟؟؟؟؟؟ دمت مبدعا أيها العبقري الجيفوري

[خطاوينا]

[align=center]

اقتباس:  المشاركة الأصلية كتبت بواسطة برمودا     مجنون مجنون مجنون ياجيفارا وربي تقطعت من الضحك يامصاص الدماء ,,أجل عشقته علشان عيونه بهن مرض وحمر ومن اللعانه تقول له لاتعالج علشان عشقك يالدموي للون الأحمر ,

والله يا برمودا.. ابو عيون حمر جالس اكتب وهو مقابلني..
ارد عليك واضحك.. وهو مبحلق عيونه ما يدري وش السالفه..هههههههههه
:

اقتباس: بالفعل أنت مكسب للمنتدى ويبارك بأريج الحياة وذوقها الراقي

اريج كلها خير وبركه..
وانا مدين لها بمعرووووف لأنها دعتني لبريدة..
بكل أمانة ما عمري ارتحت في منتدى زي راحتي هنا..

اقتباس: وبعدين أنا خابر (خالد ) بريداوي 9وش اللي حصل؟؟؟؟؟؟

تقصد خالد هو بريداوي9..؟؟[/align]

[فتحـية]

[align=center]والله تسلسل رهيب بالموضوع
عاد أنا من يوم يومي أموت بالأخضر !
وماأظن بيجي اليوم اللي أكرهه



تشكرات عالموضوع اللطيف


برايفت لبرمودا
خالد ما أظنه بريداوي9 ياشيخ فرق الأسلوب !!!
[/align]

[بــرمــودا]

اقتباس:  المشاركة الأصلية كتبت بواسطة فتحـية     [align=center][color=#008000] برايفت لبرمودا خالد ما أظنه بريداوي9 ياشيخ فرق الأسلوب !!! [/align]

هلا بالست فتحية ,,والله عارف هناك فرق كبير بين شعلة المنتدى الرائع وبريداوي 9ولكن القصد مختلف ,,هي شفرة لجيفوري بس عقب ماصار سردينه صار مايستوعب بحكم صغر المخيخ ,هع هع

[فتحـية]

[align=center]

اقتباس:  المشاركة الأصلية كتبت بواسطة برمودا     هلا بالست فتحية ,,والله عارف هناك فرق كبير بين شعلة المنتدى الرائع وبريداوي 9ولكن القصد مختلف ,,هي شفرة لجيفوري بس عقب ماصار سردينه صار مايستوعب بحكم صغر المخيخ ,هع هع

أهاا .. كأني فهمت [/align]

[خطاوينا]

[align=center]فتحية حياك..
:

اقتباس: والله تسلسل رهيب بالموضوع عاد أنا من يوم يومي أموت بالأخضر ! وماأظن بيجي اليوم اللي أكرهه

ومنو اللي يكره اللون الأخضر..
لون علمنا..
ولون السوق في الصعود..
ولون الكراث..
شاكر مرورك..[/align]

[فتحـية]

[align=center]

اقتباس:  المشاركة الأصلية كتبت بواسطة جيفارا     [align=center]فتحية حياك.. : ومنو اللي يكره اللون الأخضر.. لون علمنا.. ولون السوق في الصعود.. ولون الكراث.. شاكر مرورك..[/align]

خخخخ حلوة الكراث
مافكرت فيها

<== يقاله مفكرة بعلمنا ![/align]

[أمــاسي ونص]

كركركركر
اما سردينه صررراحه اسلوبك ماشالله شي

الا على فكره وش تقرب لأريج الحياة<<<شررروفه

[الرأي الأول]

جيفارا

سرد باسلوب شيق وذكرتني بصديق مثل حالك

دخل بمليون ريال واول يوم قالو له اشتر المواشي ونفذ طلبة

ثم جابو له شاهي وهو يشرب الشاهي كسب 10 الاف والبيالة الثانية 40 الف

قال مادام الدعواء كذا مانيب بايع لو يموتون

المهم طلع من البنك وجلس شهرين مادخلة الين سمع بالانهيار

وجاء يبيع ماقدر

الان اسهمة خارج البورصة يعني صفر

الله يعوضكم

[جناان]

اااه يالاسم
وفيه احد ما اكتوى بنارها
احمد ربك بعض المغفلين تركوا وضائفهم
ضانا منهو انهم خلاااص اصبحوا من عداد الهوامير.!!!!!

اقتباس: وبديت أقنع نفسي ان الحياة رحلة.. لا يهم فيهااا تعيش فقير والا غني.. المهم تستعد لما بعد الموت..

هذا الهدف الذي غااب عن الكثير
وهو الاستعداد لما بعد الموت
وغرتهم الدنيا بزخرفها
نسال الله ان يستعملنا ولايستبدلنا

تحيتي لك
جيفارا

[الحنتريش]

هذي عقوبة هالمصريه شكلك مسوي شي ياجيفارا هههههههههههههه
لكن الاحمر الي الان انا احبه ولو انه سبب لي نكسه بهالاسهم الله يلعنهم
فهو لون الحب
ولون الدم
ولون خطي الجميل
ولون لمبة غرفتي
ولون دفايتنا
ولون شراب امي حصه

[خطاوينا]

[align=center]

اقتباس:  المشاركة الأصلية كتبت بواسطة برمودا     هلا بالست فتحية ,,والله عارف هناك فرق كبير بين شعلة المنتدى الرائع وبريداوي 9ولكن القصد مختلف ,,هي شفرة لجيفوري بس عقب ماصار سردينه صار مايستوعب بحكم صغر المخيخ ,هع هع

فاهمك وابي اصرف الموضوع.. بس انت مخيخك اللي مهب كبير..هههههه
عني ربما اختلف مع أحد ولكن لا تصل لدرجة الكره.. واللي افصح له عن كرهي معناها أحبه..
بالنسبه لخالد في رد له قال لا تجيب سيرة الأسهم.. أنا عناد كتبتب موضوع عنها.. هههه.. وهذا سبب ذكر اسمه في الموضوع..
شاكرااااا على التوضيح..[/align]

[فور يو]

اهم شي الصحه والعافيه التي لا تقدر بثمن والا الفلوس وسخ الدنيا تروح وتجي ...

اعذب تحيه للكل .

[خالد التويجري]

[align=center]جيفارا

اقتباس: والباقي تروح تنقط على النور في سوريا..

الله اعلم إن هذي سبب انتكاسك ..,؟ وجنيت على باتزي الخلق ..,؟! الله يفتح على قلبك

ـــــــــــــــــــــــــ

برمودا

اقتباس: وبعدين أنا خابر (خالد ) بريداوي 9وش اللي حصل؟؟؟؟؟؟

خـــــــــالــــــــــد لونه "احمر" ..,؟
وبريداوي9 لونه "أزرق" .., والموضوع عن اللون الأحمر ..,؟! فهمت وش اللي حصل ..,؟ الله يهديك وسع مخيخك شوي على شان تفهم ..,!
مشاء الله علينا كثروا عندنا الأذكيا بالمنتدى ..,
راعين فنون الأسقاطات .., الله يحفظهم لنا ويخليهم لعين ترجيهم .


تحياتي .,’[/align]