ودي أحتفل بأمي (بيوم الأم) لكن؟؟

[هلاوين]

ذكرتينا بهالعيد الله يعافيك اليوم رحت جبت لمي خيشة كراث

قالت وشوله قلت عيدك اليووووووم >> هع هع

[العالميه]

اقتباس:  المشاركة الأصلية كتبت بواسطة طموح انثى     سلمت يمينكـ جندوانا ؛ هذا ما بجعبتي ؛ العالمية أمكـ ما تبغاكـ تسوين لهآ عيدية كثر ما تبغاكـ تكونين تحت إيدينهآ تلبين طلباتها ..صح ؟ موفقه ؛

وش دراك إن إمي ماتبينا نحتفل فيها؟؟تشوف أمهات العالم
يحتفلون فيهم عيالهم واللي حولها مالهم إلا هالسالفه..
أكيد ودها ومن حقها بعد!!لكن ننتظر الحكم النهائي من مشائخنا
الأفاضل..
مشكوره طموح على الحضور وعلى النصيحه
ويجيء يوم إن شاء يحتفلون فيك عيالك إذكريني

[العالميه]

اقتباس:  المشاركة الأصلية كتبت بواسطة شموع تحت المطر     أمبارح بنت أختي عزمت أمه وأمي بمطعــم إقاله مسويه فيها عيد الأم.. يوم صحيت من النوم وأثرهـ تهاوش هي وأمه<<هذي اللي من شوي نافختن ريشه وأمه مانطول رآآآسه.. أحتفلي بامتس وماعليتس من احد بس لاتسوين سوات هذي ^^^^

خخخخخخ الله يسعدك ..
هالشيء لابد منه في كل بيتوحده الله يهديها فيها طبع
شين بلسانها الدعاوي وين فلان الله يأخذه..ياملا البلا
طاعون..زي كذا .ويوم الأم أستغربوا عيالها ..يوم سألوها قالت
علشان يوم الأم ...خخخخخ
شموع نورتي والله

[ليليان الصقعبي]

اقتباس:  المشاركة الأصلية كتبت بواسطة العالميه     سلااااام.. تدرون بعيد الأم أكيد ..لأن القنوات كلها ماقصرت لها وقت وهي تعلن وتخصص برامج لها المناسبه..والعالم يخترش حولنا عن الأم وعيد الأم محلات الحلويات والشكولاته والورود ووالكل إستغل هاالمناسبه للدعايه وشفط الدراهم واللي إستغربته قنواتنا الإسلاميه خاصه الخليجيه تحتفل بعيد الأم حتى صحافتنا أكيد لاحظتوا إعلانات المحلات التجاريه وخاصه محلات الذهب والمجوهرات .. عاد أنا قلت يمكن إنه صار حلال أوفيه فتوى أجازته.....مثل أعياد الميلاد.. الحمدلله أمهاتنا نحتفل فيهم كل يوم لكن حلو يكون فيه يوم خاص لكل أم تفرح فيه ويكون مميز .بالنسبه لها..ويكون إحتفال مو عيد ... ومن العام الماضي وأنا ودي أحتفل ب(ست الحبايب) بس أتردد وأخاف واللي يشجعني كل اللي حولي قريباتي وصديقاتي يحتفلون بأمهاتهم ..إلا أنا. سؤالي /إذا كان حراام ليش سمحوا للصحف والمحلات والقنوات بالدعايه له ..وكأنه أمر عادي؟؟ أ

احتفلي واعزميني *_^
امممم الله يرحم امي صدقني لو هي عايشة كان محتفله فيها بس الله يرحمها
عموما صورة التوقيع حلوووووووووة لبى قلبها *_^

[فديكا التميمي]

يابنت الحلال مابقى بالعمر كثر مامضى بلاعيد بلاهم...

[العالميه]

اقتباس:  المشاركة الأصلية كتبت بواسطة يجيب الله مطر     [align=center] عندنا ما فيه غير عيدين يآلغاليه .. ممكن أنك تسوين لها اشياء تغني عنه مثلاً تعزمينها بمكان مو أنك تحتفلين فيهاا بس بهالأشياء تكسبين رضاها و تفرحينها .. ممكن أنك بكل طلعه تخصصين مبلغ و تشترين لها أي شي يسعدها ~> هي على الفرحه خليها بهالأشياء أحسن لكن مسألة هالإحتفال و هالخرابيط ماهي للمسلمين .. ( ما أنزل الله بها من سلطان ) الله يخليها لكم ويطول بعمرها و يرزقها بركم ويرزقكم رضاها [/align]

هلا بش
آمين ..مشكوره عالنصيحه
صدقيني راح يجي يوم ويصير عااااادي
سنه سنتين بالكثير ..زي غيره من الأشياء
اللي كانت محظوره وحرااام وصار الكل يسويها..

حياكٍ ربي منوره

[العالميه]

اقتباس:  المشاركة الأصلية كتبت بواسطة جندوانا     شوفي انا ماعصبت ولا حاجه ومسألة اختلاف العلماء حنا مالنا إلا ماافتى فيه علماؤنا .. اجل شوفي العلماء عندهم افتو بكشف الوجه .. ليش حنا مانكشف !! تقبلي مروري ويارب يفوز بتاعك

طيب ياستي ليش إختلاف الفتاوي
واحد يحرم وبشده والثاني أجاز بشروط

حياك ربي يالغلا
[mark=#FFFF66]وأبشرك بتاعي فاز اليوم[/mark]

[العالميه]

اقتباس:  المشاركة الأصلية كتبت بواسطة العليل     الأم هي عيد الحياة وديمومة عطرها هي أنشودة المطر أين أنتِ أماه سأسجد بجفني على طيفك وأغفو حكم عيد الأم كحكم عيد الميلاد على إختلاف الفقهاء فيه فالذي يرجح حرمته له أدلته ورأيه والذي يجوز له أدلة ورأي وكل على خير !

العليل/ماتشوف شر
كلامك حلو وأعجبني ..
لكن المشكله وش نمشي عليه
مع اللي حرم أو اللي أجاز؟؟
حياك ربي

[سَـاكنة القـلب]

[align=right]
حبيبتي العالمية ..
أولًا .. أحييك و أهنئك و أثني عليك كل الخير في اهتمامك الراقي ( الأم ) ..
ونعم الهم والله ..

ثانيًا .. لم أقرأ الردود فاعذريني إن كانت وجهة نظري مكررة .

ثالثًا .. مؤكد أنك لا تعتمدين في حياتك على ( أي فتوى ) من ( أي شيخ ) ، فهناك من حلل حرامًا وهناك من حرم حلالًا من أولئك الذين يدعون ( العلم ) !

نأتي لاحتفالك ..
أصل عيد الأم هذا عند الدول الغربية لضعف العلاقات الاجتماعية فيما بينهم .. لذلك ببقايا ( إنسانية ) خصصوا لها ( يومًا ) يردون فيه جميل الحمل و الولادة و التعب والتربية والبذل والعطاء !!

لكن الأجدر بنا كمسلمين أن نحتفل بها ( يوميًا ) !
فهي كنزنا الدنيوي بدعواتها المباركة ، وهي أوسط أبواب الجنة .

نوعية الاحتفال ..
صدقيني ( كل ) أم ، لا تريد هدايا و حلويات و أصناف الأطباق و أنواع العروض والبطاقات وما إلى ذلك مما نتفنن به ..
بل تريد برًا صادقًا ، وردًا للجميل ..
تريد تعاملًا راقيًا يوميًا ..
تريد احتفاء بها ، وتفوقًا لأبنائها يشعرها بإنجازها وثمرة تربيتها !

لكنني أرانا نتفنن في الهدايا ( المادية ) ونهمل الجانب المعنوي الذي هو سر سعادة أو شقاء كل أم ..
وأنا هنا لا أقلل من شأن الهدايا بل هي غاية في الجمال ، ولكن الأجمل هي المعاملة الراقية والطاعة العمياء ( الدائمة ) لهذه الأم العظيمة ..
وكذلك تفوق الابن وتميزه وعلو شأنه في كل ما هو خير ، لأن ذلك هو ( أحلى هدية ) ..

راقية جدًا أيتها العالمية ..
دعواتي الصادقة لك و لأمك الطاهرة ..

والله أسأل أن نرد و لو عشر العشر من إحسان والدينا لنا .




[/align]

[العالميه]

اقتباس:  المشاركة الأصلية كتبت بواسطة سارح بخياله     الحمدلله احنا يوميا نحتفل أمهاتنا مو زي الغرب اللي حطو ذا العيد لأنهم عادي مايشوفون امهاتهم الا من السنه للسنه

أخ سارح بخياله
اللحين مو الغرب اللي يسوون بس كل دول العالم
العربيه والإسلاميه حتى عندنا يسوون .موبس
الغرب ,,يعني كل هالعالم مايشوفون أمهاتهم أو عاصين
على قولتكم ..؟؟أستغرب كلامكم!!
حياك ربي

[العالميه]

اقتباس:  المشاركة الأصلية كتبت بواسطة كيرلا     العالمية إحتفلي بأمك كل سنه.. وكل شهر.. وكل اسبوع.. وكل يوم.. وكل ساعة!! بس لاتسمينه (عيد)؟؟؟ ولا تخصصين نفس اليوم يعني كل ماأخذتي ماخذتي سوي له حفله!! لأن الرسول لم يأمرنا إلا بعيدين .. والثالث يعتبر بدعه!! والبدعه هي ماكان يستطيع فعله الرسول صلى الله عليه وسلم والصحابه ولم يفعلوه!! لذلك نحن لانخالفهم!! والاشياء هذي أصلها من الكفار.. وكما قال أحد الاعضاء انهم يتركون آبائهم وامهاتهم إلا في هذا اليوم!! قال الرسول صلى الله عليه وسلم: خالفوا اليهود وقال: خالفو المجوس!! حبيت أوضح فقط.. والله وحده هو الهادي!!

هلا بك كيرلا
إحنا الحمدلله نحتفل فيها دائمآ..
لكن ودي بنفس الوقت اللي فيه أمهات العالم
محتفلات والناس يدهرون علشان أمهاتهم تكون
معهم.خصوصآ أن السعوديين أكثرهم يحتفلون..
هذا اللي أنا أقصده...
حياك ربي شيخنا

[الأسيــ بنت ـاد]

انـا أشوف أن هالاحتفآل مالــه داعــي بغـض النظر هـل هو حلآل أو حرآم ...

لاكن شوفي من وين جتنآ هالافكآر .. كلهآ افكآر .. من { الغرب }...

وماسألتنــي نفســك هم ليـه يسوونهآ؟...

ياقلبي الواحــد فيهــم يجلس بالاشهــر مايشوف أمــه او من سنـه لسنـه علشآن كــذا يحتفلون فيهـأ

ويجتمعون معهـآ...

لاكن حنآ وللـه الحمــد الام موجوده عندنا 24 سآعـــه ..

فما اشوف أنه لـه داعـــي .. بس إذا أنتي حابــه تواكبيــن العصر فقالوهآ ..

عليك بست الحبايب ياحبيــبه ,,

وعلى فكـــره حنا شعب تقليـــــــــــدي درجـة اولى ,,,

يسعدكـ ربي ..

[دِيم]

[align=center]

اقتباس: ومن العام الماضي وأنا ودي أحتفل ب(ست الحبايب) بس أتردد وأخاف واللي يشجعني كل اللي حولي قريباتي وصديقاتي يحتفلون بأمهاتهم ..إلا أنا

.
.

تعوذي من ابليس [/align]

[العالميه]

اقتباس:  المشاركة الأصلية كتبت بواسطة رمانسي     ذكرتينا بهالعيد الله يعافيك اليوم رحت جبت لمي خيشة كراث قالت وشوله قلت عيدك اليووووووم >> هع هع

الله يسامحك!!! هذا قدرها؟؟؟
المفروض طقم ساعه آلماس ..عطر غالي ..
كرااااث مع أننا قصمان لكننا مانعترف فيه!!ولايدخل بيتنا..
المهم...خلك سنع وجب لأميمتك هديه سنعه

[العالميه]

اقتباس:  المشاركة الأصلية كتبت بواسطة ليليان الصقعبي     احتفلي واعزميني *_^ امممم الله يرحم امي صدقني لو هي عايشة كان محتفله فيها بس الله يرحمها عموما صورة التوقيع حلوووووووووة لبى قلبها *_^

ليليان/وربي حزنتيني..يارب يرحمها ويجمعنا جميع بجنات النعيم
مع حبايبنا والمسلمين آجمعين...
لاتنسينها من دعائك في السجود ..واذكريها بعمره وصدقه
يارب يحفظك ويحتفلون بك إعيالك إن شاء الله..قولي آمين..