90 % من الشعب السعودي بدون ..........!!!

[سراج اللوذه]

[align=center]
السلام عليكم والرحمة من الله .. وهو خير الراحمين ..
أسعد الله أوقاتكم بالود واليمن والمسرات ..

[/align]
[align=right]



كنت في زيارة لأحد الدول .. العربية .. قبل فتره .. وقد شاء الله أن التقي بمجموعة من الشباب .. الذي ينافح ويناضل .. من أجل العلم والسعي .. خلف الرقي بنفسه وذاته.. ماعلينا ...


كان من ضمن الشباب .. كويتي كما كان يبدو لي من خلال مظهره ولهجته .. .. وتجاذبنا أطراف الحديث .. وكنت أسأله عن دراسته ولماذا أختار .. الدراسة في الخارج .. وليس سؤالي جهلاً مني بأن الجامعات الأجنبية أجود وأعظم وأكبر .. وتعطي مؤهلين .. الأول كونها من الخارج .. والآخر ..يعرفه الجميع ... برضو ماعلينا ...


جاوبني .. وقد تغيرت ملامحه وأدركه الخجل .. حتى أخجلني .. وطأطأت رأسي من الفشيله .. وراي اسأله يمكني مالي داااعي أسأل ..!!
كان جوابه أنا بدووووووون .. والبدون .. ما يدخل الجامعات الكويتية .. ولازم يدرس على حسابه الخااص .. وما دام أني يامعووود داافع دااافع فلوس .. خليها برى ابررك ..

طال الحديث .. بيننا وأشتغلت اللقافه .. والشرافه .. أومير ... اقعد أسأله ..
الأ .. متى .. يبي يعطونكم جنسيه .. تقل سمعت أن النواب بالمجلس .. عندكم بعضهم يصوت .. باعطاءكم الجنسيه .. <<<<مسوي فيها أني ما أفوت أخبار الكويت وأنها أكبر همي .!!

المهم .. سولفنا .. وسألته .. عن السؤال المهم .. بصراحه ..
وش الفرق بين البدون واللي معه الجنسية ..
قال .. حنا محرومين من الآتي :
1- ما لنا حق نصوت بالبرلمان .. ولا ننتخب .
قلت والله حاله .. ماصارت ديموغراطية والله !!
2- الجامعات .. ما يدخلونها .. مثل ما تخبر ..
قلت الشكوى لله ولله ظلم الحقيقة يعني هذا علم .. يعني ياخذون اجر الغريب مهوب عاد اللي عايش بالديرة !
3- الوظايف .. يامعود .. ممنوع تدخل على وظيفة حكومية ..بس الأهلي اللي يقبلك ... ووالله ياحجي حتى الأهلي بعضهم يشوف إذا معك جنسيه أو لا ..
قلت أفاااااا .. الله يعينكم .. يعني يقدر الواحد .. يعمل بالتجاره محيل صغيّر ولا أي شي ..
4- مكافئة زواج .. لأن اللي معه جنسية يعطونه فلوس المهر ...
قلت لاحول ولا قوة الا بالله ..
5- أعانة مولود .. يعني أي واحد يجيه مولود .. يزيد في راتبه .. حول الألفين ريال .. هذي مصاريف الولد ..
قلت .. والله قهر .. الحقيقه ..!!!
6- بدل السكن .. اللي يجيك .. يعادل أجار شقة ألين ينزل قرضك العقاري اللي حول المليون بالسعودي ..
قلت كلش ولا هذي ... بعد ما يعطونكم قروووض عقاريه .. أجل الواحد وشلون يسكن .؟؟!
7- التأمينات والجمعيات .. وما أدراك ..
8- مكافئة عاطل .. وراتب شهري .. للي ما حصّل وظيفة ..


اممم .. أنا الحقيقه .. ندمت أني سألته .. وحسيت ... اني قلبت المواجع عليه ..ماعلينا .. الشكوى لله .

تفارقنا ... ورجعت لأهلي .. بعد سفريه استجمام .. وصرفت ثلاث رواتب جامعهن .. ريال ينطح ريال ..
يوم وصلت البيت .. وسلمت على الوالدة رحت لغريفتي الله لا يخليه من ولا يخلين منه ..

.. جلست أفكر في هالرحله .. وانتظر باتسر يجي .. أبسولف على الربع .. وش شفت ووش لقيت وتسذا يعني ..
وتذكرت كلام هالكويتي .. واقول الحمدالله اني معي جنسية .. ماااااااااااعلينا ...

جلست أتذكر .. كل شي مهوب من حقة ..
وأسترجعت كلامه حرف حرف ..إلين لقيت ..
1-التصويت للبرلمان .. <<<<ما عندنا شي اسمه تصويت لمجلس الشورى على أقل تقدير !!
2-الجامعات .. ما قد سمعت أحد داخل الجامعة اللي كان يفكر فيها من يومه صغير .. وتذكرت .. نفسي يوم أتخبط بين المعاهد والكليات والشركات .. الين أنتهى المطاف على الجلسه بالبيت .. فتره طويله ألين الله فرجه .. من عنده .
3-الوظائف .. لا حول ولا قوة الا بالله ..واللي ماله واسطه نخلةً ماسطه .. <<وينطبق الكلام على الوظائف الحكومية ووظائف القطاع الخااص !!
4-مكافئة الزواج .. يوم تذكرتها ..ضحكت ألين .. أوجعتن تسلاي .. وتمزعت مصراني !
5-إعانة المولود زاد الضحتس .. حتى اني خفت لا ألجيران .. يطقون علينا الباب .. الله يستر ..
6-بدل السكن .. دمعت عيوني .. وأجست تكاك بالصدر .. وصارت الدنيا .. عندي تقل مبط ابره من صغره !!
7-التأمينات والجمعيات وما أدراك .. <<<<مالي خلق اتذكر شي .. عن الأسعار ... تراي منغبن .. من قيمة الرز .. وصاغرة كريشتي الله يخلف .
8-مكافئة عاطل ..والله يرحم .. ذكريات التتكيس وصنان البنقاليه .. وزمرة الباكستانيين .. وأستحقار السوريين !!


.. عجزت أستحمل .. وقتها .. وأرسلت له رساله بالجوال قبل ما أنام .. وكتبت له:
[/align]
[align=center]
( ترى الشعب السعودي متضامن معكم قلباً وقالبا وهم كلهم بدون بس بشكل مخفي ..وتكفى لا يدري أحد ترانا جاحدين !!)

[/align]


[align=left]
وسلامتكم ،،،،
[/align]

[اصالة نادرة]

[align=center]

اقتباس: 8- مكافئة عاطل .. وراتب شهري .. للي ما حصّل وظيفة ..

قررت اني اجاهد الصعاب للحصول على الجنسية الكويتية[/align]

[سراج اللوذه]

اقتباس:  المشاركة الأصلية كتبت بواسطة اصالة نادرة     [align=center] قررت اني اجاهد الصعاب للحصول على الجنسية الكويتية[/align]

[align=right]
أهلاً بك مع زمرة البدون ..

حنا ما نبي الجنسية الكويتيه .. ودنا... بس نصير سعوديين حقيقيين .. وناخذ الجنسية السعودية فعلاً .. لأننا بدون .. بشكل مبطّن ..


[/align]

[رونا]

اه ياسرااااااج
مو يقولون خليها بالقلب وتجرح
ولاتطلع برا القلب وتفضح
عارف اش المشكلة ببلدنا
الاذناااااااب
حسبي الله عليهم
المسئولين عندنا مايخافون الله الا من رحم ربي
الواحد همه نفسه كل ماحصل فلس جمعه لنفسه
الله لايجعل الدنيا اكبر همنا
انا قررت رونا خالد من هالرد القرار التالي
اتحول من سعوديه الجنسية الى بدون خخخخخخخخخخخخخ
على الاقل يكون عندي امل احصل الجنسيه
مو زي الي عندنا واحطبه
تقبلوا عصبيتي وفتح جروحي

[عـــــســـــولــي]

إحمدوا ربكم على النعمة بس .. (الهواء) اللي نشمه مجاني وشتبون اكثر من هالنعمه. هاه قولولي ؟!
صحيح إني منتف وسيارتي (كسره) واللبناني معه (فياجرا),وأنا عاطل عن العمل ومعي شهاده جامعية ,واللبناني موظف ويستلم راتب خيالي .وبيتي خرابه واللبناني ساكن بشقه فخمه بالعلياء ومع هذا (حنا) بنعمة عظيمة تبي شكر بس.
إلإ ياسراج اللوذه (بنغلاديش) تحريهم يعطونن الجنسيه ؟

[سراج اللوذه]

اقتباس:  المشاركة الأصلية كتبت بواسطة عـــــســـــولــي     إحمدوا ربكم على النعمة بس .. (الهواء) اللي نشمه مجاني وشتبون اكثر من هالنعمه. هاه قولولي ؟! صحيح إني منتف وسيارتي (كسره) واللبناني معه (فياجرا),وأنا عاطل عن العمل ومعي شهاده جامعية ,واللبناني موظف ويستلم راتب خيالي .وبيتي خرابه واللبناني ساكن بشقه فخمه بالعلياء ومع هذا (حنا) بنعمة عظيمة تبي شكر بس. إلإ ياسراج اللوذه (بنغلاديش) تحريهم يعطونن الجنسيه ؟

أيوالله ... الحمدالله ان الهوى مالحد به منّه ..

على طاري الهوى .. تصدق اني .. استغفر الله كل ما عطست العن والدين اللي جاب البرسوبس !!

.. ماتجزم نروح ناخذ جنسية بنقاليه ... ونجي نمرر مكالمات .. يمكن تزين الأمور !

[سراج اللوذه]

اقتباس:  المشاركة الأصلية كتبت بواسطة رونا     اه ياسرااااااج مو يقولون خليها بالقلب وتجرح ولاتطلع برا القلب وتفضح عارف اش المشكلة ببلدنا الاذناااااااب حسبي الله عليهم المسئولين عندنا مايخافون الله الا من رحم ربي الواحد همه نفسه كل ماحصل فلس جمعه لنفسه الله لايجعل الدنيا اكبر همنا انا قررت رونا خالد من هالرد القرار التالي اتحول من سعوديه الجنسية الى بدون خخخخخخخخخخخخخ على الاقل يكون عندي امل احصل الجنسيه مو زي الي عندنا واحطبه تقبلوا عصبيتي وفتح جروحي

[align=right]
خلها بالقلب تحرق ما بقى..
..عادتي ما أشكي على غيري عناااي دن درن

.. انتي بدون أصلاً رضيي ولا أنرضيتي .. الله بس يخلف علينا ..

والمسئولين ناكحين الكراسي . .وآخذينهن صبره ..

يعين ربك ،،،

[/align]

[" TWIX "]

اقتباس: 5- أعانة مولود .. يعني أي واحد يجيه مولود .. يزيد في راتبه .. حول الألفين ريال .. هذي مصاريف الولد ..

أشوى ماهي عندنا الميزة هذي وإلا كان تشوف صنهات وراه
طابور كله رضاعين ...

[سراج اللوذه]

اقتباس:  المشاركة الأصلية كتبت بواسطة ..twix..     أشوى ماهي عندنا الميزة هذي وإلا كان تشوف صنهات وراه طابور كله رضاعين ...

[align=right]
صنهات على اغلب الاحوال يعرف يروح يشحد .. ويطاير بهالمعاريض !

الفقر داقاً اللي ما يعرف يهايط .بمدح هالبشوت .. وكافياً خيره شره .


يالله ألحقنا خير يارب ،،،
[/align]

[غَسَقْ,]

"الحَمدلله" عَلى نِعمَة الأَمن وَالأَمَان ,
شَكراً أخوي

أَما أَخواني اللي يَقالهم " بَدون "
فَ ثِق ثَقه تَامه أَن لهم رب لَن يَضيعهم

جُل إِحتِرامي سَيدي

[غَسَقْ,]

اقتباس: 90 % من الشعب السعودي بدون ..........!!!

هُناك خَطوط حَمراء لايجب أَن نتخَطاها ,
فَكن حَذِر ..


أَحببت تَنبِيهك فَقط

[سراج اللوذه]

اقتباس:  المشاركة الأصلية كتبت بواسطة حَرَفٌ لآ يُعَآنِقُه الجَفَآفْ     هُناك خَطوط حَمراء لايجب أَن نتخَطاها , فَكن حَذِر .. أَحببت تَنبِيهك فَقط

الخطوط الحمراء .. أعتقد انها .. حدود لا يُسمح بتجاوزها . .

أولها حدود الله والمسلّمات والتشريعات .. التي أتت بالقرآن والسنه .
وأخرها.. دنيويه .. يقرها الحاكم وتكون .. لحقن الدما .. وجلب المصلحة العامه .


ولا أعتقد بأن ماجاء في الموضوع .. شيء فيه تجاوز .. على تلك الحدود ..

مجرد أمنيات .. وحقائق .. نابعه من قلب صادق .. يحب دينه ووطنه ويحمل الولاء لحاكمه .. بكل جوارحه وأحاسيسه !


أشكرك اخي من الأعماق .. وتوقف عن الخوفً الغير مبرر .. أرجوك .

[خن بط]

سراج اللوذه بعيدا عن تصنيفاتك اللي مب يم جاده . فقط تأمل معي قول الرسول صلى الله عليه وسلم (حيثما تكونوا يولى عليكم) .

[سراج اللوذه]

اقتباس:  المشاركة الأصلية كتبت بواسطة حَرَفٌ لآ يُعَآنِقُه الجَفَآفْ     "الحَمدلله" عَلى نِعمَة الأَمن وَالأَمَان , شَكراً أخوي أَما أَخواني اللي يَقالهم " بَدون " فَ ثِق ثَقه تَامه أَن لهم رب لَن يَضيعهم جُل إِحتِرامي سَيدي

حقاً.. الحمدالله على نعمة الأمن والأمان ..
نحن نعيش .. بأمن وراحة وأستقرار .. الله لا يغير علينا .
وقد لا يدرك .. قيمة هذا النعمة من لا يرى العالم من حوله ويستشعر مدى التعاسة التي يعيشون بها .


والبدون /
لهم ولنا الله سبحانه .. فهو الخالق الباري .. وهو الجبار الوالي على كل والي ..مقسم الأرزاق..وله ما أخذ وما أعطى .. و بيدة ملكوت السموات والأرض !

لكن .. لنا أن نرجوه .. الغنى والرخاء .. وأن يغيثنا ويرزقنا .. لنتمتع بالدنيا .. ونتصدق .. ونشكره.

[فارس الخبوب]

تبي السراحه قولهالي ماتبيني ماعلينا
اقولكم رحت الكويت او جلست مع البدون الصدق حالتهم ماتسر عدو ولى صديق
منبوذين من الحكومة ولي معهم الجنسيات .
مع انه كثير منهم شاركو في الحرب ضد صدام
اقل حاجه ينعطون الجنسيه
اما بنسبه لنا حنا ههههههههه لى يسحبون الجنسية بس
شاكرلك على موضوعك الحلو
وتقبل مروري