عالم مضروبه

[طحنفوص المجانين]

كلنا عارفين عن اللحية شيء جميل ومنظر خلاب في وجه الرجل << اشبها بوكيه ورد طبعاً مو كل اللحى ... وهي دائماً تدل على الاستقامة هذا طبعاً على حسب العرف والشيء المتعارف عليه لدى عامة الناس حتى في الغرب أي واحد مربي لحية يعني ( مطوع ) أو ( ملتزم ) والسنة النبوية أوردت أحاديث كثيرة بوجوب إطلاقها وطبعاً لو اتناقشنا في هذا الموضوع اكيد راح نتوصل لنتيجة عن اطلاقها واجب او مو واجب ولكن هذا مو موضوعنا احنا موضوعنا الناس المضروبه.

واحد مضروب من هذه الفئة وفوق كذا طفران لو اتفتش في جيبه بتلاقي فيه منديل اصفر لاصق فيه ربع ريال وهيئته الخارجية ( لله يامحسنين ) وطبعاً يوم يلاقي الريال يسوي حفله ومن سابع المستحيلات يصرفه في شيء ... يعني بالعربي اللحية نمت جذورها غصباً عن اللي خلفوه وكل مافكر يزور الحلاق يستخسر فيها الخمسة والعشرة عشان كذا اصبح مطوع بلفة لأن الثوب اصبح قصير واللحية واصلة السرة من التقشف والحالة الله يعلم فيها.

يمكن الواحد يقول والله ياطحنفوص انت اتبالغ لكن إلّ شاف مو زي إلّ سمع .. في أي وقت وانت في المسجد أو في الحرم اتفرج على عالم المضاريب ، افارقة ، مصرييين ، سعوديين ، ... الخ كل الاجناس من المضاربين تلاقيهم قدامك بجميع الاشكال والألوان طيب الواحد يمكن يقول ماشاء الله انت مرة عبقري كيف ميزت انهم مضاريب ؟ ياعالم السلوكيات ، سلوكيات البشر بدل عليهم .. واحد وهو يصلي تحية المسجد كل اشوي يمسد على دقنه ويمغطها مرة يمين ومرة يسار وفوق كذا عيونه دايره يمين ويسار تقول لادار ، والثاني يوم سجد طلع منه صوت وعقب الصوت ريحة ( الظاهر مسحر بفول ) وكمل صلاته عادي لا من شاف ولا من دري ، والثالث كل اشوي يلعب في إرْبه ويناظر هنا ويناظر هنا والرابع والخامس ... يعني بالعربي سلوكيات غريبة وعجيبة الواحد بيشوفها من بعض الملتحيين اتخلي الواحد يعرف انهم مضاريب لأن بطانتهم الفاسدة طغت على هيئتم الخارجية ولنا في صالح النهابي اسوة سيئة.

[طحنفوص المجانين]

( مسؤول في رمضان )
مسؤول في جميع الاحوال يحمل صفة ( صاحب القرار ) بشخطة قلب يقدر يسعد إنسان أو أمم ، وبشخطة قلم يقدر يتعس إنسان أو أمم ، سفرة فطوره غير سفر الناس ، فيها كل مالذ وطاب من جميع الاصناف ، إذا أذن الأذان يقول : اللهم لك صمت وعلى رزقك أفطرت ، وبعد الافطار وتأدية الواجبات والسنن الدينية يمارس لعبته ، يظلم هذا ، يضحك على هذا ، يتعس هذا ، وكل هدفه كم أصبح رصيدي البنكي ؟ وإذا حل موعد الزكاة أخرج من خزائنه حفنة من المال ، أودعها في أرصدة أبناءه ، لأن الأقربون أولى بالمعروف.يحلل لنفسه كل المحرمات لأن لديه شيخ خبيث يفتيه بفعل كل المنكرات .