وقفة مع مزايين (( حرب )) .. ملكة الجمال ناقة

[خالد الحربي]

أمس الصباح جاني ولد عمي .. وقالي وش رايك نروح لمزايين حرب ؟!
قلت له : وش عندهم هناك ؟!

قالي : عرض أجمل البعارين !

قلت له لا يا شيخ ؟ .. صادز أنت بعارين (( جميلات )) ؟
وبعدين كيف يختارونها ؟!
على الطول ولا على أجمل (( ردف )) ولا أجمل رقبة .. ولا يلبسونها من أزياء(( كريستيان ديور ولا دفنشي ولا إيلي صعب ولا عبد محفوظ ويخلونها تمشي قدام لجنة التحكيم بقدها المياس وخصرها النحيل وردفها الثقيل وصدرها الجميل ))

ولا تجيك الناقة حاطة روج على شفايفها .. ومسوية سيلكون وفخوذها ملفوفة ؟
وبعدين من رايح يحيي الحفلة .. بعير نانسي ولا جمل هيفاء ؟

أتخيل بعير ماسك المكرفون ويغني (( يا ناقة وسط النفود تتمخطر ))

..................

المهم رحنا لمزايين حرب .. لقينا أمة لا أله إلا الله هناك .. زحمة وغبار وتراب (( وبعارين ))
وبما أن ما عندي خلفية عن البعارين جلست أسأل .. وش معنى (( الوضح .. والشقح .. وما أدراك ما مسمياتهم العجيبة الغريبة )) .. انا أعرف الألوان العادية بس مثل مسميات هالألوان أول مرة أدري عنهم

أخذنا جولة على الذود (( ما أدري وش جمعها )) وعرفت أن الذود (( 50 ناقة )) ..
المهم خلال تجوالنا داخل المهرجان .. لقينا مجموعة من الذود .. تمشي معها فوق 100 سيارة
موكب صاحبة السمو البعريني ناقة بنت جمل
(( أستغربت أن مئات الملايين من الريالات تدفع لبعارين )) يقولون عنهن (( مزيونات )) تخيلوا ناقة تعتبر (( جميلة عصرها )) قسمن بالله خبال عجيب ..أم فرة وبراطم ووجه (( سبحان الله في خلقته )) جميلة !

مقاييس الجمال ما أدري كيف عندهم .. لو تسأله عن حرمته قال عنها (( شيفة ))
يقولون فيه واحد مات له جمل قيمته بس 400 ألف ريال

وبما أن (( قبيلة حرب )) من أكبر القبائل في السعودية .. كان حتماً أنا نشوف تجمعات في هالمكان ..
ومع هالتجمعات الكثيفة .. كانت مسيرات وشعارات ترفع .. (( كلها عنصرية بغيضة ومقيتة )) ..
((دخلنا في المسيرات اللي مسوينها وكانت تصرفاتهم مخجلة ومعيبة ومشينة تجاه من لم يكن من قبيلة حرب ))
حتى الدوريات الأمنية ما قدرت عليهم تركتهم (( لهياطهم )) ..

قلت لولد عمي (( خلنا نبعد عن هالغثاء اللي مثل السيل )) ..
أبعدنا ورحنا نتمشى على البقالات والسوبر ماركات .. خيام هه ..
لقينا أسعارهم مرتفعة أرتفاع جنوني (( بكت الدخان بــ 8 ريال )) أصصصصصصصصصصصص لا أحد يعلم
كل شي غالي ودبل ..

مشينا على (( الكثبان الرملية )) وبصراحة أنصدمت بشدة ..
نعمة منثورة بكل مكان .. رز ولحم أكوام فوق بعضها .. كل المخيمات ترمي هالنعمة بدون (( ضوابط دينية رادعة )) على الأرض .. (( طاغيين بالنعمة )) ..
يعني لو خصصوا من التكاليف اللي يتكلفونها بحافظات للأكل ويودونها للجمعيات الخيرية ماهوب أزين لهم ... وأنفع لهم في دينهم ودنياهم ؟
هدر للأموال .. (( وسيسألون عنها )) ..
أنفقعت مرارتي اللي أصلاً ماهيب موجودة معي

أخذنا لنا مكان مرتفع وجلسنا نناظر هالبشرية .. ومع غروب الشمس بدأت ظاهرة (( التطعيس )) الين ما أذن الفجر وهم (( ون رم آآآن )) ..
بعد صلاة العشاء ..
رحنا للمقر الرئيسي للحفل ..
شفنا (( السجالات الشعرية والمهاترات فيها )) .. كلن يقول بيت لثاني ألعن وأشنع من البيت اللي قبله ..
ضاق صدري منهم وطلعت .. ورحت لمكاني ..

أفكر في اللي شفته اليوم ...
مظاهر وتفاخر .. وبذخ وأسراف .. وبالأخير منهي أجمل ناقة
يعني لقب (( ملكة جمال البعارين ناقة تلبس التاج المرصع )) إلى السنة الجاية وخلال هالسنة هالناقة تصير سفيرة النوايا الحسنة بين البعارين .. وتعطى من هالشعير الين ما ينفجر بطنها .. ويصل سعرها لملايين الريالات .. ناقة تخيلوا ! هذا سعرها!
يمكن ناقة متخانقة هي وجملها تصلح ما بينهم

ياحريم .. ما تنقهرن أن اللقب راح عنكن لناقة

عموما ..

المفروض مثل هالمهرجانات توقف نهائياً .. لما فيها من أسراف وبذخ ..
ومزايدات وصرف للأموال بغير وجه حق ..
وبعد عشان العنصرية ما تزيد في المجتمع أكثر واكثر مما هي عليه الآن ...


ملاحظة مهمة ..

كتب هالموضوع واحد من قبيلة حرب ..

[جناان]

الله يهداااك
لو كملتها بصور هالجميله
عشااان نشوف ..!!

اقتباس: المفروض مثل هالمهرجانات توقف نهائياً .. لما فيها من أسراف وبذخ .. ومزايدات وصرف للأموال بغير وجه حق .. وبعد عشان العنصرية ما تزيد في المجتمع أكثر واكثر مما هي عليه الآن ...

عييين الصوااب..

[خالد الحربي]

اقتباس:  المشاركة الأصلية كتبت بواسطة جناان     الله يهداااك لو كملتها بصور هالجميله عشااان نشوف ..!! عييين الصوااب..

والله الصور السكب تكفل فيها ...

ومنا إلى السكب ...


تحياتي لك

[:: ابعـاد ::]

قال اخوي تبون تشوفون مزايين حرب

قلت وش حرب قال قبيلة حرب مسوين مسابقهـ لللبعارين وجلس يشرح

بس مافهمت

قلت لـ اخوي وش دخلنا في حرب

قال نوسع صدورنا

ورحنا وضاقت صدورنا غناء وبلاوي

مرت هايلكس مكتوب عليها (( حرب وبس ))

وسياره اخرى مدري وش نوعهــا (( حرب يرخصلكـ الغالي ))


وماتعشينا عندهــم ....

عشّانا شيزى



إقلاع ليت الدخان سعره تسعين ريال .....


.

[خالد الحربي]

اقتباس:  المشاركة الأصلية كتبت بواسطة ابعاد     قال اخوي تبون تشوفون مزايين حرب قلت وش حرب قال قبيلة حرب مسوين مسابقهـ لللبعارين وجلس يشرح بس مافهمت قلت لـ اخوي وش دخلنا في حرب قال نوسع صدورنا ورحنا وضاقت صدورنا غناء وبلاوي مرت هايلكس مكتوب عليها (( حرب وبس )) وسياره اخرى مدري وش نوعهــا (( حرب يرخصلكـ الغالي )) وماتعشينا عندهــم .... عشّانا شيزى إقلاع ليت الدخان سعره تسعين ريال ..... .

عاد قوية ما تعرف قبيلة (( حرب ))

قبيلة مشهورة ومعروفة



وبالنسبة لشعارات والمسيرات هذا واقع صار في المهرجان (( الله لا يعيده ))

تحياتي لك

[عبدالله الحلوه]

الشق اكبر من الرقعه



جنون يقوده عقلاء القوم !!


قال وين عاقلكم قالوا هالمربط !!



مزاين الدواسر ومزاين مطير والآن مزاين حرب والقادم اكبر




اتمنى ان تتدخل الدوله بوقف هذه المهازل وان كان ولابد يتم تنظيم مهرجان واحد بين الجميع




تحياتي ,,,

[خالد الحربي]

اقتباس:  المشاركة الأصلية كتبت بواسطة عبدالله الحلوه     الشق اكبر من الرقعه جنون يقوده عقلاء القوم !! قال وين عاقلكم قالوا هالمربط !! مزاين الدواسر ومزاين مطير والآن مزاين حرب والقادم اكبر اتمنى ان تتدخل الدوله بوقف هذه المهازل وان كان ولابد يتم تنظيم مهرجان واحد بين الجميع تحياتي ,,,

مثل ما قلت أخوي عبدالله (( جنون يقوده عقلاء القوم )) ..

وهالمزايين صار فيه تفاخر ومظاهر ومين أحسن من مين .. وكلها تؤدي للعنصرية ..

لك كل الود

[الملتاعه]

[align=center]صراااحه نفسي أشووف ها الناااقه

ليتك مصور لي شكلها عشان أشوف هي تستاهل اللقب

أو بس عند حرب إنها جميله

دمت بـ إقلاااااااااع أكثر

دمت بووود[/align]

[خالد الحربي]

اقتباس:  المشاركة الأصلية كتبت بواسطة الملتاعه     [align=center]صراااحه نفسي أشووف ها الناااقه ليتك مصور لي شكلها عشان أشوف هي تستاهل اللقب أو بس عند حرب إنها جميله دمت بـ إقلاااااااااع أكثر دمت بووود[/align]

تبين تشوفين الناقة

طيب بوصفها لك ..

شعر أبيض .. وجهها بيضاوي .. براطمها منفوخة بالسليكون .. خشمها أسود .. ولها لسان تلحس اللي يطلع من خشمها .. رقبة طووووووويلة .. لها أرجل طووووووووويلة .. (( وترمح وترفس ))


صح جميلة ؟!

[الطلقه]

ابشركم تم منع اي مزيين عد ام ارقيبه بس بعد الاحداث الموسفه

[خالد الحربي]

اقتباس:  المشاركة الأصلية كتبت بواسطة الطلقه     ابشركم تم منع اي مزيين عد ام ارقيبه بس بعد الاحداث الموسفه

عساه صدز هالمنع وخير ما يسوون ..

بس ما أعتقد يجي منع ..

الدولة تبي تشغل الناس عنها ومثل هالمهرجانات تلهي الناس ..

تحياتي لك

[أبو أميرة]

سمعت أن عتيبه بيحطون مثلهم

مهبول وطق له عصى !!!!!!!!!!

[خالد الحربي]

اقتباس:  المشاركة الأصلية كتبت بواسطة أبو أميرة     سمعت أن عتيبه بيحطون مثلهم مهبول وطق له عصى !!!!!!!!!!

الحين كل القبايل تبي تحط لها مزايين .. وش حيث المطران وحرب ؟

ومثل ما قلت (( مهبول وطق له عصى ))

شكرا لمرورك الجميل

[عوض البشري]

اخوي اقلاع



انا قرأت موضوعك وبصراحه مضمون موضوعك جيد

لكن ان تتعرض للقبيلة حرب وتنعتها بالعصبيه فهذا الشئ غير مقبول ابدا

ممكن هناك اثنين او ثلاثه وضعوا بعض العبارات لكن لايدخل هذا الشئ في الهدف اللذي اقيم له الحفل


صحيح ان مزاين الابل عاده اتبعتها بعض القبائل وهاهي قبيلة حرب تحذو حذوهم وانا بصراحه لاأحبذ الاسراف والبذخ في مثل هذه المهرجانات


لكن لابد للاصاله والتراث ان يكون له نفس يعيش في المواطن


واكبر دليل على كلامي هو استفادتك كم عدد الذود كما اسلفت

لكن الاسراف بالنعمه ورميها فهذا الشئ محرم ولايجوز في الدين

على العموم اخوي اقلاع



اتمنى ان تعيد صياغة الموضوع اون تأتي بالمفيد فقط


ولاتتهزأ بعادات وتقاليد المملكه العربيه السعوديه اذا كنت مواطنا تنتمي الى هذا الكيان العظيم

ولكن اذا كنت غير مواطن سعودي فلك شأن آخر

[خالد الحربي]

رايح أرد على جميع الردود بس بوقت ثاني مع كل الشكر للجميع على مرورهم ..

بس حبيت أقف عند رد الأخ البشري ..

اقتباس:  المشاركة الأصلية كتبت بواسطة عوض البشري     اتمنى ان تعيد صياغة الموضوع اون تأتي بالمفيد فقط ولاتتهزأ بعادات وتقاليد المملكه العربيه السعوديه اذا كنت مواطنا تنتمي الى هذا الكيان العظيم ولكن اذا كنت غير مواطن سعودي فلك شأن آخر

الأخ البشري ...

النقد يفرق عن الأستهزاء وبمرااااحل .. انا أنتقد تصرفات سلبية ما أستهزء بشي حسن وجميل ..

وهذا هو الفرق ...

وإذا انا أنتقدت السلبيات تعتبرني غير سعودي !!

مشكلة والله !
هذا يعتبر خلل فكري فيك لازم تتجاوزه ...

لك التحية كل التحية