قصة الشهيد خالد ( 1 )

[ابو القعقاع]

(جده .. عروس البحر)

مرت الدقائق والساعات طوال, وتناوب الثلاثة على مراقبه الساحة, وحل الظلام..

أخرج خالد الرسالة الوردية من جيبه, لقد

حفظها عن ظهر قلب, ولكنه يريد النظر إليها بين الحين والحين, فهي رسالة ميسون..

عبدالمحسن: تراي مازلت أطلبك تكملة قصتك.. والحين فاضين ما عندنا شي..ورا ما تكملها؟؟

ابتسم خالد وقال: ابشر, وين وصلنا؟؟

عبدالمحسن: يوم قلت للوالده إنكم تبون تعتمرون..

§§

خالد: إيه صح..قررت أنا والوالدة إننا ننطلق في الصبح باتجاه مكة للعمره, اتصلت
على صديق لي في جده, وطلبت منه انه يدور حجز في جميع الفنادق بأسم صالح, وجاني
الرد بعد فتره, بأنه لقا حجز بالاسم في مجمع شاليهات.. وعطاني اسمه وعنوانه..

ومن بكره الصبح انطلقنا بالسيارة أنا والوالدة, وصلنا مكة المغرب,
واعتمرنا وصلينا العشاء, واقترحت على الوالدة إننا ننزل جده نتمشى, هي
استغربت, بس ما عارضت, نزلنا جده وسكنا في فندق, ومن بكره بعد العصر, أخذت الوالدة
ورحت لم منطقة الشاليهات, يقالنا نتمشى على البحر, والوالدة تعبت رجليها,بس
أنا اصريت عليها أننا نتمشى, وقربنا من الشاليه حق ميسون, وكانوا فارشين بساط خارج
الشاليه على البحر وجالسين,ميسون أهلها ومعهم صالح, فيوم قربنا لمهم بالحيل..

أنا(صحت بصوت عالي) : صالح؟؟..يا محاسن الصدف..

صالح قام لمي : هلا وغلا بخالد.. وش عندك هنا؟؟

أنا: ابد الوالدة الله يهديها, أصرت أنى اعتمر بها قبل العرس,
ويوم اعتمرنا وخلصنا قالت أبى جده, فجبتها هنا.. تخبر عاد الحريم والأسواق..

(والوالدة قاعدة تناظرني باستغراب)..

صالح: بالخير يا خالتي أم خالد..عمره مقبولة

أمي: هلا صالح منا ومنكم..وش أخبارك؟؟

صالح: الحمد لله, ورا ما تقلطين مع أهلي, وتتقهوين.

أمي: الله يخليك, بس حنا مستعجلين..

أنا قاطعت كلام أمي: ألا يمه ورا ما تجلسين تتقهوين معهم,

أنا اباخذ ميسون أواريها شكل الغرفه اللي شفناها قبل شوي بالشاليه اللي هناك..

صالح: تبيني اجي معكم؟؟

أنا: لا ما يحتاج.. بس نادلي ميسون لا هنت..

صالح: طيب..

وراح ينادي ميسون..وبعد شوي, جت وهي تبتسم..

ميسون: السلام عليكم..

أنا: وعليكم السلام..يا شيخه فيه ناس موب قد التحدي ابد ابد..

ميسون مبتسمة: يا حظك.. لقيتني..وين المخابرات الأمريكية عنك؟؟

أنا: طبعا يا حظي..اللي يسمعك يقول أنا لاقي أي وحده؟؟.. أنا لاقي ميسون..

ميسون (حمرت خدودها) : المهم.. عمره مقبولة.. يقولي صالح انك تبيني..

أنا: إيه..تعالي ابوريك شي..

ميسون: طيب دقيقه أجيب الشبشب..

أنا وانا امسكها مع أيدها.. وسحبتها: ما يحتاج.. وهاذي نعالي ابتركها عندكم...

وفصخت نعالي.. ومشينا على الشاطي..أنا ما ادري..هو فعلا ما
كان فيه ناس معنا.. ولا كان فيه بس ما حسيت فيهم.. وانا معها يصير كل شي قدامي حلو..

وحنا ماشين, التوت رجلها.. وطاحت على الأرض..

أنا نزلت على الأرض معها: سلامات وش فيك؟

ميسون: الظاهر أن رجلي التوت..

مسكت رجلها..كانت بيضاء.. وناعمة...

أنا(مسكتها مع الكعب وضغطت عليها) : هنا يعورك؟؟

ميسون: ايه..

أنا رفعت يدي شوي للساق وأنا أحاول أنى اخفي ابتسامتي: طيب هنا يعورك؟؟

ميسون: لا.

أنا رفعت يدي زيادة لمنتصف الساق: طيب هنا يعورك؟؟

ميسون(شافت ابتسامتي) : إذا ما وخرت يدك ترى ابقطعها لك..

أنا بسرعة مسكت رجلها وعكفتها لين طقت
وقلت: طيب لا تدفين.. بس كنت أيشتت انتباهك علشان ما تصير رجلك مشدودة وأنا اعكفها..

ميسون قامت تنفض الغبار عنها: طيب.. لا شكر على واجب.. لو أنى لابسه الشبشب ما كان طحت..

أنا: أنا حافي وما طحت.. بس أنتي ما قدرتي تتحملين جمالي الأخاذ.. ولا انتبهتي لطريقك..

ميسون: معليش.. بس أنت اخذ في نفسك مقلب..

أنا: يحق لي.. موب متزوج ميسون؟؟..

ابتسمت ولا رديت .

أنا: يا شيخه ودي أقولك شي بس مستحي..

ميسون: لالا تستحي قل اللي في بالك..

أنا: تصدقين أني مشيت على الشاطي واجد, وشفت الغروب واجد.. بس مثل اليوم ما قد شفت..

ميسون: ما فهمت؟؟..

أنا: يعني المشي على الشاطي معك شكل ثاني, والغروب يصير عندك ولا شي..

ثم سكت شوي.. وقلت: ميسون.. أنا احبك..

ميسون سكتت.. كان واضح إنها تفاجأت.. بعد شوي قالت..

ميسون: شكرا.. الله يخليك..

أنا اعترف انه موب هذا الرد اللي كنت متوقعه, وضاق صدري بالحيل..

المهم.. كملنا مشينا لم الشاليه
.. أخذت الرقم.. وتواعدنا إننا نطلع سوا بكره لم السوق.. مع أمي وأهلها..

رجعت لم الفندق.. ثم جاني
إعلان خبر التعبئة العامة للقوات السعودية في ذاك اليوم, واتصلت على العمل, وقالوا
لي انه لازم اقطع إجازتي واجي فورا..مثلي مثل باقي اللي يشتغلون في السلك العسكري..

إعلان التعبئة ما كان خبر سئ ولا محزن, كان خبر مفاجئ.. وكنت خايف انه

راح يؤثر على تخطيطات العرس وخلافه بس.. ما كنت متوقع إننا نبي نجي نحارب صدق..

أول شي سويته اتصلت على ميسون وعلمتها بالخبر.. وأني ابروح لم
الرياض بكره.. هي تفاجأت, وكان فيه نبرة حزن في صوتها.. ودعتني.. ودعت لي بالتوفيق..

حاولت أنام في ذيك الليلة.. بس ما قدرت..وفي
الساعة ثنتين بالليل سمعت طق على باب الغرفه بالفندق.. ورحت وفتحت الباب وتفاجأت..

كانت ميسون عند الباب..

§§

قالت: ممكن أكلمك كلمه..

إحنا: طبعا.. مين اللي جابك..وليش.. تعالي في البلكونه علشان ما نزعج الوالدة..

وطلعنا لم البلكونه..وكانت ميسون ترتجف.. مع انه ما كان برد..

ميسون: جابني صالح, وهو يستنى تحت بالبهو..

أنا: خير عسى ما شر؟؟

ميسون: لا تروح..

أنا: وين أروح؟؟

ميسون: لم الحرب.. تكفى..

أنا ابتسمت: الله يهديك.. خوفتيني.. انشاء الله مافية حرب ولا يحزنون..
هو مجرد إعلان تعبئه.. تخويف.. ونبي نرجع ولا كن شي صار انشاء الله..

ميسون(ونزلت دمعه من عينها) : تكفى.. مدري ليه عندي إحساس إن الموضوع اخطر من كذا.. افصل من
الشغل..واشتغل في محل أبوك.. أنا ما عندي ما نع.. بس أهم شي لا تروح..

أنا: ميسون.. هذا شغلي اللي ما اعرف غيره..تبيني اهج؟؟

ولأول مره أشوف ميسون بهذا الذل.. نزلت على ركبتها ومسكت يدي..

ميسون: احب أيدك.. تكفى.. خذني على قد عقلي.. تعذر بأي شي.. بس لا تروح..

أنا نزلت ومسكت يدها وجبيتها..

أنا: ميسون.. إذا اعتذرت.. ما راح أصير الشخص اللي وافقتي انك تتزوجينه..

حست ميسون أنى موب ممكن أغير رأيي..فقامت.. ورجعت للشموخ اللي متعودة منها..فقمت أنا بعد..

جت وحبت جبيني.. ومسكت أيدي.. وحطت هالرساله الوردية فيها.. وهي تقول..

ميسون: انتبه لنفسك.. والله معك..

أنا: انشاء الله.. وأنتي انتبهي لنفسك.. وكلها انشاء الله فتره من الوقت وارجع بأذن الله..

وطلعت مسرعة من الغرفه.. وكانت هاذي آخر مره شفتها فيها..

فتحت الرسالة الوردية.. وقريتها..

(عزيزي خالد..

عندما عبرت عن شعورك ناحيتي بالحب كان اجمل ما سمعت في حياتي, ولكني للأسف
أجد أن كلمة الحب لا تكفي لأعبر لك عن مشاعري, ولذلك اكتفيت بالشكر, فللأسف
لا اعتقد انه يوجد شخص سبق وان نطق بالعربية, أو أي لغة أخرى, سبق وان شعر
مشاعر نحو شخص آخر, مثل مشاعري نحوك, ولذلك لا توجد حتى الآن الكلمة التي
أستطيع أن اعبر بها عن هذه المشاعر.. أتمنى أن أكون قد أوضحت لك الصورة,
أتمنى لك التوفيق والسلامة..وتأكد أننا ننتظرك على أحر من الجمر..

حبيبتك المخلصة ..ميسون)

وهاذي كل قصتي مع ميسون حتى الحين..

عبدالمحسن: مشاء الله.. ربي وفقك في ميسون..قصتك ما كنت أتوقع إنها توجد
في وقتنا الحالي..أتمنى لكم التوفيق انشاء الله إذا رجعت لم الرياض..

خالد: انشاء الله.. شكرا لك..
وفجأة قطع الحديث يوسف..

يوسف: يا شباب.. لازم تشوفون هذا..

قام خالد وعبدالمحسن, والقيا نظره على الساحة.. فوجدا واحده من الدبابات تتحرك باتجاه العلم..

خالد: شكلهم يبون يحطون الدبابة عازل علشان ينزلون العلم..

يوسف: والحل؟؟

خالد: بها لطريقه.. مالنا إلا ننزل لم الساحة..

عبدالمحسن: بس ما تلاحظ إننا بها لطريقه ندخل معركة خسرانه؟؟

خالد: إذا وقفنا الحين, يبي يصير موت احمد ومحمد بدون أي ثمن...

اقتنع عبدالمحسن ويوسف بوجهة نظر خالد, ومع انهم كانوا
عارفين أن نسبة نجاح خطتهم ضئيل, والخسائر احتمال تكون وخيمه, إلا انهم وافقوا..

ورسم خالد الخطة, بحيث
أن كل واحد منهم يهاجم من جهة لتشتيت أفكارهم, ومحاولة ردعهم عن ساحة العلم..

وبالفعل بعد لحظات.. كان الثلاثة أمام بوابة مبنى الأمارة مستعدين للهجوم..

انطلق خالد ويوسف وفتحوا النار من جهتين على الجنود عند العلم, حتى وصلوا إلى العلم, وكانوا
بين ثمانية جثث من جثث الجنود العراقيين, ولكنهم اصبحوا في وضع مكشوف أمام البقية,
وبدأ عبدالمحسن في إطلاق النار على البقية في الساحة في محاولة لتغطية خالد ويوسف,
ولكن كان عدد الجنود كثير, وفتحوا النار على خالد ويوسف من جميع الجهات فسقطا..

شاهد عبدالمحسن هذا المشهد فترك مكانه وخرج إلى الساحة وقام بفتح النار على جميع الجنود,
وأوقع الكثير منهم قبل أن تخترق رصاصه صدره ليقع أمام العلم وبجانب زميليه..

وقبل أن يبدأ الجنود العراقيين بإطلاق صيحات
النصر, نزلت قذيفة مدفعيه على الدبابة المجاورة للعلم.. إيذانا بهجوم الجيش السعودي..
(النـــــهايـــــــة)

انتهت معركة الخفجي بطرد القوات العراقية من المدينة, وبكثير من الخسائر البشرية للجانب
العراقي, بينما في الجانب السعودي كانت الخسارة خمسة واربعين عسكري سعودي, منهم
خمسة كان لهم الفضل الأول بعد الله في إبقاء العلم السعودي خفاقا في سماء المدينة..

جاء قائد الكتيبة الثامنة,
يتفقد المدينة بعد المعركة, وشاهد الجثث حول العلم, وشاهد جثة خالد تسبح في الدماء
فترحم عليه وعلى زملائه, ولاحظ وجود شئ في يد خالد, فانحنى, وفتح يده فوجد الرسالة
الوردية, وكانت ملطخة بالدماء, فنزلت من عينه دمعه حاول إخفائها عن مساعديه ثم قال..

اللواء: لو كنا نعرف انه فيه شباب سعودي مثل خالد وزملائه, ما كنا طلبنا مساعدات من أحد!!..

ثم اخذ الرسالة, أعطاها أحد مساعديه..

اللواء: تأكد بنفسك إن هاذي الرسالة
تاصل لأهل خالد اليوم, ويتم إخبار جميع أهالي المتوفين بشكل شخصي من قبل القيادة..

وفي صباح اليوم التالي..

استغربت ميسون حضور عمها أبو خالد إلى بيتهم في الصباح, ولكنها لم تدع المجال لأفكارها,
وأجلت كل شي حتى ياتي صالح من المجلس لتسأله, وبينما هي جالسه مع أمها في
الصالة, دخل صالح وكان متجهم الوجه ومطأطي الرأس وكانت عينيه موجهه نحو ميسون,
فدب الرعب في قلب ميسون وبدأت الدموع تنهمر من عينيها وهي متوجهه نحو صالح..

ميسون: وش فيه خالد يا صالح؟؟.. أسروه؟؟.. أكيد أسروه ويبي يرجع انشاء الله .. تكلم...

فرفع صالح يده وفتحها..

وعندما شاهدت ميسون ما بيده
توقفت وبدأت بالتراجع حتى اصطدمت بالجدار ثم انهارت على الأرض وهي تبكي..

كانت يد صالح تحمل رسالة ميسون الوردية.. وملطخه بالدمـــاء..

نص الرسالة:

بسم الله الرحمن الرحيم

إلى حبيبتي...ميسون

قال تعالى: (ولا تحسبن الذين قتلوا في سبيل الله أمواتا بل أحياء عند ربهم يرزقون)

§§

حبيبتي ميسون, بما أن هذه الرسالة قد وصلت
إلى يديكي, فهذا يعني أن المنية قد حالت بيني وبين مشاهدة وجهك الصبوح..

حبيبتي ميسون, لا تبيكني, فأن مجرد التفكير في دموعك يحسسني بالألم, وتأكدي أني انشاء
الله قد انتقلت إلى مكان افضل من هذا المكان, وادعي لي بالرحمة والمغفرة..

حبيبتي ميسون, أنى اشكر الله على نعمه الكثيرة, ولكن اكبر نعمه لي كانت وجودك في حياتي,
فتأكدي انك جعلتي حياتي هي الأسعد, وأني اشكرك بعد الله على هذه السعادة,
فمجرد التفكير بك وبوجودك أعطاني ويعطني الأمل, وحرر قلبي من جميع المخاوف,
وكان وما يزال خوفي الوحيد, أن تكون وفاتي سببا لحزنك, فتأكدي أنى دعوت
الله أن يخفف عليك وقع الخبر, وان يزول الجرح بسرعة, فسعادتك هي سعادتي..

حبيبتي ميسون, أن الموت ابتلاء, فكوني كما
عهدتك قويه, وعيشي حياتك سعيده إلى أن التقيك في جنات الخلود بأذن الله..

حبيبك المخلص

خالد




منقول من أحد المنتديات
نقل / أبو القعقاع mooon888@hotmail.com