مجتمعنا يفرق بين الاولاد والبنات !!

[إمو]

السلام عليكم ورحمه الله وبركاته .. اولا .. احب اقول اني سعيده بانضمامي للمنتدى ..
بما اني انظممت لكم حبيت اذكركم بشي يتساهل فيه معظم المجتمع قاهرني ... وهو تفرقه الاباء بين الاولاد والبنات
واللي يقهرني زياده انه نادرا ما احد يتكلم عنه مع انه فيه حديث عن النبي صلى الله عليه وسلم نهى عنه ( والله ما اعرف الحديث بالظبط لكني قريته ) والمشكله ان الاباء والامهات هذولا << المريظين يقولون انه ما فيه فرق بين عيالنا ... واننا نحبهم كلهم زي بعض و هم سامحين للولد يتكي بغرفته و ما بقى قناة بالعالم مب عنده يتفرج على اللي يبي ... والبنت غاصبينها على قناة المجد مبلمة فيها ما وراها الا ذالشيبان المنشدين << اللي يقعدون كم اسبوع وبتحولون مغنين .. والولد معطينه جوال من قبل لا يعرف ينطق زين وما يوصل المتوسط الا وهو مكلم كل بنات خلق الله والاهل دارين بس ما يقولون ولا كلمه .. ليش ؟؟ لانه ولد ... ما منه فظيحه ... يعني هم ما همهم الا الفظيحه .. ما همهم انهم يربون عيالهم تربيه اسلاميه .. واللي قاهرني زياده كيف يعاملونه الاب والام كانه هو الامر والناهي بالعائله ... يشرف على خواته الظعيفات كانهم دبش ما يعرفون مصلحه انفسهم ولا خرفان يبيلهم راعي ... واصلا اساس الخطر في المجتمع هم العيال ... هم اللي يغازلون وهم اللي يخطفون بنات خلق الله وبالنهايه لما ينلعب على البنيه المسيكينه يصير كل الغلط غلطتها ... والولد وينه ؟؟؟ محد يدري ... ما كأنه سوا شي ،،، والبنت هي اللي يصفقونها اهلها ويتبرون منها .. والناس يقولون بنات الحين مدري وش فيهم ... طيب ليش ما عمركم تكلمتوا عن [mark=#3366ff]عيال الحين[/mark] ... وكل ما القوا محاظرات عن ذا الموظوع القوها على البنات كأنهم هم اساس البلى وهو اصلا اساس الفساد في المجتمع هم العيال .. واذا بنت غازلها ولد قالوا هي ما تسترت ... الحين مين اللي مغازل مين ؟؟ ... ووين غض البصر اللي امر فيه رسولنا الحبيب ؟؟ ... ما اقول الا الله يهدي ذالناس المتخلفين اللي عايشين حياة الجاهليه وهم بالقرن الواحد والعشرين .... ادري ان الموظوع طلع عن عنوانه الرئيسي ... لكني تحمست ... وش اسوي !! ... مقهوره من ذا المجتمع ..