موظفات بنك الراجحي وسوء التعامل

[شوق الشقا]

السلام عليكم ورحمة الله وبركاته
اليوم حبيت افضفض واتكلم عن سوء تعامل موظفات بنك الراجحي با الصفراء
والله الي يروحلهن كانه قاعد يشحذ منهن
في العام الماضي رحت وطلبت اسحب مبلغ من حسابي وكانت بطاقتي منتهيه
كشرت كاني اباخذ من قروشه وقالت لازم ولي امرك يجيب ورقه من قسم الرجال
وكان وقت صلاه طبعا انتظرنا لبعد الصلاه وراح زوجي للرجال وقالو ما يحتاج
ورقه رجعت وقلت له
طقطقت بالكمبيوتر بعدين قالت اصلا انتي حسابك بفرع الموطأ روحي هناك ؟!

وش رايكم
كان اختصرتي من البدايه وقلتي

نفس الشئ حدث مع قريبتي يكثرون الطلبات اخرتها يقولون ما لك شي عندنا ؟!!!

المفروض يحسنون تعاملهم مع العملاء ويكسبون ثقتهم

صرااااحه فرق عن تعامل البنوك الاخرى

[الرأي الأول]

فعلا فرع الصفراء النسائى اكثر من سيى

اعتقد مستوى الرقابه سيئه بالنسبه للفرع النسائى

[بندر الحمر]

انتقلت العدوى من الموظفين للموظفات

حسب مانسمع

[التاجر]

انتقلت العدوى من الموظفين للموظفات
الله يخلف ؟؟؟؟؟؟؟؟؟؟؟؟؟؟؟

[بريدتي]

دار الزمان وشفت فيه العجايب,,

[نحت الغلا]

هذا موظفي الراجحي لاجديد سو معامله وتعالي على لاشي مب جديده عليهم -
قصة صارتلي بفرع الراجحي بالصفراء مره كنت بائع سيارتي بمبلغ كبير شوي وكنت ابي اودعه عندهم فوقت بالسرا يوم جا دوري قالي المحاسب رح اودع المبلغ بالمكينة قلتله معصي تبين اودع كل هالمبلغ بالمكينة لا والله مابقا غيره وكان و واقف صدفة مدير البنك وكان يسمع كلامنا قالي ماعندنا ايداع هنا بقل عصبيه رح اودع بالمكينة قلتله لا ابودع هنا عند المحاسب وانا صراحة ماوثق بمكينتكم بعدين هالمبلغ هذا كل ماملك وبايع السيارة لاني محتاج وتبين احطه بهالمكينة وميرررر يعصب زيادة قال للمحاسب لا تاخذ الفلوس استانس المحاسب وحس انه انتصر علي وميررر اقول للمدير يعني ترفض انك تستلم الميلغ كاش وتودعه بحسابي قال ايه قلتله خلاص اجل بيني وبينك وزارة المالية وشهد عليه الموجودين .. صراحة حسيت انه ماكان متوقع اني ابقول وزارة المالية كان متوقع اقول بشتككي على ادارة البنك .. المهم مالكم بالطويله طبعا كان صوتنا مسموع لجميع الموجودين .... ومير اهم بالخروج <<<< حلوه اهم ويلحقن موظف خدمة العملا الي قبال بوابة البنك يوقلي وسع صدرك وراك معصب ومن هالكلام انا حسيت انه يبي يلملم الموضوع قلتله ونا ايقالي حمق تبي تودعون الفلوس ولا اروه لفرع وزارة المالية قالي ياخي خلاص جب نودعهن لك بس ريحنا ... يوم اودعهن وحست اني انتصرت بفعل روووووووح النظام ومير الخس المحاسب وعطيه هذيك النظر الي كله نشوة وفرح بالانتصار لا كن المدير ماشفته مادري وين راح !!!!

[ثامر الناصر]

الله يعينكم الصراحة من هالموظفين ..

وهذولا ماايأدبهم الا الهاتف المجاني .. اللي يعيقهم موظف ببنوك الراجحي يتصل بالمجاني والله انهم يهوشونهم هوش وانا مجرب هالشي مع مدير بنك بالرياض انهم اتصلوا عليه وهاشوه هوش وانا عنده .. لانه فقط رفض يفتح لي حساب الا بمبلغ 10 الاف ريال !!

وفتح لي حساب وهو مايشوف الدرب وانا اضحك عنده خخخخخخخخخخخخخخ

ودمتم

[الالماني]

[align=center]أختي المحترمة شوق سلامي لك ولكل الأعضاء والمشرفين اسمحي لي أخيه أن أضع ملاحظتي في موضوعك ولا اقصد في هذه الملاحظة موضوعك

بصراحة أصبح منتدانا صندوق شكاوي لم نجد فيه مديح بل كلٌ يغني على ليلاه

نعم يوجد إخفاق في كل مرفق يكون فيه جمهور ولكن أتمنى بأن يكون كلامنا غير معمم لا ينسب هذا الإخفاق لجميع الموظفين كنت أتمنى في حالة وجود مشكلة إن تناقش بمصداقية لا تتدخل فيها عواطفنا
حتى ردود اغلب الأعضاء لا نستفيد منها بمجرد دخوله للموضوع يريد ترك بصمة له ولو برد يعلق دون سماع وجهة نظر الآخر بمجرد إن كتب هذا الموضوع حكم عليه بالمصداقية !!!!! لا ياخي لا تعرف مايدور خلف الكواليس يجب علينا وضع كل الاحتمالات فيها أن يكون صادقاً أو كتبها
لإغراض شخصية وأنت بردودك تعينه على ذلك دون أن تتحقق من مصداقية الموضوع
معذرة أخيه على كلامي أنت عانيتي من موظفة واحدة فلا يجب عليك أن تعممي يوجد الكثير من إخواني وأخواتي العاملين هنا وهناك يبذلون كل الجهد كي يجدوا كلمة طيبة
انظري لنفسك إذا كنت تعملين وتوجد بينكم واحدة عليها ملاحظات وتم تعميم هذا الإخفاق ماذا سوف تكون رده فعلك[/align]

[عيون الصقر]

انصحكم ونفسي بالابتعاد عن كل مايرفع الضغط ويجيب السكر ويمص الدم ويحتقر الانسان ويشيع التخلف المصرفي ابتعدوا عن الراجحي ابتعدوا عن الراجحي لو خصص لكل عميل موظف فقد ولد من رحم الجهل والتخلف واستغلال العميل وذله وقهره والله لوكنا في بلد غير السعودية لشطب اسمه من عالم الاعمال البنكية كل مافي الامر ان الراجحي لحس مخ الشعب بتعامله النقي واتجهت الناس اليه وقفل عليهم بالقروض وذلهم بنقاء مامثله نقاء

[فهد الرشيدي]

[align=center]صدز ماأدري وشبهم موظفي الراجحي مثل ماقالت شوق
لو أختصرت الموضوع من أول قالت روحي للموطأ
أحسن ....
أنا جيت بودع بحسابي مبلغ مالي وهم مسكرين قبل الصلاة
بربع ساعة والطلوع من خلف البنك أكيد تعرفون باب الخروج
جيت للأمن قلت أبي الموظف <----- ماأبي موظف حيله .
دخلت وطبعاً لازم رقم كونتر قام الموظف يزهم بالارقـام ناظرت
ماأحد قـام قمت بـدون رقم معي المبلغ ومعي الايـداع وحطيت الجوال
على أذني على أنه معي مكالمة وأوزع بتسامات عطيته المبلغ والايداع
والجوال على خدي لامكالمة ولاشي وأخذت رقم من أرقام الكونتر الي عنده
قلت لو يطلب بخليه يناظر الرقم بيدي وتكون الورقة مقلوبه ...
والحمد لله مشت عليهم الحيله برعـاية فهد الرشـيدي[/align]

[متغربه]

فعلا اختي انا ملاحظه تصرفات الموظفات اعوذ بالله يهاوشن الصغير والكبير

[ابوسليمان22]

تقل غصب موظفين.
الصراحه هذي نذاله من الموظفين بكل فروع الراجحي .جزاه الله خير الراجحي اللي موظفهم المفروض يشكرونه بحسن التعامل مع المراجعين للمصرف.

[The Free Man]

لا جديد
اغلب الشركات في السعودية لا تحمل من خدمة المشتركين الا الاسم فقط
ولكن فيه شركتين لا يماثلهم احد في سوء الخدمة
مصرف الراجحي
و شركة الجميح للسيارات
اعتقد انهم الأسواء في العالم والله بدون مبالغة

[عبادي]

اقتباس:  المشاركة الأصلية كتبت بواسطة The Free Man     لا جديد اغلب الشركات في السعودية لا تحمل من خدمة المشتركين الا الاسم فقط ولكن فيه شركتين لا يماثلهم احد في سوء الخدمة مصرف الراجحي و شركة الجميح للسيارات اعتقد انهم الأسواء في العالم والله بدون مبالغة

بالنسبة لبنك الراجحي وموظفيه (( نفس خايسه وجلد مروح))
يشوفون انفسهم ملوووك او وزراء وهم مجرد صرافين مستواهم أقل من البنوك الأخرى ..
بالنسبة لي لا أحترمهم نهائياً حتى وهم يحترموني ..



أما الجميح للسيارات ..
دخلت عندهم سيارتي لتغيير الأديتر والآن لها 10 أيام ماطلعت ..!!!!!!

[خـــــــــــــــالـــــــــد]

معظم قريباتي ممن لهن حساب في الراحجي الصفراء


نقلن حساباتهن الى بنوك اخرى و ريحن بالهن و اشترن عزة انفسهن

فقد كان التعامل و الفرق و اضح .


معقوله بنك مثل الراحجي مهمل التعامل و استقبال العملاء

او المشكله في موظفاته ؟؟