أخواتي وإخواني : الإعزاء
أتمنى تعجبكم هالفكره وهي إن كل واحد يكتب لنا وش سوا أول يوم بالعيد ومتى صحى من النوم ( هذا إذا نام أصلاً )..
ورح أبدأ أنا ( للتشجيع وتوضيح الفكره ) .
** طبعاً أول يوم العيد كنت مواصله (مانمت) من الليل المهم : يوم جات الساعه 5 ونص رحت أصحي أخوي علشان يصلي صلاة العيد وأنا عندي طريقه في التقويم من النوم ماتطري على بال أحد ( عذاب ) ... تبون تعرفون طريقتي أبشروا بعلمكم.. (خذت قطرة إذن وحطيت فيها ماي وفتحت عيونه وقعدت أقطر فيها.. وأستلمته بالتقطير) .. لين لفني بالساعه على وجهي وتمشخ وجهي وقام يصب دم . وجات أمي تركض من صراخي وإرتاعت ( خافت ) علي يوم شافت الدميان تصب .. وقامت تهاوشه ويوم علمها بلي سويته فيه أنا ...
قامت تقول : أحسن وتستاهلين وحقتس ماجاتس .. وهذا حق المزح الثقيل..
والله الله يابنات بخوانكم قوموهم كيذا زين===>( وحده نذله ).
المهم ماطول عليكم راح يصلي ورحت أركب القهوه والشاهي وجدتي تمدحني (والله ..صايره مرره اليوم).. ثم رحت أكشخ عاد .. وألبس لبس العيد ( بزر ) .
ووجهي ملزق بكم لزقه .. وأمي تقول يالله صباح الله خيريالله من أول اليوم وأنتي مسويه لنا مشكله الله يستر من باقي اليوم) . وأروح أوزع الحلاو والشوكلاته في سلال وأحطها في الصاله علشان لاجاو الوراعين لينها تكون تحت عندهم .. ولايرقون فوق عجزانه من .. ظف وترتيب الدور الفوقي ..
وأروح وأرتز في الصاله ( سكنيه*جنيه ) أحتري أحد يجي( يعيد) علي وجاوا من الصلاه وأصب لهم القهوه(نشميه)..
ويوم جاوا عماني قعدت أشكي لهم من أخوي يوم طقني ( قوية عين). وهاوشوني وقالوا أنتي اللي غلطانه ..
وبعد ماصليت الظهر نمت ويوم جات الساعه أربع العصر قوموني
علشان فيه حريم جاوا يعيدون علينا .. وراحوا الحريم
وقعدت مرتزه في الصاله مع أمي وجدتي ومرت عمي لحد
ماجات الساعه سبع ورحت وخذت شريخاتي ( هذي حلاة العيد )
وأقعد أشرخ وأشرخ لين جيت أشرخ شريخه إسمها الفحمه
لونها أسود وعاد أنا أبي أتفنن واقوم من الشطاره واربط سبع مع
بعض علشان يصير لها صوت أحلى وأحلى. وقامت تطلع أصوات
وألوان وشوي إلا ويوم سكتت فقلت أكيد خلصت وأقرب منها وأمسكها بيدي إلا ويم قبعت في يدي وأقعد أصيح
(إلحقي على يدي يايومى إلحقي )...
( عاد أنا .. الدلع كله ) (شايفه نفسي على ويش .؟ ماأدري ) .
وجات أمي .. وتهد فيني تستاهلين حقتس ماجاتس وهذا إلي بنلقاه من هالشريخات .. والشرهه مو عليتس الشرهه على الي جابها لتس . يعني بدل ما تهديني ؟ قامت تهاوش وأنا عارفه والله إن هالشيء غصب. عنها وكله من خوفها علي .. لكني أنا دلوعه ماأسمع الكلام؟
المهم : هذي الثانيه .. وقالت أمي الله يستر من الثالثه...؟
ورحت وجلست في الصاله ويدي ملفوفه بشاش ..
( ألحين الوجه ملزق واليد ملفوفه ؟؟)
ويوم جات الساعه عشر رحت أبشحن جوالي لأنا ثاني يوم بالعيد
عندنا غداء في مخيم وبستهلك الجوال فقلت بروح أشحنه علشان
يمديه يشحن ... لأنه مافيه إلا بطاريه وحده.
وقلت بشحنه في كهرب 220 ( حق المكيف ).
علشانه أسرع . ومأدري وش صار لي لين دخلت يدي في الفيش
وكهربني وطحت عليهم وماحسيت بنفسي إلا وأنا بالمستشفى
والمغذي فيني ..بقسم الإسعاف .. وهذي الثالثه ..
وماأقول إلا الله يصبر أمي علي ...
وتستاهل إن الجنه تكون تحت رجلها كما قال الرسول صلى الله عليه وسلم: ( الجنه تحت أقدام الأمهات ) .
وصرررراحه هلي صار لي ...مايتصدق .
ولكن هذا إلي كتبه الله لي ويمكن فيه ( خيره ) .
تحياتي :فتاة الشرقية .
كل عام وانت بالف خير والحمد لله على السلامة ما تشوفين شر والله يوم قلتي اني اغمى علي قلت اسم الله عليتس الرحمن الرحيم
عيدتس ماشاء الله حافل بالمغامرات انا عيدي لو باقول لتس عنه اخاف تنامين اعوذ بالله مللللللللللللللللللللل طفششششششششششش ثاني يوم احسن منه لاننا زينا فيه حفل
عموما مرتن ثانيه اركدي خلتس رقيقه زيي من اول ما اشوف هالشرواخ اصارخ واحط اصابعي باذاني واقول :يا مااااااااااااااااااااااامي وخروا عني <== الله من الدج عربجيه تموووووووت بالطراطيع
وش صار لي أول يوم بالعيد ؟؟؟
يالله صباح الله خيريالله من أول اليوم وأنتي مسويه لنا مشكله الله يستر من باقي اليوم) . وأروح أوزع الحلاو والشوكلاته في سلال وأحطها في الصاله علشان لاجاو الوراعين لينها تكون تحت عندهم .. ولايرقون فوق عجزانه من .. ظف وترتيب الدور الفوقي ..
الطرطعان
العرض العادي
