السلام عليكم ورحمة الله وبركاته .
عقدنا العزم ، السفر إلى صلالة ، وهي أول سفره خارجية ، وقبل السفره بيوم
طقطقنا الجوازات و وخلصنا منها .
طبعاً الجوازات للي آول مره يطلع جواز ، صورتين شخصيه الخلفية بيضاء ،
وصوره للهوية الوطنية ، بشرط ما تكون قديمه ، تكون متعدي ٢١ سنه
،
تروح للجوازات ، بس رح بدري ، لإن وراك رصه يحبها قبلك.
وبس
، هذا بالنسبة للجوازات .
عدد آفراد الرحلة ، سبع اشخاص .
القطيه ، كل واحد ١٢٠٠ فقط لاغير ، مع العلم طريقتنا ، كل شئ على الميزانية ،
كل شئ ، وعند كل محطه لازم نهجم على السوبر ماركت ، والله يعز القطيه
.
المهم نبدأ مشوار الرحلة .
تم الانطلاق يوم الاثنين ، من بريدة إلى الرياض ، ومن الرياض إلى الخرج ،
ومن الخرج إلى منفذ بطحاء ، حتى الآن المسافة الي قطعناها قرابة ٨٣٠ كيلو .
بعد المبيت ، بمنفذ بطحاء ، تم دخول دولة الإمارات صباحاً ، ومن المنفذ حتى
المخرج الذ يذهب بك إلى مدينة العين وهو قبل ابوظبي بـ٤٠ كيلو على ماآظن .
المهم ، من مدينة العين ، وبعد تناول طعام الغداء
، تم التوجه إلى منفذ
مزيد ، وهذه معلومه للمستجدين مثلنا ، عمان لها منفذين على العين ، منفذ يمر
بك على مسقط قبل صلالة ، وطريق يوديك سيدا إلى صلالة ، طبعاً الفرق
٤٠٠ كيلو ، مهي هوينه ابد ، خصوصاً في حالتنا ، ودك توصل بسرعه مال من
طول الطريق .
طبعاً ، من دخلنا الإمارات قطعنا ، ٤٥٠ كيلو على ما آظن .
المهم ، مالكم بكثر الهرج >> لا ياشيخ وكلهذا وشسمه
.
دخلنا عمان ، ومن ثم من عند عبري يمين ، إياني وإياك تطول ، ترا بيفرق
عليك ٢٥٠ كيلو .
طبعاً مسافة الطريق ، من المنفذ إلى صلالة ١٠٤٦ تقريباً .
وصلنا صلالة بعد طلعة الروح ، تخيل لما يقابلك الخيال لدرجة ما تقدر تشوف
الي قدامك ، بكل تأكيد بتنسى كل تعب الطريق .
دخلنا صلالة ، وبعد جهد وجهيد ، تحصلنا على شقه وثفه ، غرفتين ودورتين
مياه ومطبخ وسطح سعنون .
اخذناها ٢٨ ريال فقط لاغير ، هههههه ، بس ترا ريالهم عن عشره من ريالاتنا .
ادري ، تقولون متى يخلص ، ويورينا الصوره ههه ، بس ترا جاكم الفرج
.
برنامج اليوم الأول : عين جرزيز ، جبال آتين ، مركز البلدية الترفيهي .
تنويه ، بصراحه ما جا في بالي أني بنزل تقرير عن الرحلة ، لذى آغلب الصور
فيها الشباب ، لذى اعتذر عن قلة الصور ، لكن بإذن الله تكون معبره وكافيه .
وصولنا لعين جرزيز .. طبعاً العين جافه ولا فيها مويه ، لكن شكلها وتجويفها
حلو ، والناس زحمه .
![](http://mltga-com.com/hul/%20078.JPG)
منطقة جبال آتين .. منطقه حلوه بس خذ احتياطك وحط عشر فرشات تحتك
، علشان ما ترطش ثيابك .
![](http://mltga-com.com/hul/%20091.JPG)
![](http://mltga-com.com/hul/slh%20099.JPG)
![](http://mltga-com.com/hul/106.JPG)
زيارة مركز البلدية الترفيهي .. فيه عروض ، فيه مسرحيات ، فيه مسابقات ،
رقصات شعبية
، وملاهي وآلعاب ، محلات ، شركات الاتصالات ، فيه الي
تبي .
البرنامج الثاني .. شاطئ المغسيل والنافورات المائية .
طبعاً اليوم الثاني توجهنا إلى شاطئ المغسيل ، يبعد ٤٠ كيلو عن صلالة .
![](http://mltga-com.com/qwr/slh%20087.JPG)
![](http://mltga-com.com/qwr/slh%20023.JPG)
الآمواج الموحشة ، التي يتميز بها بحر العرب في فترة الخريف .
![](http://mltga-com.com/qwr/slh%20032.JPG)
النافورات الطبيعية ، تحدث بفعل الآمواج ، بعد أن آحدثت فتحات في وسط الجبل .
![](http://mltga-com.com/qwr/slh%20041.JPG)
طبعاً ، بما آننا من بريده ، وبما آنهم قالو أن البحر لا يمكن السباحه فيه ،
لرتفاع الامواج وكثرتها ، سبحنا وعينا خير ، بس فعلاً السباحة خطيره ، واثار
الجروح لازالت في جسدي ، بفعل الآمواج القوية والآحجار الحادة .
بس ، فعلاً ، اسباحه ولا آحلا ، الي يعرف يسبح زين ، لا يروح لصلالة
وتفوته السباحة با الامواج ، شئ ثاني .
بصراحة تعبت ، باقي كم صوره وهمق كثير
.
آنا مقتنع اقتناع تام ، أن موضوعي لا يرتقي إلى المواضيع الآخره ، والسبب قلة
الصور لإن آغلب الصور الشباب ماكلين عليكم الجو .
بس حبيت ، يكون موضوعي مرجع بسيط من ضمن المراجع ، إذا نوى الواحد
يروح لصلالة .
لذى ما راح اخلي صغيره ولا كبيره إلا كتبت عنها .
لنا عودة ، لتكملة البقية ، بس مو الحين
.
عودنا والعود آحمد ...
البرنامج الثاني : عين وجبال صنحلوت , ومنطقة جبال دربات .
توجهنا , إلى منطقة جبال حمرير , لكن بما أن جبال حمرير هي واجهة مدينة صلالة
, ومن خلالها يفد إليها الزوار , وآعمال الطريق قائمة , لم نستطع مواصلة الطريق,
فتم التوجه إلى عين وكهوف صنحلوت > ماني متأكد من الأسم
.
وصولنا للعين , بس للآسف العين , لا يوجد فيها ماء , لكن يوجد فيها مستنقع ,
وبعد تراه مشبي
, تفضول الصور ...
![](http://mltga-com.com/bhu/cclo%20028.JPG)
![](http://mltga-com.com/bhu/cclo%20014.JPG)
الطريق إلى قمة جبل صنحلوت أو في رواية صحلنوت ..
![](http://mltga-com.com/bhu/cclo%20037.JPG)
لحظة الوصول إلى آعالي الجبال ... فيه ضريح آحد الآولياء كما يقولون بس
ترانا , ما دخلناه , مع أن فيه آحد الشباب اقترح نسير عليه , بس ماطعتنا
قلوبنا , عسى الله يثبتنا ...
![](http://mltga-com.com/bhu/cclo%20061.JPG)
الشباب وقت إحتسا
القهوة ولا يهون الشاهي ..
![](http://mltga-com.com/bhu/cclo%20066.JPG)
يسمع بالآخراج ...
![](http://mltga-com.com/bhu/cclo%20068.JPG)
حان وقت الرحيل ..
![](http://mltga-com.com/bhu/%20105.JPG)
التوجه إلى منطقة جبال دربات ... تبعد عن صلالة قرابة 50 كيلو .
نعاني آشد المعانات من البقر السائبه آجلكم الله ..
![](http://mltga-com.com/bhu/cclo%20149.JPG)
![](http://mltga-com.com/bhu/cclo%20150.JPG)
![](http://mltga-com.com/bhu/cclo%20184.JPG)
والشباب يقومون , بعمل طعام الإفطار ..
![](http://mltga-com.com/bhu/cclo%20117.JPG)
^^
رمز الاصالة , بكل تأكيد ..
قامت آحد البقر السائبة , بمداهمة الموقع ...
![](http://mltga-com.com/bhu/cldbe%20164.JPG)
طبعاً جلسنا في منطقة الجبل , حتى اظلمت العين , وصوت الكاتم يسمعه القاصي
والداني , وفجأه وبدون مقدمات , تحول الجبل إلى منطقة ميتة لا يوجد بها آثر
للحياة , آلتفت يمين يسار ما حولك آحد , الناس تنزل الجبل مع المغرب وفعلاً
لاحظنا هذا في آغلب المناطق , فقط بجوارنا ناس من ksa , المراد فجأه شفناهم
يحملون عفشهم , وحنا نتحرى المعزب ينتسب , وما قعدنا على الصحن , إلا ويجي لما واحد منهم يقول قبل شوي سمعنا ذيب قريب من هالمنطقه , بصراحه
انا سامع هالصوت بس قلت يزولي , وطلع حدى الشباب مثلي سامع الصوت ,
قم بلا عشا بلا بطيخ , العمر يا شامان , ظف قشك وعزبك واركب السيارة .
وعدنا لشقة سالمين غانمين , لم يمسسنا سوء
, وتعشيت كيك جالكسي
.
بعض المعلومات ..
لا يهون عليك القارمن , وربي مرتاحين راحه مو طبيعيه , لو بدونه كان للحين
ضايعين بصلاله هههه ..
العمله عندهم , الريال , وهو يساوي عشر ريالات عندنا , وريالهم مئة بيسة .
بصراحه , صلالة متخلفة جداً من ناحية الشقق والفنادق , متخلفه إلى ابعد درجه .
البنزين عندهم , اللتر بريال وسبعني هلله , وهذا الممتاز , العادي ما ادري عنه .
بالنسبة , لمدمنين الانترنت مثلي , هناك مافي آمل تحصل شقق موفره خدمة
الانترنت , الحل تشتري شريحة النورس بريالين
, وعندهم باقه 1 قيقا خلال يوم واحد , ريال واحد , حلوه مره .
جو صلاله معتدل , يعني , لاتاخذ احتياط ملابس شتويه .
بالنسبه للبعوض , ما راح تلقى بعوض كبر اليد مثل ما تقول الناس , النامس
عندهم , حيل صغير , وصدقني ما راح تحس به إلا إذا جيت لبريده ههههه .
ضروري تاخذ معك فرشه بلاستيك , لإن الأرض عندهم خلقه مبلله .
لا يهون عليك المكوى , مغاسله شغل عليميه , ولا آحد يودي ثوب يكوى ,
يجاب من المغسله مطرق مثل الملابس الداخليه ههههههه , مت ضحك على واحد
من الشباب .
باقي بعض الصور , والقليل من الهمق
.
بس الحين تعبت .