مــســاعـد مــديـر عـــام الخــطــوط الـســعــوديـة

[الحكواتي]

.

.

رحلة عمل .. غثا بال .. وجينا .. بشوق بالحال

.

أصلح شاعر إلا ربع ..

.

وياكثر ما يولف أيام المراهقة الواحد من الأبيات

الخاوية على عروشها

خرابيط .. والطريف بالموضوع إني احتفظت بدفتر

أكتب فيه من هالبربسة .. وإذا ضاق صدري : فتحته

قصيدة تضحكني .. وثانية .. أشره على نفسي .. وثالثة أقول جت سليمة

والرابعة .. أقول أكرم الله النعمة

.

عموماً .. موعود من المدير ببداية العام الهجري 1435

برحلة لورشة عمل خارجية .. قلت : خلاص فللللله

.

وتجي نشرة الدورات للمدير ... ويبدأ بأسلوبه

الحبايب أولاً .. و الحبايب ثانياً .. وآخر شيء المجتهدون والمغضوب عليهم

.

وهم فئة ... يكون تدريبهم ببريدة

أو عرعر .. أو لجنة بإمارة المنطقة .. وشلللللق

.

عموماً

.

المدير : حكواتي بيك .. إيش تبي دولة

الحكواتي : أهم شيء ما يخدم العمل .. والله من الكلك

المدير : اخلص أنت أول واحد أشاوره .. والباقي من عندي

الحكواتي : وش الدول

المدير: وش تبي أنت بس آمر ..

الحكواتي: أوروبا ..

المدير: ما جت إلا جورجيا .. وأبروح لها أنا بشهر ستة

الحكواتي: ميخالف .. أنت المدير .. دورة الصين طيب

المدير: أبعطيها المساعد .. يتشهواها من مدة

الحكواتي: يستاهل أبو عزيز .. طيب وش اللي به

المدير: الإمارات ، الكويت ، مصر ،

الحكواتي يقاطع : وسوريا بعد

المدير : هااااه ..

الحكواتي: وش اللي بقى من الزين .. وشولو تسالمن دفن على طول لأثيوبيا واخلص

.

.

المدير : هههه الله يهداك هدي ..

وتمر ساعة لجة ..

وأطلع .. بوعد منه بالذهاب لتركيا .. مهب المرغوب بس

نعيد الذكريات الجميلة فيها

.

وعلى الخطوط السعودية .. روحة وجية .. تمشية ..

وجميلة تركيا بدون ربيعنا .. فاحرصوا على الأوقات غير العربية هناك

.

جيت قلت خل أعتمر بالوالدة .. آخذ أجرها .. وأكفر عن بصبصة تركيا شوي

.

.

أنا أتوقع إن الوالدة حفظها الله معروفة لدى طاقم الخطوط السعودية

أجمعين

فهي تحتل منصب : مساعد مدير عام الخطوط السعودية لشؤون الشرط

مافيه أحد إلا تلفز بيده من العلوك وحلاو البقر

.

.

أحياناً يتضجر الراكبون وطاقم الطيران

ولكن يفرحون بعد تلقي الدعوات منها بعد أن تشرط لهم

.

في رحلة الذهاب لجدة

قامت أمي قبل الطيران بعملية الرمي العشوائي

على كل ما يسير بداخل الطائرة أو ترمش عيناه

.

لامجال للاعتذار

.

صائم .. عط اللي جنبك .. هذا فقط المقبول

.

بعد إقلاع الرحلة

واستتباب الطيران .. تقوم المضيفات بتقديم البارد والحار

وأمي تقوم بدور الحالي والحلو

.

آخر كمية قامت أمي بسحب يد المضيفة

ووضع كومة لها بيدها وقالت : لك أنت وخويتس

.

ابتسمت بحياء وخجل وشكرت الوالدة ووضعته بمخباتها

.

بعد ذلك ببرهة قمت لأغير الإحرام بدورة مياة الطائرة

وتفاجأت

بالمضيفة تقوم بجمع ما أعطتها والدتي وفتح حاوية النفايات تريد

طرحه فيها

.

لابد من رد الاعتبار .. ولكن الهون أبرك ما يكون

.

أوقفتها .. لحظة .. لحظة

الحكواتي : هي هدية من امرأة كبيرة بالسن

والجميع أكل منها .. أعتقد أن مخطئة

المضيفة بخجل : أنت ابنها ..

الحكواتي : نعم .. ولكن ليس لهذا السبب أقول هذا

المضيفة : آسفة .. وتفتح أحد حلاو البقر وتأكلها

وتعطي إحدى المضيفات .. وتعتذر بشدة

وأن لديهم قواعد صارمة بالنسبة للوزن الشخصي للمضيفة

الحكواتي : أعلم .. ولكن قطعة لن تضر أو أهديها على أحد ما

.

.

والهون ولا تهونون.. جاب نتيجة

.

لحظة : عندما تبزخك حلاوة بقر على متن إحدى رحلات

الخطوط السعودية .. فذلك هو مساعد مدير عام الخطوط

لشؤون الشرط يلقي عليك التحية.. فادع له بالحفظ والمغفرة

.

.

.

.

بمان الله