يا ثقل دمتس بعد ...!!

[" TWIX "]

,,
,

ثقل دم مثلكِ ما شفت ..

شيء ملاحظه وبقوة في البنات وهو ثقالة الدم والعداوة اللي بينها وبين الكوميديا
ما كد شفت بنت تضحكني من دون شعور .. أبدا .. أبدا ..
صح إن فيه بنات خلني أمشي بليا شعور .. لكن تنكت بعيده على شدوقها الحمر
لفوا الفن بكل أشكاله وألوانه .. بتتعبوا تلاقوا بنت خفيفة ظل..
إذا.. إذا .. أستخفت دمها لوّعت تسبدك .. وتضحك مجاملة لها .. والمشكلة كل ما ضحكت
زادت ملاغتها .. تشوفها تجر النكتة أجترار..
أما أبو سروال وفنيلة لعبته خفت الدم والاستهبال .. خوذوا الدليل ..
في الكتَّاب الصحفيين الساخرين عندنا :
أسود عبر " جعفر عباس " ومن الصعايدة الكاتب محمود السعدني ومن ksa الرطيان .. وغيرهم كثير .. كثير ..
ومن رسامي الكاركاتير الساخرين عندنا :
الهليل .. عثمان بهجت .. ربيع .. محمود كحيل .. وطقتهم ..
ومن الممثلين عندنا :
عادل إمام .. اللمبي .. اسماعيل ياسين .. طارق العلي .. القصبي ناصر ..
حتى التمثيل الصامت تسيدنا .. بـ شارلي شابلن ..
حتى الكوميدياني المختفي " المحشش " ينتمي إلينا بلا فخر..
السؤال ..
أين أنتن في هذا المجال ..
لا أحد .. ما قلت إنكن ثقيلات دم ..

دوكن ..

[دِيم]

ياحنيننا ،
ماتجتمع قناصيع و خفة دم


ماعلينا :
ولا فيه ولد وسيم يعرف ينكت :/

[" TWIX "]

اقتباس: ياحنيننا ، ماتجتمع قناصيع و خفة دم ماعلينا : ولا فيه ولد وسيم يعرف ينكت

ديـــــم ..



يعني زهمة هالبيضة مو جنان ياديم
تمقلي بجاجه الأيمن ..
ومبسة وه .. بس عليه ..
وإلا قذيلته اللي تهفهف من الهوا ..
وش رأيك ياديم .. ؟!
يابخت من جمع أثنين بالحلال ..

[بسومة بريده]

اقتباس: حتى الكوميدياني المختفي " المحشش " ينتمي إلينا بلا فخر..

خخخخخخ...


.................................................

يمكن ثقل دمنا مقابل خفة دمكم نحقق التوازن البيئي..

[امرؤ القيس]

لسان حال البنات يقووول ماعليك زووود !!!

مع ان بعضهن موبعيد منك وخاصة السابقووون

[" TWIX "]

اقتباس: خخخخخخ... ................................................. يمكن ثقل دمنا مقابل خفة دمكم نحقق التوازن البيئي..

بسومة بريده ...
لكن اللي نشوفه ليل نهار خرق ثقب الأوزن داخل البيوت بسبب الكتمة ..
المرأة ما تعرف بالبيت إلا جب ورح .. بالضبط " الزوج " فيزة بنقالي وأرتح ..
ولا ديعت عندها وقلبت عادل إمام قالت لزوجها : وين الثياب اللي يبن غسل ..!!
صح توازن بيئي .. لا والله أنفلات بيئي ..

[عزف الحقيقة]

خفة الظل ممكن فيه .. بس


تنكت ما أظن رغم أن هناك نوادر


يعني لازم تركب مكينة سربوت وتتنازل


عن بعض صفات الانوثة وهنا ممكن


يطلع منه شي .

[" TWIX "]

اقتباس: لسان حال البنات يقووول ماعليك زووود !!! مع ان بعضهن موبعيد منك وخاصة السابقووون

امرؤ القيس ..

[" TWIX "]

اقتباس: خفة الظل ممكن فيه .. بس تنكت ما أظن رغم أن هناك نوادر يعني لازم تركب مكينة سربوت وتتنازل عن بعض صفات الانوثة وهنا ممكن يطلع منه شي

عزف الحقيقة..

تصور ياعزف إن بنت مركبة مكينة سربوت منتهي مررررة ..
تجمع بنات الحارة بالعاير وتتن ولاجاء أخوها يهوشها
قطت عليه قطف الزقارة .. وحاطة الغدفة على الكتف وتمشي مشي
القصبي يوم هو بدور أبو عرادة .. يسحب الرجلين سحب تقل منكسر عنده عمود التوازن ..

[عزف الحقيقة]

اقتباس:  المشاركة الأصلية كتبت بواسطة " twix "     عزف الحقيقة.. تصور ياعزف إن بنت مركبة مكينة سربوت منتهي مررررة .. تجمع بنات الحارة بالعاير وتتن ولاجاء أخوها يهوشها قطت عليه قطف الزقارة .. وحاطة الغدفة على الكتف وتمشي مشي القصبي يوم هو بدور أبو عرادة .. يسحب الرجلين سحب تقل منكسر عنده عمود التوازن ..

اصبر اتخيل الغدفه على الكتف هههه


تصدق عرفته تراه لراحت للبيت




تقمز والباب مفتوح !!

[شاعر الاماكن]

حياك الرحمن

" TWIX "

روح النكته وخفة الدم حلاتها بطبيعتها من غير تصنع وتغيير في الملامح والنكته تطلع دائما من خفيف الدم وصاحب الروح الجميله بشكل غير مباشر لانها طبيعته .. وخفة الدم والنكته لا تنتمي لجنس ولا وقت معين احيانا تطلع معك حاجه وانت في مراسم عزا وبدون قصد ..

شوف عزيزي مجتمعنا للامانه فيه خفة دم مو طبيعيه ومن غير تصنع او امام كاميرا ..

انت تقول ان الشباب فيهم خفة دم اكثر من البنات وذكرت لنا كتاب وممثلين ..

طيب نسيت اسعاد يونس ؟ وسعاد عبدالله ومريم الغضبان وحياة الفهد ؟

بخصوص طارق العلي وخفة الدم لاتنسى انها بـ اتفاق مسبق مع الممثلين وطارق ماعنده شي والدليل تكرار الجمل او اجيب واحد واحط عليه من بداية المسرحيه الى نهايتها او جلد الذات ومو خفة دم اسميها يمكن مصخره وقلة حيا اقرب ما تكون.
وبقولك بعد انت نسيت سعد الفرج وخالد النفيسي دمهم خفيف وعلى طبيعتهم مو مثل طارق اللي يقط النكته ويستغرب لو مااحد صفق ويأجر ناس يصفقون وارجع لمسرحياته وشوف نهايتها كيف يودع الجمهور بوس ومشكورين ومدري ايش يعني كأنه داعيهم ..

عزيزي ..

بالنسبه للانثى خفة دمها وروحها الجميله تراها مخفيه يعني مو بالاعلام عندنا خصوصا ..

وحده تسولف على اختي تقول يوم خطوبتي الرجال جاء قبل الموعد وابوي استقبله وخلاه يشوفني وانا افحط بالحوش مع خواني الصغار لا ومن زين الطبايع تقول اطلع صوت مثل صرخة الكفر واقول الف الصلاة عليك يارسول الله محمد ..

وتقول يوم الزواج واحنا على الكوشه قال الرجال تدرين انك خفيفة دم وعسل قالت يمه شلون قال شفتك تفحطين مع اخوانك بالحوش

وتقول قالي ما ودك على الكوشه
تفحطين

ترى بناتنا خفة دمهم مخفيه وعساك ما تطيح بيدينهم

" TWIX "
دوك

[" TWIX "]

عزف الحقيقة ..

اقتباس: تقمز والباب مفتوح !!

:10_4_4v[1]:

[shahd2007]

ي زين قرايتي جابت نتيجه
راح اللي ناحت تويكس وصار ينزل مواضيع 😏😎

غديهم يحطون لي صومعه بطرف المجلس احط به مويه مقري فيها وزيت تراي مبروكه


المهم نرجع للموضوع

وانا اشهد خفه الدم بالرجال اكثر بس دايم الشين خفيف دم

[" TWIX "]

شاعر الأماكن ..

اقتباس: بالنسبه للانثى خفة دمها وروحها الجميله تراها مخفيه يعني مو بالاعلام عندنا خصوصا .. وحده تسولف على اختي تقول يوم خطوبتي الرجال جاء قبل الموعد وابوي استقبله وخلاه يشوفني وانا افحط بالحوش مع خواني الصغار لا ومن زين الطبايع تقول اطلع صوت مثل صرخة الكفر واقول الف الصلاة عليك يارسول الله محمد .. وتقول يوم الزواج واحنا على الكوشه قال الرجال تدرين انك خفيفة دم وعسل قالت يمه شلون قال شفتك تفحطين مع اخوانك بالحوش وتقول قالي ما ودك على الكوشه تفحطين ترى بناتنا خفة دمهم مخفيه وعساك ما تطيح بيدينهم

هذي المفروض يحطون لها تمثال ..
وإن كنت أرى ما قامت به ماهو خفت دم .. إلا خفت عقل .. المشكلة إنه تزوجها
إلا كانه شاف شي ماشفناه ..
ندخل على الله ما ندري ..
الله يجمع بينهم .. ويرزقهم الذرية الصالحة .

[" TWIX "]

اقتباس:  المشاركة الأصلية كتبت بواسطة shahd2007     ي زين قرايتي جابت نتيجه راح اللي ناحت تويكس وصار ينزل مواضيع 😏😎 غديهم يحطون لي صومعه بطرف المجلس احط به مويه مقري فيها وزيت تراي مبروكه

أنا يوم أكتب الموضوع فوق راسي مطوع ينفث علي مع كل حرف
وثاني يرشرشن بماء زمزم لين خلصت ..
ألحين المطوع متوسد الفارة جنبي ويقول لا جاك التكاك صحني .. وأنا الآن
أبشرك الأأمور تمام التمام ..